Read Oshindonga-Ombiimbeli Ondjapuki 2008 Numbers 28 Bible Online

Numbers 28 - Oshindonga-Ombiimbeli Ondjapuki 2008 bible

Numbers 28

¹Omuwa okwa lombwele Moses a ti:

²“Lombwela Aaisraeli u tye: ‘Seni oshimpwiyu, mu yambele ndje iikulya mbyoka tayi opalele ndje.’

³Ya lombwela kutya ondjambo ndjoka ye na okweetela Omuwa, oyo ndjika: oonzigona mbali oondumentu dhomumvo gumwe dhaa na oshipo nadhi ninge efikilondjambo lyesiku kehe.

⁴Onzigona yimwe nayi yambwe ongula, nontiyali ongulohi,

⁵shaa ndjoka pamwe noograma mbali dhuusila womunziya wa pilulilwa molita yimwe yomagadhi gooholivi.

⁶Ndika olyo efikilondjambo lyesiku kehe lya yambelwa lwotango pondundu Sinai, li gandje ezimba lya nika nawa lyo opalela Omuwa.

⁷Oshinuwandjambo pamwe nonzigona tashi tililwa koshiyambelo, osho olita yimwe yomaviinu.

⁸Ongulohi otaku yambwa onzigona, ngaashi naanaa pwa ningilwe ongula, pamwe nondjambo yiikunuwa, yi gandje ezimba lya nika nawa lyo opalela Omuwa.”

⁹“Mesiku lyEsabati otamu yambwa oonzigona mbali dhomumvo gumwe dhaa na oshipo, pamwe niikulyandjambo yuusila womunziya woolita ne netata wa pilulilwa momagadhi gooholivi, nondjambo yomaviinu.

¹⁰Efikilondjambo ndika oli na okuyambwa Esabati kehe, mwa gwedhwa efikilondjambo lyoshito nondjambo yalyo yomaviinu.”

¹¹“Yambeleni Omuwa efikilondjambo petameko lyomwedhi kehe: oonzigona mbali oondumentu, onzi yimwe ondumentu noonzigona heyali oondumentu dhomumvo gumwe dhaa na oshipo.

¹²Pamwe nongombe ondumentu kehe yamba ondjambo yiikulya yuusila womunziya woograma hamano netata wa pilulilwa momagadhi gooholivi; pamwe nonzi ondumentu yamba uusila womunziya woograma ne netata wa pilulilwa momagadhi gooholivi,

¹³nokonzigona kehe oograma mbali dhuusila womunziya wa pilulilwa momagadhi gooholivi. Ndika olyo efikilondjambo li na ezimba lya nika nawa lyo opalela Omuwa.

¹⁴Kongombe ondumentu kehe oku na okukala ondjambo yomaviinu goolita mbali, konzi ondumentu olita yimwe noshititano nokonzigona kehe olita yimwe. Ndika olyo efikilondjambo lyomwedhi omupe kehe momumvo.

¹⁵Kakele kefikilondjambo lyesiku kehe noshinuwandjambo shalyo yamba ondjondjambo yoshikombo shimwe oshilumentu.”

¹⁶“Momwedhi gwotango esiku etimulongo netine olyo Opaasa yOmuwa.

¹⁷Mesiku etimulongo netitano oshituthi otashi tameke tashi kala omasiku gaheyali; momasiku ngoka otamu liwa iikwiila inaayi tulwa efulika.

¹⁸Mesiku lyotango lyoshituthi otamu gongala kelongelokalunga, noitaku longwa nando.

¹⁹Yambeleni Omuwa efikilondjambo lyoongombe mbali oondumentu, onzi ondumentu noonzigona heyali oondumentu dhomumvo gumwe dhaa na oshipo.

²⁰Yambeni ondjambo yiikulya yuusila womunziya woograma hamano netata wa pilulilwa momagadhi gooholivi kongombe kehe, oolita ne netata konzi kehe

²¹noolita mbali konzigona kehe.

²²Yambeni wo oshikombo oshilumentu shi ninge ondjondjambo. Pahedhi ndjika otamu gwanitha eyelithoyapulo lyoshigwana.

²³Yambeni mbika ya gwedhela kefikilondjambo lyongulohi kehe.

²⁴Pamukalo nguka yambeleni Omuwa oondjambo dhiikulya momasiku agehe gaheyali, ezimba lya nika nawa lye mu opalela. Dhi yambeni mwe dhi gwedha kefikilondjambo lyesiku kehe nokoshinuwandjambo shalyo.

²⁵Mesiku etiheyali gongaleni kelongelokalunga, ihe inamu longa sha.”

²⁶“Mesiku lyoshipe, uuna tamu yambele Omuwa ondjambo yiilya iipe mOshituthi shoshiwike, gongaleni kelongelokalunga ne inamu longa sha.

²⁷Eteleni Omuwa omitanda mbali, onzi ondumentu noonzigona heyali dhomumvo gumwe dhaa na oshipo, dhi ninge efikilondjambo li na ezimba lya nika nawa tali mu opalele.

²⁸Komutanda kehe yambeni ondjambo yiikulya yuusila womunziya woograma hamano netata wa pilulilwa momagadhi gooholivi, oolita ne netata konzi kehe

²⁹noolita mbali konzigona kehe.

³⁰Yambeni wo oshikombo oshilumentu okugwanitha eyelithoyapulo lyoshigwana.

³¹Yambeni oondjambo ndhika mwe dhi gwedha kefikilondjambo lyesiku kehe nokiikulyandjambo.”