Read Oshindonga-Ombiimbeli Ondjapuki 2008 Numbers 24 Bible Online

Numbers 24 - Oshindonga-Ombiimbeli Ondjapuki 2008 bible

Numbers 24

¹Ngashingeyi Bileam sho a ndhindhilike kutya Omuwa nani okwe mu hala a yambeke Aaisraeli, ina anekela we, ngaashi ha ningi shito. Okwa pungululile oshipala she kombuga

²e ta mono Aaisraeli ye li moontanda omazimo nomazimo. Ombepo yaKalunga oye mu lambele,

³e ta totomona ehunganeko lye ta ti: “Bileam yaBeor, popya; omulumentu gwomeho ga tonata, uvitha!

⁴Ndika ehunganeko lyomuuvi gwoohapu dhaKalunga, lyanakumona omamoniko gOmunankondoawike nolyomukakuki ngoka e na omeho ga tonata:

⁵Omatsali goye, Jakob, ogo opala ngiini! Oonkalelo dhoye, Israel, odha poleka ngiini!

⁶Odha andjalala dha fa omalusilu gomeya, odha fa iitsambe pooha dhomulonga, odha fa omandombo ga tsikwa kOmuwa nenge omisedeli pooha dhomeya.

⁷Omeya otaga kungulukile miiyuma yawo. Otaa kunu oombuto dhawo momapya ga tosima. Omukwaniilwa gwawo omunene e vule Agag, nelelo lye olya taandela nolya yeluka.

⁸Kalunga okwe ya tembudha muEgipiti; oku ya lile po a fa ooniga dhonyati. Otaa ka nyanyagula aatondi yawo, taye ya teyagula omasipa notaye ya yaha niikuti.

⁹Otaa hundjunine notaa ka lala ya fa onkoshi, ongonime onyali; olye te ya pendutha? Ngoka te ku yambeke, Israel, ota yambekwa, ihe ngoka te ku thingi, ota thingwa.”

¹⁰Nena Balak okwa geele Bileam. Okwa dhenge iikaha ye kumwe e ta lombwele Bileam ta ti: “Onde ku ithana u ye u lile ndje aatondi yandje muumpulile, ihe peha lyasho owe ya laleke nuuyamba lutatu nokuli.

¹¹Shuna kaandjeni! Onda li ndu uvaneke tandi ku futu, ihe Omuwa okwe ku keelele okutaamba ondjambi.”

¹²Bileam okwa yamukula a ti: “Onda lombwele aatumwa mboka wa tumine kutya

¹³nando u pe ndje iisiliveli ayihe niingoli ayihe yu udha egumbo lyoye, itandi pandakana noshipango shOmuwa, ndi ninge sha mungame mwene. Otandi popi owala shoka Omuwa ta lombwele ndje, ndi shi popye.”

¹⁴Bileam okwa ti kuBalak: “Ngashingeyi otandi shuna koyaandjetu, ihe manga inaandi ya, otandi ku lombwele shoka Aaisraeli taa ka ningila aantu yoye monakuyiwa.”

¹⁵Okwa totomona ehunganeko lye a ti: “Bileam yaBeor, popya; omulumentu gwomeho ga tonata, uvitha!

¹⁶Ndika ehunganeko lyomuuvi gwoohapu dhaKalunga, lyanakutseya uunongo waanguka Gwokombandambanda, nolyaangoka ha mono omamoniko gOmunankondoadhihe:

¹⁷Ondi mu wete, ihe hangashingeyi, otandi mu ligamene, ihe hapopepi. Onyothi otayi piti muJakob, ondhimbo yuukwaniilwa otayi yeluka muIsrael. Oye ta nyanyagula po aawiliki yaMoab, nota kombo po oluvalo aluhe lwaSet.

¹⁸Ota sindi aatondi ye muEdom e ta lala evi lyawo Seir, ihe Israel ota nkondopala aluhe.

¹⁹MuJakob otamu zi omupangeli, nota kombo po mboka ya hupile ko.”

²⁰Bileam okwa mono wo Amalek nokwa totomona ehunganeko lye a ti: “Amalek oye oshigwana oshinankondo shotango, ihe ehulilo lyasho olyo ekano lyasho.”

²¹Sho a mono Aakeni, okwa totomona ehunganeko lye a ti: “Oonkalelo dhoye odha gamenwa, odhi li puule pemanya ngoshihandhila shontsa.

²²Ihe ne Aakeni otamu ka hanagulwa po. Assur ote mu fala muupika.”

²³Bileam okwa tsikile okutotomona kwe a ti: “Yayee, akwetse, olye ta kala nomwenyo, Kalunga ngele ta gwanitha mbika?

²⁴Aayendifuta otaa zi kombinga yaKipro. Otaa teya po Assur naEber, ihe nayo wo otaa ka yonuka po thilu.”

²⁵Bileam sho a mana, okwa thikama e ta shuna kaandjawo, naBalak wo okwa yi nondjila ye.