Read Oshindonga-Ombiimbeli Ondjapuki 2008 Lamentations 1 Bible Online

Lamentations 1 - Oshindonga-Ombiimbeli Ondjapuki 2008 bible

Lamentations 1

¹Oshilando shoka sha li shu udha aantu, osha si uuwike ngiini! Shoka sha li oshinankondo mokati kiigwana, osha ningi sha fa omuselekadhi. Shoka sha li omunyekadhi mokati kiilongo, osha ningi omupika gwowala.

²Ota lili omahodhi omapyu uusiku auhe, omahodhi otaga pononoka koompanda dhe. Kaku na nando ogumwe gwomaaholike ye a hupu ko te mu talaleke. Ookuume ke ayehe oye mu kotokele noya ningi aatondi ye.

³Juda okwa falwa muupongekwa, oku li muupika nomoluhepo. Oku li mokati kiigwana, ye ita mono evululuko. Aatidhagani ye oye mu kondeke, okwa thitikininwa pokakololo.

⁴Omapola gu uka kuSion, otaga lili oosa; kaku na we ngoka te ya kiituthi ye. Omiyelo dhoshilando odha teywa po, naayambi otaa tsu omazima. Aakadhona ye oya yemata; Sion mwene okwa lulilwa.

⁵Aathiminiki ye oya sindana, aatondi ye otaa nyanyukwa. Omuwa mwene okwe mu sitha oluhodhi omolwomayono ge ogendjigendji. Uunona we owa kwatwa po komutondi nowa falwa muupongekwa.

⁶Esimano lyomukadhona Sion olye mu thigi po. Aawiliki ye oya fa oomenye dhaa na omaunapelo. Muunkundi wawo oya nduungile komeho gaakwatipo yawo.

⁷Momasiku guukweyi muupongekwa Jerusalem ota dhimbulukwa uuyamba we auhe wonale, uuna aantu ye ya gwile komeho gaatondi, nokakwa li ngoka e ya e mu kwathe. Aathiminiki ye oye mu tongolola yo taa yolo okutekapo kwe.

⁸Jerusalem okwa yono nokuyonenena, okwi inyateke nayilela. Ayehe mboka ya li haye mu simaneke, otaye mu dhini ngashingeyi; oya mono eshunduko lye. Jerusalem ota hekumuna a pungulula oshipala she.

⁹Onyata ye oya kakatela koohulukweya dhe. Ina yaguma nando ehulilo lya fa ndika. Okutekapo kwe okwa li okukumithi; ke na ngoka te mu talaleke. “Omuwa, tala efupipiko lyandje; aatondi yandje otaa imbi ekandanga.”

¹⁰Omuthininiki okwa ganeke iikaha ye, a kwate po omaliko ge agehe. Okwa mono aapagani taa hiti motempeli ye, aantu mboka wi indike okuya megongalo lyoye.

¹¹Aantu ayehe otaa keme, sho taa kongo oshikwiila. Eliko lyawo lyondilo otaye li tula miilya, opo ya kwatele mo omwenyo. “Shi tala, Omuwa, u shi ndhindhilike, nkene tandi dhinwa.”

¹²Kamu uvite ondjaalela, amuhe mboka tamu pitilile po? Lengalengeni mu tale: oku na tuu uuwehame u thike puuwehame wandje, mboka Omuwa a dhenge ndje nawo mesiku lyehwamo lyondjahi ye?

¹³Okwa tumu omulilo gwa koloka muule nogwe ya momasipa gandje. Okwa lukile omwigo kohi yoompadhi dhandje nokwa kulukithile ndje mo. Okwa mbugalekitha ndje nokwa alukitha ndje omasiku agehe.

¹⁴Oshikaha she osha kutile ndje ondjoko yomayono gandje. Okwe yi tsike kothingo yandje nokwa pegeyitha oonkondo dhandje. Omuwa okwa tula ndje miikaha yaatondi yandje, nonda nyengwa okwiipopila.

¹⁵Omuwa okwe ekelehi aakwiita yandje ayehe oofule. Okwa hiyile ndje aakwiita, opo ya hanagule po aagundjuka yandje. Metemba lye lyokukolela, Omuwa okwa lyatele mo omukadhona Juda.

¹⁶Omolwashoka tandi lili; omeho gandje otaga pononoka omahodhi. Ngoka ta vulu okutalaleka ndje, oku li kokule. Aamwandje oya halakanithwa po, oshoka omutondi a lundalala.

¹⁷Sion ota yelutha omaako ge: kaku na ngoka te mu hekeleke. Omuwa okwa tukulukithile Jakob aatondi koombinga adhihe. Oya tala Jerusalem onyata ayike.

¹⁸Omuwa ota pongolola nawa, oshoka onda pingathana neutho lye. Pulakeneni, ne iigwana ayihe, ne mu mone uuwehame wandje. Aakadhona yandje naamati yandje oya falwa muupongekwa.

¹⁹Onda kugile ookuume kandje ekwatho, ihe oye etha ndje. Aayambi naawiliki yandje oya sile moshilando kondjala, sho ya li taa kongo okulya, ya kwatele mo omwenyo.

²⁰Omuwa, tala, uuwehame wandje uunene ngiini! Omandjandja gandje otaga nyulukuta kuugelele. Omutima gwandje otagu pilukile meni lyandje. Akutukutu ko! Nda ningi omutangalali — pondje egongamwele olya yugu ndje aanona, ndele nomeni omu na elega.

²¹Pulakeneni omakemo gandje. Kaku na ngoka ta hekeleke ndje. Aatondi yandje ayehe oyu uvu omupya gwandje; otaa ligolele shoka wa ningi. Thikitha esiku we li ya hunganekele, opo ya fe ndje.

²²Ya pangulila uukolokoshi wawo; ya ninga ngaashi wa ningile ndje molwoondjo dhandje. Omakemo gandje ogendji, nomutima gwandje otagu alukwa.