Read Oshindonga-Ombiimbeli Ondjapuki 2008 Jonah 1 Bible Online

Jonah 1 - Oshindonga-Ombiimbeli Ondjapuki 2008 bible

Jonah 1

¹Esiku limwe Omuwa okwa lombwele Jona yaAmittai.

²Okwa ti: “Inda kuNinive, oshilando shiyaka oshinene, u shi uvithile egeelo; ondi shi shi kutya aantu yasho aakaanakalunga.”

³Ihe Jona okwa thikama, a ye Omuwa ontuku. Okwa yi kuJoppa e ta mono osikepa yu uka kuSpania. Okwa landa otekete nokwa yi noonakulonga mosikepa, opo ya thayile yu uka kuSpania, nkoka ta ka kala kokule nOmuwa.

⁴Ihe Omuwa okwa tumu ombepo ondhigu mefuta, nomwa tukuluka oshikungulu oshinene sha hala okuteya po osikepa.

⁵Aathayili oya li ya tila nokehe ngoka okwa kugile kalunga ke ekwatho. Nena oyu umbu mo ofulaha okukeelela oshiponga. Manga taye shi ningi, Jona okwa yi e ta lala meniinii lyosikepa nokwa li mokati koomposi.

⁶Kapitiya gwosikepa okwe mu mono e ta ti kuye: “Oshike to kotha ashike? Penduka, u kugile kalunga koye ekwatho. Pamwe ote tu sile ohenda nota hupitha oomwenyo dhetu.”

⁷Aathayili oya lombwelathana ya ti: “Natu umbeni oshihogololitho, opo tu mone ngoka e na ondjo nokwe tu tula momupya nguka.” Sho ye shi ningi, osha kwata Jona.

⁸Onkee oya ti kuye: “Tu lombwela, olye e tu etithile omupya nguka. Ngoye oto ningi shike mpano? Oto zi peni? Ngoye omukwashike koshigwana?”

⁹Jona okwa yamukula: “Ongame Omuhebeli. Ohandi simaneke Omuwa, Kalunga komegulu, ngoka a shiti evi nefuta.”

¹⁰Jona okwe ya hokololele wo kutya ota fadhuka po Omuwa. Aathayili oya li ya sa uumbanda noye mu pula: “Omolwashike to pumbwa okufadhuka po ngeyi?”

¹¹Oshikungulu osha li sha lundalala ethimbo alihe. Onkee aathayili oye mu pula: “Otatu ku ningi ngiini, tu loteke oshikungulu?”

¹²Jona okwa yamukula: “Umbilii ndje mefuta, notali loto. Ondi shi shi kutya ombedhi oyandje, sho mwa adhika koshikungulu shi thike mpa.”

¹³Oonakulongamo oya kambadhala okufala osikepa komunkulo noya dhugu nomatha gawo agehe. Ihe oshikungulu osha dhenge noonkondo, noinaa vula okuhuma ko.

¹⁴Onkee oya kugile Omuwa ya ti: “Omuwa, otatu ku galikana, ino tu ethela meyonuko omolwomwenyo gwomulumentu nguka. Omuwa, owa longo ngaashi wa dhiladhila.”

¹⁵Nena oya kutha Jona e taye mu umbile mefuta, olyo nolya loto nziya.

¹⁶Shika osha halutha aathayili unene okutila Omuwa, noye mu yambele omayambo noyu uvaneke oku mu longela.

¹⁷Palombwelo lyOmuwa, ohi onene oya nina po Jona, nokwa kala mela lyayo omasiku gatatu, uusiku nomutenya.