Read Oshindonga-Ombiimbeli Ondjapuki 2008 Numbers 22 Bible Online

Numbers 22 - Oshindonga-Ombiimbeli Ondjapuki 2008 bible

Numbers 22

¹Aaisraeli oya tembuka po e taa ka yunga oontanda molushandja lwaMoab kuuzilo waJordan ontega naJeriko.

²Balak yaZippor, omukwaniilwa gwaMoab, sho a kundana shoka Aaisraeli ya ningile Aayamori nonkene Aaisraeli ye li po oyendjiyendji,

³oye pamwe naantu ye oya sholola.

⁴Aamoabi oya lombwele aawiliki yAamidiana ya ti: “Engathithi ndika otali tu mana po ongondumetana tayi gugula po omwiidhi omutalala komaunapelo.” Omukwaniilwa Balak

⁵okwa tumu aatumwa ya ka tale Bileam yaBeor, ngoka a li muPetor popepi nomulonga Eufrat mevi lyoyaandjawo Amaw, ye mu lombwele ya tye: “Onda hala ndi ku tseyithile kutya muEgipiti omwa zi oshigwana oshindji, aantu yasho oya andjalala apehepehe notaa hala okukwata po evi lyetu.

⁶Otaye tu nyenge okuyalula. Tu kwatha ano, u ye u ya lile ndje muumpulile. Pamwe tatu vulu oku ya sinda noku ya tidha mo mevi lyetu. Ondi shi shi kutya shaa to tomonene omuntu eyambeko, ota kala a yambekwa, naangoka to mu tomonene etulomutima, ota kala a tulwa omutima.”

⁷Aawiliki Aamoabi naawiliki Aamidiana oya faalele iikahu kuBileam e taye mu lombwele etumwalaka lyaBalak.

⁸Bilean okwe ya lombwele e ta ti: “Laleni mpaka, ongula otandi mu lombwele shoka Omuwa a lombwele ndje.” Aawiliki Aamoabi noya tokelwa puBileam.

⁹Kalunga okwe ya kuBileam e ta ti: “Aalumentu mboka ya tokelwa pungoye, oolye?”

¹⁰Bileam okwa yamukula a ti: “Balak yaZippor, omukwaniilwa gwaMoab, oye e ya tumu kungame, ya lombwele ndje

¹¹kutya aantu ya tembuka muEgipiti, oya siikila oshilongo ashihe. Nokwa hala ndi ye mu lile muupulile, opo a wape oku ya kondjitha noku ya tidha po.”

¹²Kalunga okwa ti kuBileam: “Ino ya nando naantu mboka ngoye ino tula Aaisraeli omutima, oshoka oyo aalalekwa nuuyamba.”

¹³Ongula sho kwa shi, Bileam okwa yi kaatumwa yaBalak e ta ti: “Shuneni kevi lyeni, Omuwa okwa tindi okuzimina ndje ndi ye nane.”

¹⁴Oyo noya shuna kuBalak e taye mu lombwele kutya okwa tindi ko.

¹⁵Nena Balak okwa tumununa ko aawiliki oyendji noya simana ye vule mbeyaka yotango.

¹⁶Oya yi kuBileam e taye mu pe elaka lyaBalak yaZippor tali ti: “Inapa kala shoka tashi ku dhike waa ye kungame.”

¹⁷Otandi ke ku futa ondjambi onene notandi ningi shaa shoka to lombwele ndje. Kwatha ndje u ye u lile ndje aantu mbaka muumpulile.

¹⁸Bileam okwa yamukula a ti: “Balak nando na pe ndje oshisiliveli noshingoli shu udha egumbo lye, itandi vulu okutaaguluka elaka lyOmuwa Kalunga kandje nando okashona.

¹⁹Kwathii ndje mu lale mpaka ongulohi ndjika, opo ndi koneke shoka Omuwa ta lombwele ndje.”

²⁰Kalunga okwe ya kuBileam uusiku tuu mbwiyaka e ta ti: “Aalumentu mbaka ngele oye ya kungoye ye ku ile, inda ano nayo, ihe longa ashike shoka tandi ku lombwele.”

