Read Oshindonga-Ombiimbeli Ondjapuki 2008 Numbers 21 Bible Online

Numbers 21 - Oshindonga-Ombiimbeli Ondjapuki 2008 bible

Numbers 21

¹Ano omukwaniilwa Omukaanani gwaArad muumbugantu waKaanan sho a kundana kutya Aaisraeli otaa ya nondjila yokuAtarim, okwe ya matukile e ta kwata po yamwe oonkwatwa.

²Nena Aaisraeli oya ningi euvaneko kOmuwa ya ti: “Ngele oto tu sinditha aantu mbaka, otatu ku yapulile nokugana iilando yawo.

³Omuwa okwe ya uvu e te ya kwatha okusinda Aakanaan. Aaisraeli noye ya hanagula po niilando yawo, nehala ndyoka oye li luku Horma.”

⁴Aaisraeli oya zi po pondundu Hor taa ende nondjila yu uka kEkololo lyaAkaba, opo ya dhingoloke oshilongo shaEdom. Ihe mondjila aantu oya kanitha eidhidhimiko lyawo

⁵noya tamaneke Kalunga naMoses ya nyenyeta ya ti: “Omolwashike mwe tu tembudha muEgipiti, tu sile mombuga muno? Muka kamu na iikulya nenge omeya. Iikulya mbino yomukaga otwe yi kenyanana!”

⁶Nena Omuwa okwa tumu omayoka ge na uuzigo mokati kaantu, nAaisraeli oyendji oya lika noya si.

⁷Aantu oye ya kuMoses noya ti: “Otwa yono, sho twa popi twa tsa ondumbo nOmuwa nonangoye. Galikana Omuwa, a kuthe mo omayoka mokati ketu.” Moses nokwa galikanene aantu.

⁸Omuwa okwa lombwele Moses a hambule eyoka e li endjeleleke koshiti, opo shaa ngoka a lika e li tale ye a kale nomwenyo.

⁹Moses okwa hambula eyoka lyoshikushu e te li endjeleleke koshiti. Shaa ngoka a lika e ta tala keyoka lyoshikushu, okwa kala nomwenyo.

¹⁰Aaisraeli oya tembuka po e taa ka yunga oontanda puObot.

¹¹Sho ya zi po, oya ka yunga oontanda pomakulukuma gaAbarim, mombuga yokuuzilo woshilongo Moab.

¹²Opo ihe oya yungu oontanda molusilu Sered.

¹³Okuza nkoka oya tembudha ishewe e taa ka yunga oontanda kombinga yuumbangalantu womulonga Arnon, mombuga ndjoka ya tsa koshilongo shAayamori. (Arnon ogwa li ongamba pokati kAamoabi nAayamori.)

¹⁴Omolwashoka mEmbo lyehingo lyiita yOmuwa mwa tiwa: “…oshilando Vaheb moshikandjo Sufa nomasilu; omulonga Arnon

¹⁵nomasilukila gomasilu ga adha koshilando Ar nokuuka kongamba yaMoab.”

¹⁶Okuza hoka oya yi keha hali ithanwa Beer, ogwo omuthima ngoka Omuwa a lombwele Moses ta ti: “Gongaleka aantu, ndi ya pe omeya.”

¹⁷Pethimbo ndyoka Aaisraeli oyi imbi eimbilo ndika taa ti: “Muthima ngoye, vivila omeya; tse otatu ku kundu nokwiimba.

¹⁸Omuthima ogwa hupwa kaana yokombanda, gwa yuulwa kaakuluntu yoshigwana. Oya hupu nondhimbo yuukwaniilwa, oya panda nomapanda gawo.” Oya zi mombuga yu uka kuMattana.

¹⁹Okuza kuMattana oyu uka kuNahaliel nokuza kuNahaliel oyu uka kuBamot.

²⁰Okuza kuBamot oyu uka kolusilu lwoshilongo shAamoabi, ponyonga yondundu Pisga, ndjoka ya tumbalala mombuga.

²¹Aaisraeli oya tumu aatumwa kuSihon, omukwaniilwa gwAayamori, nelaka tali ti:

²²“Tu pitika tu tokole moshilongo shoye. Otse niimuna yetu itatu zi mondjila tu ye ando momapya goye nenge miitsambe yoye yomiviinu, noitatu nu nando omeya momithima dhoye, otatu kala owala mondjila, sigo twa tokola oshilongo shoye.”

²³Ihe Sihon ina pitika Aaisraeli ya taaguluke oshilongo she. Okwa hiya iita e ta zi mo a yi kuJahas mombuga e ta ponokele Aaisraeli.

²⁴Aaisraeli oya dhipaga aantu oyendji e taa lala po evi lyawo okuza komulonga Arnon sigo okuJabbok, tashi ti sigo evi lyAayammoni, oshoka ongamba yAayammoni oya li ya gamenwa noonkondo.

²⁵Osho ngaaka Aaisraeli ya lala iilando ayihe yAayamori, mwa kwatelelwa mo Heshbon nomikunda dhe shi kunduka e taa kala mo.

²⁶Heshbon osha li oshilandopangelo shomukwaniilwa gwAayamori Sihon, ngoka a kondjitha omukwaniilwa gwonale gwaMoab e ta yugu ko evi lye sigo okomulonga Arnon.

²⁷Omolwashoka aatoti yiitewo taa ti: “Ileni kuHeshbon, koshilando shomukwaniilwa Sihon! Otwa hala tu shi tale tashi tungululwa notashi ningwa oshipe.

²⁸Oshoka muHeshbon omwa zi omulilo, ondalu yanelyanga moshilando shaSihon. Oya lungunike po oshilando Ar muMoab nokulatha po omitumbo puArnon.

²⁹Memekukwee, ne Aamoabi! Ne aalongeli yaKemosh, omwa hanagulwa po! Kalunga keni okwe etha aantu ye, ya ninge oontauki, naakulukadhi ya ninge oonkwatwa dhomukwaniilwa gwAayamori.

³⁰Ihe ngashingeyi oluvalo lwawo olwa yonwa po, okuza kuHeshbon ndongo oDibon, okuza kuNashim sigololo Nofak popepi naMedeba.”

³¹Aaisraeli oya tula moshilongo shAayamori,

³²naMoses okwa tumu aalumentu ya ka ndaadhe Jaser. Aaisraeli oye shi kwata po nomikunda dhe shi kunduka e taa tidha mo Aayamori mboka ya li mo.

³³Opo ihe Aaisraeli oya galuka noya lamba ondjila yokuBaasha. Og, omukwaniilwa gwaBaasha, okwa piti mo naakwiita ye e te ya ponokele puEdrei.

³⁴Omuwa okwa lombwele Moses a ti: “Ino mu tila. Otandi mu gandja miikaha yoye, aantu ye ayehe noshilongo she. Mu ningila, ngaashi wa ningile Sihon, omukwaniilwa gwAayamori ngoka a pangele muHeshbon.”

³⁵Aaisraeli oya dhipaga Og, oyana aamati naantu ye ayehe, noinaa etha pu hupe ngoka e na omwenyo, e taa lala oshilongo she.