Read Oshindonga-Ombiimbeli Ondjapuki 2008 Joel 1 Bible Online

Joel 1 - Oshindonga-Ombiimbeli Ondjapuki 2008 bible

Joel 1

¹Ndika olyo elaka lyOmuwa, e li pe Joel yaPetuel.

²Uvii ko, ne aakuluntu; shaa ngoka muJuda na pulakene. Osha ningilwe tuu nale sha fa shika, muuyuni weni nenge momauyuni goohokulu?

³Shi hokololeleni aana yeni; oyo naye shi hokololele oyana, noyana naye ke shi hokololele oluvalo talu ya.

⁴Oshipupu shoombahu tashi landula oshikwawo, osha lambela kiimeno; shoka sha thigwa po koonakapipi, osha liwa po komakamuti.

⁵Ne oonkolwi, tonateni ne mu lile; takumeni, ne aanwi yomaviinu; omandjembele gokukolwa omaviinu omape oga yonwa po.

⁶Oshipupu shoombahu osha ponokele evi lyetu; odhi na oonkondo nodhindji tadhi nyengana okuyalulwa; omayego gadho oga tsa ga fa gonime.

⁷Odha yonagula po omiviinu dhetu nodha li po omikwiyu dhetu. Odha huula ko omihuya, sigo iitayi ya ningi iitokele to.

⁸Yantu ne, lileni ngaashi omukadhona ta lili oosa dhomulumentu ngoka a li e na oku mu hokana.

⁹Kaku na we iilya nenge omaviinu okuyambelwa motempeli; aayambi otaa lili, oshoka kaye na omayambo okuyambela Omuwa.

¹⁰Omapya oge li owala; evi otali lili, oshoka iilya oya yonagulwa po, omahila goomviinu oga kukuta, nomiolivi odha ganya.

¹¹Aanamapya, seni oluhodhi; lileni ne mboka hamu dhiginine iitsambe yomiviinu, oshoka osiima niishokelya, eeno, iimeno ayihe oya yonagulwa po.

¹²Omiviinu nomikwiyu odha ganya; omiti adhihe dhiiyimati odha kukuta. Enyanyu lyoshigwana olya kana.

¹³Zaleni omahahi, mu lile, ne aayambi mboka hamu yakula poshiyambelo! Indeni motempeli, mu lile uusiku auhe! Kape na iilya nenge omaviinu okuyambela Kalunga keni.

¹⁴Gandjeni elombwelo lyeidhiliko; hiyeni oshigongi! Gongeleni aawiliki noshigwana ashihe shaJuda motempeli yOmuwa Kalunga keni, mu mu galikane.

¹⁵Esiku lyOmuwa oli li popepi; esiku uuna Omunankondoawike te eta ehanagulo. Esiku ndyoka otali eta uumbanda u thike peni!

¹⁶Otwa kanitha etegameno, oshoka iimeno yetu oya lika po. Motempeli yaKalunga ketu kamu na nando enyanyu.

¹⁷Oombuto otadhi sile mevi ekukutu. Kape na iilya yokupungulwa, niigandhi oyi li owala ya hohoka.

¹⁸Iimuna otayi lilagana kuulumbu, oshoka kayi na oshinapelo; iigunda yoonzi otayi tala omalwa.

¹⁹Omuwa, otandi ku galikana omolwomanapelo nomiti dha kukuta, ongodha lunguna komulilo.

²⁰Nokuli iithitukuti otayi ku lilile, molwashoka omilonga odha pwine.