Read Oshindonga-Ombiimbeli Ondjapuki 2008 Lamentations 4 Bible Online

Lamentations 4 - Oshindonga-Ombiimbeli Ondjapuki 2008 bible

Lamentations 4

¹Akwetse, oshingoli osha ninga iikogo, oshingoli oshiyelele osha dhimeya. Omamanya omayapuki oga halakanithwa ga napakana momapandaanda.

²Aana yaSion, mboka ya li ye na ondilo ya fa yoshingoli sha hogololwa, oya talwa ngashingeyi ya fa iiyuma yeloya, oshilonga shomuhongi gwiiyuma.

³Nuululunga wo hau gandja omagundji nohau yamutha uunimona wawo, ihe aakiintu yoshigwana shandje oye na olungwenye ya fa oompo dhomombuga.

⁴Elaka lyokahanona otali kakatele kondaathelo omolwenota. Uunona tau indile oshikwiila, ihe kaku na ngoka te shi u pambulile.

⁵Mboka ya li haa li nawa, ngashingeyi oya kangawala momapandaanda; mboka ya li haa ithele moonguwo oombwilili, ngashingeyi otaa lala pelunda lyomutoko.

⁶Uukolokoshi woshigwana shandje owa lundu pombanda u vule uulunde waSodom, shoka sha hanagulwa po mepathimo, pwaa na omuntu e shi gumithe iikaha ye.

⁷Nale aawagona yaSion oya li taa tayima ya fa oompawe, aatotototo ye vule omahini. Omalutu gawo oga li ge vule oonyoka dha kwehulwa, neopalo lyawo olya li li vule eadhimo lyosafire.

⁸Ngashingeyi oye na iipala ya fa ombiga yomudhilo, itaa dhimbululwa we momapandaanda. Oshipa shawo osha kakatela komasipa, oya kukuta ya fa oshikuni.

⁹Aanelago oyo mboka ya si kegongamwele, oyo aahwepo ye vule mboka ya si kondjala, oomboka ya gunda taa thithonoka kompumbwe yiilya yomomapya.

¹⁰Niikaha yawo yene, aakiintu aanahenda oya paka po oyana, mboka ya ningi iikulya yawo momupya ngoka gwa adha oshigwana shandje.

¹¹Omuwa okwe etha uupyundjahi we u hwame; okwa tilehi mo ongeyo ye. Okwa hwameke eziko lyomulilo muSion, ndyoka lya lungunike po omakankameno ge.

¹²Aakwaniilwa yokombanda yevi inaye shi itaala nenge wo aakali ayehe muuyuni kutya omuthininiki omutondi ona ka vula a hite miiyelo yaJerusalem.

¹³Oshe ya adha moluulunde waahunganeki nomoluumbudhi waayambi, mboka ya tilehi ombinzi yaayuuki mokatilela koshilando.

¹⁴Otaa pwampwauka momapandaanda ya fa aaposi. Oya hipa ombinzi nokaku na ngoka e na omukumo okuguma oonguwo dhawo.

¹⁵Aantu oyi igidha ya ti: “Kandukii po, hedhii ko, inamu tu guma!” Sho ya tauka mo ya yi kiigwana yilwe, inaa ziminwa nando, ya kale mokati kayo.

¹⁶Omuwa oye mwene e ya halakanitha, ite ya tonatele we nohokwe. Aantu itaa simaneke we aayambi noitaa pulakene aawiliki.

¹⁷Otwa lolodha owala omeho getu tatu tegelele ekwatho — osima yowala! Kooshungo dhetu otwa pekapeka twa tegelela oshigwana shoka inaashi vula oku tu hupitha.

¹⁸Aatondi yetu oya tala oonkatu dhetu noye edhile omagumbo getu. Ehulilo lyetu olya thikana, omasiku getu oga hulu.

¹⁹Aatidhagani yetu oya li oontondoki, oye vule omakodhi mewangandjo. Oya landula oshinkoti shetu moondundu, oye tu langele mombuga.

²⁰Omukwaniilwa gwetu, omugwayekwa gwOmuwa, okwa gwile momakelo gawo. Okwa li omufudho gwomomayulu getu, ngoka twa popile tatu ti: “Meni lyomuzile gwe otatu ka kala mokati kiigwana.”

²¹Nyanyukwa nokuligola, ngoye oshigwana shaEdom, ngoka wa kala moshilongo Uz! Molufo lwoye oshitenga otashi ke ku adha: Otashi ke ku kolitha, e to mbugalekwa.

²²Omukadhona Sion, ongunga yuulunde woye ya futwa; Omuwa ite ke ku konda mo we. Omukadhona Edom, uulunde woye otau ka geelwa; Omuwa ota ka holola oondjo dhoye puuyelele.