Read Oshindonga-Ombiimbeli Ondjapuki 2008 Joel 3 Bible Online

Joel 3 - Oshindonga-Ombiimbeli Ondjapuki 2008 bible

Joel 3

¹Omuwa ota ti: “Pethimbo ndyoka otandi ka galulila Juda naJerusalem elago lyawo.

²Otandi ka gongela iigwana ayihe e tandi yi eta kOlusilu lwaJehosafat. Nkwiyaka otandi ke yi pangulila ayihe mbyoka ye yi ningile aantu yandje. Oya halakanithile Aaisraeli miilongo yaapagani noya topola evi lyandje Israel.

³Oyu umbu oshihogololitho, yu uthile ngoka ta ka pewa oonkwatwa. Oya landitha po aamati naakadhona muupika, opo ya fute oohonda noya mone omaviinu.

⁴“Otamu kambadhala okuningila ndje shike, Tiro, Sidon nomikunda adhihe dhAafilisti? Otamu kambadhala, mu futile ndje sha? Ngele osho, otandi ke mu futila mbala.

⁵Omwa kutha po oshisiliveli noshingoli shandje nomwa fala uuyamba wandje mootempeli dheni.

⁶Omwa fala aantu yaJuda naJerusalem kokule nevi lyawo yene nomwe ya landitha po kAagreka.

⁷Ngashingeyi otandi ke ya kutha mo momahala ngoka mwe ya landitha po. Otandi ke mu ninga shoka mwe ya ningile.

⁸Otandi ka landitha po aana yeni aamati naakadhona koshigwana shaJuda; otaye ke ya landitha po kokule kAasaba. Ongame Omuwa nde dhi tya.

⁹“Tseyithileni shika mokati kiigwana: ‘Ilongekidhileni iita; hiyeni omatanga geni; gongeleni aakwiita ayehe, mu katuke!

¹⁰Hambululeni omatemo giipululo yeni, ga ninge omagongamwele niimwitho yeni, yi ninge omagonga. Nokuli omukatalume oku na okuya molugodhi.

¹¹Ne iigwana ayihe yopuushiinda, endeleleni, mu ye mu gongale molusilu.’ ” Omuwa, tuma etangakwiita lyoye, li yi ponokele.

¹²“Iigwana oyi na okwiilongekidhila okuya kOlusilu lwaJehosafat. Nkwiyaka ngame, Omuwa, otandi ka kuutumba, ndi tokole iigwana ayihe yopuushiinda.

¹³Oyo iiwinayi unene; yi teyeni ya fa iilya pethimbo lyeteyo. Yi hopoleni, ngaashi omandjembele taga hopolelwa metemba lyokukolela mo oomviinu, sigo omaviinu taga hunga.”

¹⁴Omayuvi nomayuvi oye li mOlusilu lwetokolelo. Omo moka esiku lyOmuwa tali ya mbala.

¹⁵Etango nomwedhi otayi luudha, noonyothi itadhi minikile we.

¹⁶Omuwa ota pumbu kondundu Sion; ewi lye otali ndunduma muJerusalem; evi newangandjo otayi kakama. Ihe ota ka popila aantu ye.

¹⁷“Nena, Israel, oto ka tseya kutya ongame Omuwa Kalunga keni. Onda kala kuSion, ondundu yandje ondjapuki. Jerusalem otashi ka ninga oshilando oshiyapuki; aakwiilongo itaa ke shi lala we.

¹⁸Pethimbo ndyoka oondundu otadhi ka siikilwa komiviinu, niimuna otayi ka monika kiikulundundu ayihe; otaku ka kala omeya gefundja momilonga adhihe dhaJuda. Motempeli yOmuwa otamu zi omulonga tagu tutike Esilu lyomano.

¹⁹“Egipiti ota ka ninga ombuga, naEdom eputu alike, oshoka oya ponokele evi lyaJuda noya dhipaga aantu yalyo yaa na ndjo.

²⁰Otandi ka geya molwaamboka ya dhipagwa; mbo ya yona, itandi ke ya hupitha. Ihe Juda naJerusalem otayi ka kalwa sigo aluhe, nangame Omuwa otandi ka kala kondundu Sion.”