Read Oshindonga-Ombiimbeli Ondjapuki 2008 Numbers 10 Bible Online

Numbers 10 - Oshindonga-Ombiimbeli Ondjapuki 2008 bible

Numbers 10

¹Omuwa okwa lombwele Moses ta ti:

²“Ihambulithila omankuma gaali goshisiliveli ga hambulikika gokwiithana egongalo li gongale, opo mu tembuke moontanda.

³Ewi lyomankuma agehe gaali shampa lyu uvika, egongalo alihe nali gongale posheelo shetsalihangano.

⁴Ihe ngele enkuma limwe alike tali hikwa, nena aawiliki yomazimo naa gongalele pungoye.

⁵Uuna omankuma taga hikwa momadhengo omafupi, nena omazimo ngoka ge li kuuzilo, naga tembuke.

⁶Shampa taga hikwa olutiyali, nena omazimo gokuumbugantu naga tembuke. Omankuma nge taga hikwa, oontanda otadhi tembudhwa,

⁷ihe opo egongalo li ithanwe li gongale, omankuma oge na okuhikwa newi li ili.

⁸Omankuma ohaga hikwa kaayambi aana yaAaron. “Omautho ngaka oge na okudhigininwa komaluvalo geni aluhe sigo aluhe.

⁹Uuna mwa ponokelwa kaatondi moshilongo sheni, hikeni omankuma ga kuge onkugo yolugodhi. Ngame, Omuwa Kalunga keni, otandi mu kwatha notandi mu hupitha miikaha yaatondi yeni.

¹⁰Osho wo methimbo lyenyanyu — mOshituthi shomwedhi omupe nomiituthi yeni yilwe — omu na okuhika omankuma, sho tamu yamba omafikilondjambo nomakwatathanondjambo geni, nena otandi mu kwatha. Ongame Omuwa Kalunga keni.”

¹¹Mesiku etimilongombali lyomwedhi omutiyali gwomumvo omutiyali oshikogo osha yeluka po kombanda yetsalihangano.

¹²Aaisraeli noya tameke ondjenda yawo taa zi mombuga Sinai. Oshikogo osha kankama mombuga Paran.

¹³Oyo oya zi po palombwelo lyOmuwa, ngaashi e ya lombwelithitha Moses,

¹⁴noshaa ethimbo ya humu ko, oye shi ningi melandulathano limwe. Mboka ye li kohi yepandela lyoshitopolwa shaJuda, oya zi po tango, etanga netanga, mewiliko lyaNahshon yaAminadab.

¹⁵Netanel yaZuar okwa li ta wilike ezimo lyaIssaskar,

¹⁶naEliab lyaHelon oondyoka lyaSebulon.

¹⁷Etsalihangano sho lya dhikulwa po, aantu yoludhi lwaGerson nolwaMerari oya zi po ya humbata etsalihangano.

¹⁸Okwa landula ihe mboka ye li kohi yepandela lyoshitopolwa shaReuben taa ende etanga netanga mewiliko lyaElizur lyaShedeur.

¹⁹Shelumiel yaSurishaddai okwa li ta wilike ezimo lyaSimeon,

²⁰naEljasaf lyaDeuel okwa li ta wilike ezimo lyaGad.

²¹Opo ihe Aalevi yoludhi lwaKohat oya landula ko ya humbata iinima iiyapuki. Manga inaa thika kontanda ompe, etsalihangano olya adhika lya dhikwa nale.

²²Okwa landula mboka ye li kohi yepandela lyoshitopolwa shaEfraim, etanga netanga, mewiliko lyaElishama lyaAmmihud.

²³Gamaliel yaPedazur okwa li ta wilike ezimo lyaManasse,

²⁴naAbidan yaGidoni okwa li ta wilike ezimo lyaBenjamin.

²⁵Hugunina, mongundu yokugamena aatembuki konima okwa li mboka yokohi yepandela lyoshitopolwa shaDan ya piti mo etanga netanga mewiliko lyaAhiezer yaAmmishaddai.

²⁶Pagiel yaOkran okwa li ta wilike ezimo lyaAser,

²⁷naAhira yaEnan okwa li ta wilike ezimo lyaNaftali.

²⁸Ndika olyo elandulathano lyokuza moontanda etanga netanga, Aaisraeli sho taa thigi po oontanda e taa tembuka.

²⁹Moses okwa lombwele suwala ye Hobab yaJetro Omumidiana ta ti: “Otu li pokuthika kehala ndyoka Omuwa a ti ote li tu pe. Okwa uvaneke a laleke Israel nuuyamba, onkee ila tu yeni pamwe, notatu ka topoleni oshihakanwa.”

³⁰Hobab okwa yamukula a ti: “Aawe, ngame ondi na okushuna kevi lyetu nokoyaandjetu.”

³¹Moses okwa ti: “Tu kwatha tuu, waa tu thige po, oshoka ongoye wa tseya nawa ombuga noto vulu oku tu ulukila mpoka tatu yungile oontanda.

³²Ngele otatu yeni, nena omayambeko agehe ngoka Omuwa te ke tu yambeka nago, otatu ke ga topoleni.”

³³Aantu sho ya zi puSinai, ondundu yOmuwa, oye ende omasiku gatatu. Oshikethahangano shOmuwa oshe ya tetekelele, opo shi ya monene ehala lyokuyunga oontanda.

³⁴Ethimbo kehe taa zi montanda, oshikogo shOmuwa osha tengelele kombanda yawo omutenya.

³⁵Shampa oshikethahangano sha thikama shi ye, Moses oti igidha ta ti: “Omuwa, yambuka: halakanitha aatondi yoye nou kondjithe mboka ye ku tonde.”

³⁶Uuna tashi kankama, oti igidha ta ti: “Omuwa, galuka, u ye koongundu dhomayuvi ogendji dhAaisraeli.”