²¹Ongula sho kwa shi, Bileam okwa kutile okasino ke e ta yi naawiliki Aamidiana.

²²Kalunga okwa geele Bileam, sho a yi. Bileam okwa kayile okasino ke a thindikilwa kaamati ye yaali, nomuyengeli gwOmuwa okwa thikama mondjila a keelele ondjila ye.

²³Okasino sho ka mono omuyengeli a thikama mondjila a yedha egongamwele, oka peguka mo mondjila ku uka mepya. Bileam okwa dhenge okasino e te ka galulile mondjila.

²⁴Nena omuyengeli gwOmuwa okwa humu ko e ta ka thikama pothina pokati kiitsambe yomiviinu ya gumbilwa omankolo gomakuma.

²⁵Okasino sho ka mono omuyengeli, oki iwegenyene kekuma e taka thengenyene ko ompadhi yaBileam. Bileam okwe ka dhengulula.

²⁶Omuyengeli okwa humu ko ishewe e ta thikama pokuma pwaa na ompito yokuhenukila kolulyo nenge kolumoho.

²⁷Okasino sho ka mono omuyengeli, oka tsu po oongolo. Bileam okwa geye e ta dhenge okasino noshitago.

²⁸Nopo mpoka Omuwa okwa makula okana kwokasino e taka ti kuBileam: “Onde ku ningi shike? Omolwashike wa dhenge ndje lutatu?”

²⁹Bileam okwa yamukula a ti: “Omolwashoka wa tala ndje egoya! Ando nda li ndi na egongamwele, ando otandi ku dhipaga.”

³⁰Okasino oka yamukula ka ti: “Kandi shi okasino koye ho kayile ndje noshito? Onde ku ningile nale ngawo?” Bileam okwa yamukula a ti: “Aawe!”

³¹Omuwa okwa tonatitha omeho gaBileam e ta mono omuyengeli a thikama e na egongamwele; naBileam okwi iyundulile pevi koshipala shomuyengeli.

³²Omuyengeli okwa pula a ti: “Omolwashike wa dhenge okasino koye lutatu? Onde ya ndi ku keelele mondjila yoye, oshoka kakwa li u na okuya molweendo nduka.

³³Okasino koye oka mono ndje, noka peguka ndje lutatu. Ando oka li inaake shi ninga, ando nde ku dhipaga, ihe ando ko onde ka etha ka kale ke na omwenyo.”

³⁴Bileam okwa yamukula a ti: “Onda yona. Inandi shi tseya kutya omo u li mondjila to keelele ndje, ihe ngashingeyi ngele ino hala ndi tsikile nondjila yandje, otandi shuna kegumbo.”

³⁵Omuyengeli okwa ti: “Inda ngaa naalumentu mbaka, ihe popya ashike shoka tandi ku lombwele u shi popye.” Bileam nokwa yi naantu yaBalak.

³⁶Balak sho ku uvu kutya Bileam ote ya, okwa yi e ke mu tsakaneke puAr, oshilando shi li pomulonga Arnon pongamba yaMoab.

³⁷Balak okwa ti kuBileam: “Omolwashike inoo ya, sho nde ku tuminine lwotango? Oto dhiladhila kutya ite vulu oku ku futa ondjambi ya gwana?”

³⁸Bileam okwa yamukula a ti: “Ngashingeyi onde ya, ihe ondi na oonkondo dhashike? Ote vulu owala okupopya shoka Kalunga ta lombwele ndje ndi shi popye.”

³⁹Bileam nokwa yi naBalak kuKirjat Huzot,

⁴⁰nkoka Balak a tselele oongombe noonzi e ta pe Bileam naawiliki mboka a li nayo onyama.

⁴¹Ongula sho kwa shi, Balak okwa kutha Bileam e te mu fala kondungu yondundu Bamot Baal pombanda, mpoka ta vulu okumona ombinga yimwe yAaisraeli.