Read Oshindonga-Ombiimbeli Ondjapuki 2008 Numbers 11 Bible Online

Numbers 11 - Oshindonga-Ombiimbeli Ondjapuki 2008 bible

Numbers 11

¹Aantu oya tameke okungungutulila Omuwa omolwomaudhigu. Omuwa sho e ya uvu, okwa geye, nomulilo gwOmuwa ogwa yaka mokati kaantu. Ogwa hwama mokati kawo e tagu lungunitha po oontanda dhokooha.

²Aantu oya kugile Moses ekwatho; oye okwa galikana Omuwa, omulilo nogwa dhimi.

³Ehala ndyoka olya lukwa Tabera, oshoka omulilo gwOmuwa ogwa li gwa hwama mokati kawo.

⁴Okwa li ku na aakwiilongo mokati kAaisraeli. Oya li ye na omwamwa gwonyama, nAaisraeli yo yene oya tameke okungungutula taa ti: “Akwetu, olye te tu pe onyama tu lye?

⁵MuEgipiti otwa li hatu li oohi, ngaashi twa hala, dho inadhi futwa nando osha. Otatu dhiladhila okatanga kombihu, ookanuwa, oomboganyanga, oonyanga noonyalanyanga.

⁶Ihe ngashingeyi otwa loloka, oshoka kape na sha shokulya kape na sha shilwe, omanna owala aluhe!”

⁷(Omanna oya li ya fa oombuto oonshona oontokeleshunga.

⁸Aantu oya yi ko noye yi toola, ye yi tsu koshini e taye yi teleke mombiga e taye yi anda omakaka.

⁹Oya li yi na omulyo gwa fa oshikwiila she elelwa momagadhi gooholivi. Omume sho ya gwile moontanda, nomanna oya gwile mo wo.)

¹⁰Moses okwa uvu aantu taa ngungutula yo ya thikama moongundu piiyelo yomatsali gawo. Ondjahi yOmuwa noya hwama, naMoses wo okwa li u uvite nayi.

¹¹Moses okwa ti kOmuwa: “Omolwashike wa hindi ndje? Omolwashike inoo sila ndje ohenda? Omolwashike wa pe ndje omutenge gwaantu mbano ayehe?

¹²Hangame nde ya shita, hangame nde ya vala ndishi! Omolwashike to ti nandi ya yamuthe noku ya humbata momaako ya fa uuhanona noku ya fala kevi ndyoka we li uvanekele ootatekulu nokugana?

¹³Onyama otandi yi adha peni yokuliwa kaantu ayehe mbano? Oshoka otaa lilile ndje taa ti: ‘Tu pa onyama tu lye.’

¹⁴Itandi vulu we okwiihumbatela aantu mbaka ongame awike, oya tona ndje.

¹⁵Ngele osho to ningi ndje ngaaka, sila ndje ohenda u dhipage ndje, opo ndaa kale we muudhigu u thike mpaka.”

¹⁶Omuwa okwa lombwele Moses a ti: “Gongaleka aalumentu omilongo heyali ya simana ya talwa oyo aawiliki yoshigwana. Ya eta kungame posheelo shetsalihangano e to ya lombwele, ya thikame pamwe nangoye.

¹⁷Otandi ka kulukila pohi e tandi popi nangoye notandi kutha ombepo mombepo ndjoka nde ku pa e tandi yi tula muyo. Nena otaye ku kwatha mokuhumbata omutenge gwaantu mbaka, opo waa gu humbate ngoye awike.

¹⁸Ngashingeyi lombwela aantu to ti: ‘Iyapuleni omolwesiku lyangula; otamu ka mona onyama mu lye. Omuwa okwe mu uvu, sho tamu mu thiminike tamu ti: Otwa hala onyama tu lye! MuEgipiti otwa li nawa. Ngashingeyi Omuwa ote ke mu pa onyama, one nomu na oku yi lya.

¹⁹Omu na oku yi lya, hasiku limwe nenge omasiku gaali nenge gatano nenge omulongo nenge omilongo mbali nokuli,

²⁰aawe, omwedhi aguhe, sigo tayi pitile momayulu notayi mu kungitha. Shika otashi ningwa, oshoka omwe ekelehi Omuwa, ngoka e li mokati keni, nomwe mu ngungutulile tamu ti ando otwa kalele nani muEgipiti.’ ”

²¹Moses okwa ti kOmuwa: “Otandi enditha aantu 600 000, noto ti oto ya pe onyama ya gwana omwedhi.

²²Oku na tuu oongombe, iikombo noonzi dha gwana dhi dhipagwe, opo ya kute? Nenge oohi adhihe dhomefuta tadhi ya gwanene?”

²³Omuwa okwa yamukula a ti: “Oshikaha shOmuwa oshifupi nani? Oto ke shi tala, ngele shoka nda popi, otashi gwanithwa nenge aawe!”

²⁴Moses okwa piti mo e ta lombwele aantu shoka Omuwa a popi. Okwa gongaleke aawiliki omilongo heyali e te ya tula momukunkulo gwetsalihangano.

²⁵Omuwa okwa kulukile pohi e li moshikogo e ta popi naye. Okwa kutha ombepo mombepo ndjoka a pele Moses e te yi tula maawiliki omilongo heyali. Ombepo sho ye ya lambele, oya tameke okuhunganeka, ihe inashi kala olule.

²⁶Aawiliki yaali yomomilongo heyali, Eldad naMedad, oya li ya thigala montanda yo inaa ya kosheelo shetsalihangano. Ombepo ye ya lambelele montanda noya tameke okuhunganeka.

²⁷Omugundjuka gumwe okwa matuka a ka lombwele Moses shoka Eldad naMedad taa ningi.

²⁸Nena Josua yaNun, ngoka a kala omuyakuli gwaMoses okuza kuugundjuka we, okwa nukile moohapu ta lombwele Moses ta ti: “Tatekulu, ya ganda!”

²⁹Moses okwa yamukula a ti: “Owa sila ndje efupa? Ngame onda hala, Omuwa a pe aantu ayehe ombepo, ya hunganeke!”

³⁰Opo ihe Moses naawiliki Aaisraeli omilongo heyali oya shuna moontanda.

³¹Omuwa okwa pepitha ombepo ya zi kefuta ye etelele iimote e tayi tengele oondja mbali kombanda yontanda. Iimote oya lambele montanda nomudhingoloko gwayo oshinano shesiku limwe.

³²Aantu oya tameke okukwata iimote. Oye yi kwata omutenya tuu ngoka aguhe, uusiku auhe nesiku lya landula. Ngoka a kwata iishona, oye ngoka a kwata oondoloma omulongo nayimwe. Oye yi aneke nontanda ayihe, opo yi kukute.

³³Onyama manga yi li momakana gawo, ondjahi yOmuwa oya hwamene aantu e tayi ya tukulile elega mokati kawo.

³⁴Ehala ndyoka olya lukwa Kibrot Taava (kokutya Oombila dhomwamwa), molwashoka omo ya fumvike aantu mboka ya li ye na omwamwa gwonyama.

³⁵Aantu oya tembuka muKibrot-Taava ya yi kuHazerot e taa lumbu ko.