Read Oshindonga-Ombiimbeli Ondjapuki 2008 Lamentations 3 Bible Online

Lamentations 3 - Oshindonga-Ombiimbeli Ondjapuki 2008 bible

Lamentations 3

¹Ngame omuntu nda talithwa omalwa koshivugati shondjahi ye.

²Ondu undagulwa nda thiminikilwa momilema pwaa na uuyelele washa.

³Esiku alihe ota pilukile ndje noshikaha she, a kondjithe ndje.

⁴Okwa yugu ndje oshipa e ta kunya onyama yandje komasipa e ga teya.

⁵Okwa hongele ndje ondjoko, a kondeke ndje nuudhigu nuuwehame.

⁶Okwa thiminike ndje, ndi pukile momilema pamwe noonakusa yonalenale.

⁷Okwa tungile ndje ekondeka, ite vulu okuhunuka mo. A tula ndje momalyenge ga kola.

⁸Nando otandi kugagana tandi igidha, ita pulakene omagalikano gandje.

⁹Okwa thitike ondjila yandje nomamanya, omapola gandje okwe ga golipaleke.

¹⁰Okwa langele ndje a fa emwanka, a fa onime tayi tegelele ndje moshiholameno shayo.

¹¹Okwa tidha ndje mo mondjila yandje nokwa tuulagula ndje; okwa thigi ndje po.

¹²Okwa lukile uutati we e ta shoneke ndje niikuti ye.

¹³Okwa ndjike iikuti ye molutu lwandje.

¹⁴Onda ningi ondjolwi yoshigwana shandje ashihe, otaa sheke ndje miiyimbo yawo aluhe.

¹⁵Okwa kolitha ndje kuululu wonyango.

¹⁶Omayego gandje okwe ga teyagulitha omawe nokwa tsu oshipala shandje mevi.

¹⁷Omwenyo gwandje okwe gu yugu ombili; onda dhimbwa elago nenyanyu.

¹⁸Ngashingeyi otandi ti: “Oonkondo dhandje odha pwine, kandi na we etegameno lyasha tali zi kOmuwa.”

¹⁹Dhimbulukwa omalwa gandje nokwaalaala kwandje, onyango ondulundulu.

²⁰Otandi yi dhimbulukwa nawa, omwenyo gwandje ogwa thindililwa mo nayo.

²¹Shimwe otandi shi lombwele omwenyo gwandje, note mono etegameno.

²²Okesilohenda lyOmuwa, sho inaatu yonwa po thilu, ontalanteni ye inayi hula po.

²³Esilohenda lye olyo epe kehe ongula; uudhiginini we kau na ondjele.

²⁴Omwenyo gwandje otagu ti: “Omuwa oye oshitendelwa shandje; ongame nonde mu inekela.”

²⁵Omuwa oye omwaanawa kwaamboka ye mu inekela, komwenyo ngoka tagu mu kongo.

²⁶Osho opala okutegelela ehupitho lyOmuwa meimweneneno.

²⁷Osho opala omulumentu a humbate ondjoko okuza kuugundjuka we.

²⁸Na kuutumbe muuwike nokumwena, uuna Omuwa te yi mu tsike.

²⁹Na lale montsi — pamwe oku na natango etegameno.

³⁰Na gandje olupanda kungoka te mu dhenge, na mone omasheko ga gwana.

³¹Oshoka Omuwa ite ekelehi omuntu sigo aluhe.

³²Ngele ota geye, oku na ohenda, esilohenda lye enenenene.

³³Nokuli iha nyanyukilwa okuhepeka aana yaantu nenge oku ya nikitha oluhodhi.

³⁴Oonkwatwa adhihe moshilongo uuna tadhi vunyagulwa notadhi lyatagulwa noompadhi,

³⁵uuna uuthemba womuntu tau thininikwa koshipala shaanguka gwokombandambanda,

³⁶uuna omuntu ta kuthwa uuyuuki — Omuwa ke shi wete?

³⁷Olye a popi, iinima noye ya po? Olye e shi ningi, ngele ke shi Omuwa?

³⁸Openi nduno, ngele kamu shi mokana kwaanguka gwokombandambanda, hamu zi uuwinayi nuuwanawa?

³⁹Omuntu oshike ta tamananene? Oshipu okukala ta keme moluulunde we.

⁴⁰Tu konakoneni oondjila dhetu, tu dhi simonone, tu galukile kOmuwa.

⁴¹Tu yelutheni oomwenyo nomaako getu kuKalunga megulu tu tye:

⁴²Otwa yono notwa kolokosha, ongoye noino tu dhimina po.

⁴³Ongoye wi idhingile ondjahi nowe tu tidhagana, owe tu dhipaga waa na ohenda.

⁴⁴Owi idhingile moshikogo itamu piti omagalikano.

⁴⁵Owe tu ningi etutu niifakufaku mokati kiigwana.

⁴⁶Aatondi yetu ye tu makulile omakana, taye tu nyana miiyimbo.

⁴⁷Omahalutho nomakolombongo ogo oshitopolelwa shetu, ekano nehanagulo.

⁴⁸Omeho gandje oga togala momulonga gwomahodhi okulila ehanagulo lya adha oshigwana shandje.

⁴⁹Omeho gandje otaga lili gaa na evululuko,

⁵⁰sigo Omuwa to ontamene pevi, e tu taalele megulu.

⁵¹Omeho gandje oga pushuka iilalo kokulila aakadhona ayehe yomoshilando shandje.

⁵²Oya yewe ndje, ya tidha ndje ngondhila, oyo mboka ye tonde ndje owala.

⁵³Oyu undulile omwenyo gwandje monyombo, noyu umbile mo omamanya.

⁵⁴Omeya oga pitilile omutse gwandje; onda ti: “Nda kana.”

⁵⁵Omuwa, onde ku ithana muuleelee wonyombo.

⁵⁶Ou uvite onkugo yandje tayi ti: “Ino thitika okutsi kwoye, kwaa uve omagalikano gandje.”

⁵⁷Owa hedha popepi, uuna ndoka nde ku ithana; owa ti: “Ino tila.”

⁵⁸Ongoye, Omuwa, owa popile ndje miihokolola, owa hupitha omwenyo gwandje.

⁵⁹Omuwa, ou wete omathiminiko tandi ga thiminikwa. Uthila ndje.

⁶⁰Owa mono omafudhagano gawo agehe, iineya yawo ayihe taa dhiladhilile ndje.

⁶¹Omuwa, owu uvu okusheka kwawo, niiponga ayihe taye yi dhiladhilile ndje.

⁶²Aatondi yandje otaa piyaganeke ndje nomanongono gawo omasiku agehe.

⁶³Nando oya kuutumbe nenge ya thikame, tala, ongame oshiimbo shawo.

⁶⁴Omuwa, shi ya futila, ngaashi ye shi ilongele.

⁶⁵Kukutika oomwenyo dhawo, etulomutima lyoye nali ya lambele.

⁶⁶Ya tidha mondjahi, ya nakula mo kohi yegulu lyoye.