Read Oshindonga-Ombiimbeli Ondjapuki 2008 Numbers 20 Bible Online

Numbers 20 - Oshindonga-Ombiimbeli Ondjapuki 2008 bible

Numbers 20

¹Momwedhi gwotango egongalo alihe lyAaisraeli olye ya mombuga Zin e tali yungu ontanda muKadesh. Miriam okwa mana oondjenda e ta fumvikwa.

²Mpoka ya yungu ontanda, kapwa li omeya, aantu noya gongalele Moses naAaron

³noya tamanana ya ti: “Akutu, osha li oshihwepo, ando twa sile komeho getsalihangano pamwe nooyakwetu, sho ya yonukile po koshipala shOmuwa.

⁴Omolwashike mwe tu etele mombuga muno? Otu sile mo niimuna yetu?

⁵Omolwashike mwe tu tembudha mo muEgipiti mu tu ete meha ndino ewiwiwiwi noihamu mene nando osha? Mwaa na iilya nomwaa na oonkwiyu, mwaa na omandjembele nomwaa na oondunga dhomigranati. Nokuli kamu na omeya gokunwa!”

⁶Moses naAaron oya zi mokati kaantu e taa thikama posheelo shetsalihangano. Oya tsu iipala yawo mevi, neadhimo lyOmuwa olye ya adhimine.

⁷Omuwa okwa lombwele Moses e ta ti:

⁸“Kutha ondhimbo, ithana omumwanyoko Aaron e tamu gongaleke egongalo alihe. Montaneho yalyo alihe lombwela emanya, nomeya otaga tsipuka mo. Pahedhi ndjika oto kutha omeya memanya ga nuwe kaantu nokiimuna.”

⁹Moses okwa yi nokwa kutha ondhimbo, ngaashi Omuwa e mu lombwele.

¹⁰Pamwe naAaron oya gongaleke egongalo alihe pemanya, naMoses okwa ti: “Pulakeneni, ne aatangalali! Natu mu kuthile omeya memanya ndika?”

¹¹Moses okwa yelutha ondhimbo e ta dhenge nayo emanya lwaali, nomwa tsipuka omeya ogendji, aantu niimuna noya nu mo.

¹²Omuwa okwa ganda Moses naAaron e ta ti: “Molwaashoka ne kamu na eitaalo lya gwana okwiinekela oonkondo dhandje montaneho yAaisraeli, itamu ya fala we mevi ndyoka nde ya uvanekele tandi li ya pe.”

¹³Shika osha ningwa puMeriba, mpoka Aaisraeli ya tamaneke Omuwa naampoka i iholola kuyo kutya oye omuyapuki.

¹⁴MuKadesh Moses okwa tumu aatumwa ya ye komukwaniilwa gwaEdom taa ti: “Elaka ndika olya zi kaakweni, omazimo gaIsrael. Owa tseya nkene twa talithwa omalwa,

¹⁵sho ootatekulu ya yi kuEgipiti, nkoka twa kala omimvo odhindji. Aegipiti oya hepeke ootatekulu noonkondo,

¹⁶otse notwa kugile Omuwa ekwatho. Oku uvu onkugo yetu e ta tumu omuyengeli, ngoka e tu tembudha muEgipiti. Ngashingeyi otu li muKadesh, oshilando shi li pongamba yoshilongo shoye.

¹⁷Tu kwatha, u tu pitikile tu tokole oshilongo shoye. Otse niimuna yetu itatu zi mo mondjila tu ye momapya goye nenge miitsambe yomiviinu dhoye, noitatu nu momithima dhoye. Otatu kala mondjila, sigo twa pitilile oshilongo shoye.”

¹⁸Ihe omukwaniilwa gwaEdom okwa yamukula a ti: “Itamu pitikwa okutokola oshilongo shandje! Ngele tamu shi yelekele, otatu ya tu mu tsakaneke tu na egongamwele.”

¹⁹Aaisraeli oya ti: “Otatu kala mondjila, nongele tatu nu omeya geni nenge iimuna yetu tayi ga nu, otatu futu. Otwa hala owala tu pite mo.”

²⁰Omukwaniilwa gwaEdom okwe ya yamukula a ti: “Aawe, ndati!” Aaedom oya piti mo ya homata noya ponokele Aaisraeli.

²¹Molwaashoka Aaedom inaa pitika Aaisraeli ya tokole oshilongo shawo, Aaisraeli oya shuna e taa yi nondjila yilwe.

²²Egongalo alihe lyAaisraeli olya zi muKadesh e tali thiki pondundu Hor,

²³pongamba yaEdom. Oko Omuwa a lombwele Moses naAaron a ti:

²⁴“Aaron ita yi mevi ndyoka ndu uvaneke tandi li pe Israel; ota si, oshoka ne yaali omwa tindi oshipango shandje puMeriba.

²⁵Kutha Aaron nomwana Eleasar, mu londe kondundu Hor,

²⁶naankoka to hula Aaron oonguwo dhe dhuuyambi e to dhi zaleke Eleasar. Aaron ota ka sila ko.”

²⁷Moses okwa ningi, ngaashi Omuwa e mu lombwele. Oya londo kondundu Hor montaneho yegongalo alihe,

²⁸naMoses okwa hula Aaron oonguwo dhuuyambi e te dhi zaleke Eleasar. Aaron nokwa sile kondungu yondundu, Moses naEleasar oya galuka ko ya kulukile pohi.

²⁹Egongalo alihe olya koneke kutya Aaron a mana oondjenda, olyo nolye mu lili oosa omasiku omilongo ndatu.