Read Oshindonga-Ombiimbeli Ondjapuki 2008 Numbers 25 Bible Online

Numbers 25 - Oshindonga-Ombiimbeli Ondjapuki 2008 bible

Numbers 25

¹Aaisraeli sho ya kala muShittim, aantu oya hondele naakadhona Aamoabi,

²mboka ye ya hiya kiituthi yomasaagelo. Aaisraeli oya li iikulya yawo noyi inyongamene kiikalunga yawo.

³Aaisraeli sho ya simaneke ngeyi Baal, oshikalunga shaPeor, Omuwa okwe ya geele

⁴e ta ti kuMoses: “Kutha aawiliki yAaisraeli ayehe, u ya tule kohake montaneho yaantu, opo ondjahi yOmuwa yokugeela Israel yi lote.”

⁵Moses okwa lombwele aatokolihapu yaIsrael a ti: “Kehe gumwe gwomune oku na okudhipaga omuntu ngoka a ningi omulongeli gwaBaal Peor.”

⁶Omulumentu gumwe Omuisraeli okwa kutha omufuko Omumidiana e te mu fala ketsali lye montaneho yaMoses negongalo alihe lyaIsrael, manga ya li taa lilile posheelo shetsalihangano.

⁷Omuyambi Pinehas yaEleasar, omutekulu gwaAaron, sho e shi mono, okwa thikama a zi moshigongi. Okwa kutha egonga

⁸e ta landula omulumentu ngoka e na omufuko sigo ometsali e te ya tsu negonga ayehe yaali, Omuisraeli nomufuko Omumidiana. Pahedhi ndjika elega ndyoka lya yono po Aaisraeli, olya kodha,

⁹ihe olya faalele nokuli aantu 24 000.

¹⁰Omuwa okwa lombwele Moses e ta ti:

¹¹“Molwoshinima shoka sha ningwa kuPinehas, itandi kala we nda geela Aaisraeli. Okwa tindi okwiidhidhimikila okusimaneka iikalunga, nomolwashoka inandi ya yonagula po ayehe.

¹²Lombwela Pinehas kutya otandi dhike ehangano naye, ndyoka tali kala aluhe sigo aluhe.

¹³Oye noluvalo lwe tandi ya langeke ya ninge aayambi sigo aluhe, molwashoka okwa kodhilile esimano lyaKalunga ke e te etele aantu edhimopo lyomayono gawo.”

¹⁴Edhina lyOmuisraeli ngoka a dhipagelwa pamwe nomufuko Omumidiana, oSimri yaSalu, omukuluntu gwegumbo mezimo lyaSimeon.

¹⁵Edhina lyomufuko Omumidiana oKosbi yaSur; he okwa li omukuluntu gwongundu yomaludhi gAamidiana.

¹⁶Omuwa okwa lombwele Moses a ti:

¹⁷“Ponokela Aamidiana, opo u ya hanagule po,

¹⁸omoluuwinayi mboka ye mu ningile, sho ye mu kotokele puPeor nomolwaKosbi, ngoka a dhipagwa pethimbo lyelega puPegor.”