Read Oshindonga-Ombiimbeli Ondjapuki 2008 Numbers 29 Bible Online

Numbers 29 - Oshindonga-Ombiimbeli Ondjapuki 2008 bible

Numbers 29

¹“Mesiku lyotango lyomwedhi omutiheyali omu na okugongala kelongelokalunga, noitaku longwa sha. Esiku ndyoka omankuma naga hikwe.

²Yambeleni Omuwa efikilondjambo, ezimba lya nika nawa lye mu opalela: omutanda gumwe, onzi yimwe ondumentu noonzigona heyali dhomumvo gumwe dhaa na oshipo.

³Yambeni wo ondjambo yalyo yiikulya, uusila womunziya wa pilulilwa momagadhi gooholivi: oograma hamano netata pamwe nomutanda, oograma ne netata pamwe nonzi ondumentu

⁴noograma mbali pamwe nonzigona kehe.

⁵Yambeni wo oshikombo oshilumentu shi ninge ondjondjambo, opo mu gwanithe eyelithoyapulo lyoshigwana.

⁶Gwedheni oondjambo ndhika kefikilondjambo lyomwedhi omupe nondjambo yalyo yiikulya nokefikilondjambo lyesiku kehe nondjambo yalyo yiikulya niikunuwa. Odho oondjambo dhi na ezimba lya nika nawa tali opalele Omuwa.”

⁷“Gongaleni kelongelokalunga mesiku etimulongo lyomwedhi omutiheyali; idhilikeni iikulya ne inamu longa sha.

⁸Yambeleni Omuwa efikilondjambo, ezimba lya nika nawa lye mu opalela: omutanda gumwe, onzi yimwe ondumentu noonzigona heyali oondumentu dhomumvo gumwe dhaa na oshipo.

⁹Yambeni wo ondjambo yalyo yiikulya, uusila womunziya wa pilulilwa momagadhi gooholivi: oograma hamano netata pamwe nomutanda, oograma ne netata pamwe nonzi ondumentu

¹⁰oograma mbali pamwe nonzigona kehe.

¹¹Kakele koshikombo sheyelithoyapulo lyoshigwana nefikilondjambo lyesiku kehe pamwe nondjambo yalyo yiikulya niikunuwa, yambeni wo oshikombo oshilumentu shi ninge ondjondjambo.”

¹²“Gongaleni kelongelokalunga mesiku etimulongo netitano lyomwedhi omutiheyali. Dhaneni oshituthi mokusimaneka Omuwa omasiku gaheyali noitamu longo sha.

¹³Mesiku lyotango yambeleni Omuwa efikilondjambo lyiikulya, ezimba lya nika nawa tali mu opalele: omitanda omilumentu omulongo nandatu, oonzi oondumentu mbali noonzigona oondumentu omulongo nane dhomumvo gumwe dhaa na oshipo.

¹⁴Yambeni wo ondjambo yiikulya yuusila womunziya wa pilulilwa momagadhi gooholivi: oograma hamano netata pamwe nomutanda kehe, oograma ne netata pamwe nonzi kehe

¹⁵oograma mbali pamwe nonzigona kehe.

¹⁶Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

¹⁷“Mesiku etiheyali yambeni omitanda omilumentu omulongo nambali, oonzi oondumentu mbali noonzigona oondumentu omulongo nane dhomumvo gumwe dhaa na oshipo.

¹⁸Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.

¹⁹Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

²⁰“Mesiku etitatu yambeni omitanda omilumentu omulongo nagumwe, oonzi oondumentu mbali noonzigona oondumentu omulongo nane dhomumvo gumwe dhaa na oshipo.

²¹Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.

²²Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

²³“Mesiku etine yambeni omitanda omilumentu omulongo, oonzi oondumentu mbali noonzigona oondumentu dhomumvo gumwe omulongo nane dhaa na oshipo.

²⁴Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.

²⁵Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

²⁶“Mesiku etitano yambeni omitanda omilumentu omugoyi, oonzi oondumentu mbali noonzigona oondumentu dhomumvo gumwe omulongo nane dhaa na oshipo.

²⁷Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.

²⁸Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

²⁹“Mesiku etihamano yambeni omitanda omilumentu hetatu, oonzi oondumentu mbali noonzigona oondumentu dhomumvo gumwe omulongo nane dhaa na oshipo.

³⁰Pamwe nomitanda, oonzi oondumentu noonzigona, yambeni wo oondjambo dhiikulya niikunuwa pamiyalu dhadho, ngaashi kwa uthwa.

³¹Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

³²“Mesiku etiheyali yambeni omitanda omilumentu heyali, oonzi oondumentu mbali noonzigona oondumentu dhomumvo gumwe omulongo nane dhaa na oshipo.

³³Pamwe nomitanda, oonzi oondumentu noonzigona yambeni wo oondjambo dhiikulya niikunuwa pamiyalu dhadho, ngaashi kwa uthwa.

³⁴Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.

³⁵“Mesiku etihetatu gongaleni kelongelokalunga, noitamu longo sha.

³⁶Yambeleni Omuwa efikilondjambo, ezimba lya nika nawa tali mu opalele: omutanda gumwe, onzi yimwe ondumentu noonzigona heyali oondumentu dhomumvo gumwe dhaa na oshipo.

³⁷Pamwe nomutanda, onzi ondumentu noonzigona, yambeni wo oondjambo dhiikulya niikunuwa pamiyalu dhadho, ngaashi kwa uthwa.

³⁸Kefikilondjambo lyesiku kehe pamwe nondjambo yalyo yiikulya niikunuwa gwedhii ko oshikombo oshilumentu shi ninge ondjondjambo.”

³⁹Ngaka ogo omautho kombinga yomafikilondjambo, oondjambo dhiikulya, oondjambo dhiikunuwa nomakwatathanondjambo ngoka mu na okuyambela Omuwa miituthi yeni. Koondjambo ndhika otaku gwedhwa oondjambo dhomauvaneko noondjambo ndhoka tadhi yambwa pahalo lyomuntu mwene.

⁴⁰Moses okwa lombwele Aaisraeli ayihe mbyoka Omuwa e mu lombwele.