Read Oshindonga-Ombiimbeli Ondjapuki 2008 Numbers 3 Bible Online

Numbers 3 - Oshindonga-Ombiimbeli Ondjapuki 2008 bible

Numbers 3

¹Ezimo lyaAaron naMoses olyo ndika, uuna ndoka Omuwa a popi naMoses kondundu Sinai.

²Aaron okwa li e na oyana aamati yane; oyo Nadab, osheeli, Abihu, Eleasar naItamar.

³Oya li ya gwayekwa noya yapulwa ya ninge aayambi,

⁴ihe Nadab naAbihu oya dhipagwa, sho ya yambele Omuwa mombuga Sinai omulilo gwaa shi omuyapuki. Kaya li ye na aanona, onkee Eleasar naItamar oya longo oshilonga shuuyambi muuyuni wahe Aaron.

⁵Omuwa okwa lombwele Moses a ti:

⁶“Hedhitha huka Aalevi, u ya langeke aayakuli yomuyambi Aaron.

⁷Naa longe iilonga tayi pumbiwa metsalihangano yo ya yakule omuyambi Aaron negongalo alihe.

⁸Naa tonatele iikwaniipangitho ayihe metsalihangano e taa longo peha lyAaisraeli.

⁹Aaisraeli naa gandje Aalevi, opo ya yakule Aaron noyana.

¹⁰Ihe Aaron noyana oto ya langeke miilonga yuuyambi. Ngele oku na gulwe ta kambadhala oku ya holela, na dhipagwe.”

¹¹Omuwa okwa lombwele Moses a ti:

¹²“Ngashingeyi Aalevi oyandje. Sho nda dhipaga aatango yAayegipiti, osheeli shomegumbo kehe lyomuIsrael onde shi iyapulile, nosheeli shoshimuna kehe. Ngashingeyi peha lyokukala niisheeli yomuIsrael ondi na Aalevi; oyo oyandje. Ongame Omuwa.”

¹³

¹⁴Omuwa okwa lombwele Moses mombuga Sinai,

¹⁵a yalule Aalevi pamaludhi nopamagumbo gawo nokunyola omulumentu kehe gwomwedhi gumwe nenge e vule po.

¹⁶Moses okwe shi ningi.

¹⁷Levi okwa li e na oyana aamati yatatu: Gerson, Kohat naMerari, mboka ya li oohekulu yomaludhi ngoka ge ya lukilwa. Gerson okwa li e na oyana aamati yaali: Libni naShimei. Kohat okwa li e na oyana aamati yane: Amram, Izhar, Hebron naUssiel. Merari okwa li e na oyana aamati yaali: Mahli naMushi. Oyo ya li oohekulu yomaludhi ngoka ge ya lukilwa.

¹⁸

¹⁹

²⁰

²¹MuGerson omwa zi ezimo lyaLibni nolyaShimei. Mbaka Aakwagerson.

²²Omwaalu gwawo aguhe gwaalumentu yomwedhi gumwe naamboka ye vule po, ogwa li 7 500.

²³Oludhi nduka olwa li halu yungu ontanda kuuninginino konima yetsalihangano

²⁴pamwe naEljasaf lyaLael, omukuluntu gwoludhi.

²⁵Oya li ye na oshimpwiyu shotenda, omasiikilo gayo, eshigolapi lyayo,

²⁶omalapi gehale lyetsalihangano, eshigolapi lyoposheelo shehale, oshiyambelo noongodhi dhehale. Oya li ye na oshimpwiyu shomayakulo agehe ge na ekwatathano niinima mbika.

²⁷MuKohat omwa zi ezimo lyaAmram, lyaIzhar, lyaHebron nolyaUssiel. Mbaka Aakwakehat.

²⁸Omwaalu gwawo aguhe gwaalumentu yomwedhi gumwe naamboka ye vule po, ogwa li 8 600.

²⁹Oludhi nduka olwa li halu yungu ontanda kuumbugantu wetsalihangano

³⁰pamwe naElisafan lyaUssiel, omukuluntu gwoludhi.

³¹Oya li aanashimpwiyu yoshikethahangano, oshitaafula, oshihukikwanyeka, iiyambelo, iikwaniipangitho mbyoka hayi longithwa kaayambi melongelokalunga, netopolitho tali yoolola Ehala lyUuyapuki kEhala lyUuyapukielela. Oya li ye na oshimpwiyu shomayakulo agehe ge na ekwatathano niinima mbika.

³²Omukuluntu gwAalevi okwa li Eleasar lyaAaron omuyambi. Oye a li ta tonatele ayehe mboka taa yakula metsalihangano.

³³MuMerari omwa zi ezimo lyaMahli nolyaMushi. Mbaka Aakwamerari.

³⁴Omwaalu gwawo aguhe gwaalumentu yomwedhi gumwe naamboka ye vule po, ogwa li 6 200.

³⁵Oludhi nduka olwa li halu yungu ontanda kuumbangalantu wetsalihangano pamwe naSuriel yaAbihail, omukuluntu gwoludhi.

³⁶Oya li ya pewa oshimpwiyu shiipilangi yokuthikameka etsalihangano, omalukambo, oongudhi, oompadhi niipumbiwa yalyo ayihe. Oya li ye na oshimpwiyu shomayakulo agehe ge na ekwatathano niinima mbika.

³⁷Oya sile wo oongundhi dhehale noompadhi, oongodhi noomboha dhadho oshimpwiyu.

³⁸Moses naAaron noyana oya li ye na okuyunga ontanda komeho getsalihangano lwokuuzilo. Oya li ye na oshimpwiyu shokutsakanitha omayakulo metsalihangano molwAaisraeli. Shaa ngoka gulwe te shi yelekele e shi ninge, oku na okudhipagwa.

³⁹Omwaalu gwaalumentu Aalevi ayehe kumwe yomwedhi gumwe naamboka ye vule po payalulo lyomaludhi lya ningwa palombwelo lyOmuwa, ogwa li 22 000.

⁴⁰Omuwa okwa lombwele Moses a ti: “Yalula aamati ayehe aatango yAaisraeli okuza kumboka yomwedhi gumwe naamboka ye vule po; kutha omwaalu gwomadhina gawo.

⁴¹Aalevi oye na okukala yandje peha lyaatango ayehe yAaisraeli, niimuna yAalevi otayi pingene po iimuna yAaisraeli. Ongame Omuwa.”

⁴²Moses okwa vulika nokwa yalula aamati ayehe aatango

⁴³yomwedhi gumwe naamboka ye vule po, nomwaalu gwawo aguhe ogwa li 22 273.

⁴⁴Omuwa okwa lombwele Moses a ti:

⁴⁵“Ngashingeyi yoololela ndje Aalevi ya ninge yandje peha lyaamati ayehe aatango yAaisraeli. Yoolola wo iimuna ayihe yAalevi peha lyiimuna ayihe iitango yAaisraeli.

⁴⁶Aatango mbaka 273 ye vule omwaalu gwAalevi ou na oku ya kulila ko.

⁴⁷Shaa ngoka ota gu iisiliveli itano pandjele yiimaliwa mbyoka hayi longithwa motempeli.

⁴⁸Gandja iimaliwa mbika yiikulila kuAaron noyana.”

⁴⁹Moses okwa kutha iimaliwa yiikulila yomwaalu gwaatango mboka ye vule omwaalu gwAalevi.

⁵⁰Okwa kutha iimaliwa iisiliveli 1 365

⁵¹e ta pe Aaron noyana ofuto yekulilo, ngaashi Omuwa e mu lombwele.