Read Oshindonga-Ombiimbeli Ondjapuki 2008 Numbers 31 Bible Online

Numbers 31 - Oshindonga-Ombiimbeli Ondjapuki 2008 bible

Numbers 31

²“Geelela Aamidiana shoka ya ningile Aaisraeli. Shampa we shi ningi, oto ka mana oondjenda.”

³Moses okwa lombwele oshigwana a ti: “Ilongekidhileni iita, opo mu ponokele Aamidiana mu ya geelele shoka ya ningile Omuwa.

⁴Mezimo kehe lyaIsrael namu ze aalumentu eyuvi ya ye kiita.”

⁵Aalumentu eyuvi oya hogololwa mezimo kehe, aalumentu ayehe kumwe omayuvi omulongo nagaali yi ilongekidhila olugodhi.

⁶Moses okwe ya tumu kiita mewiliko lyomuyambi Pinehas yaEleasar, ngoka ta tonatele iinima iiyapuki nomankuma gokukuga onkugo.

⁷Oya ponokele Midian, ngaashi Omuwa a lombwele Moses e taa dhipaga aalumentu ayehe,

⁸mwa kwatelelwa aakwaniilwa yatano yaMidian: Evi, Rekem, Sur, Hur naReba. Oya dhipaga wo Bileam yaBeor.

⁹Aaisraeli oya kwata po aakiintu naanona Aamidiana, oya kutha po oongombe, oonzi niikombo yawo e taa yugu po uuyamba wawo auhe.

¹⁰Oya fike po iilando nomagumbo gawo.

¹¹Oya kutha po iihakanwa ayihe mbyoka ye yi hakana, mwa kwatelelwa oonkwatwa niimuna,

¹²e taye yi eta kuMoses naEleasar nokegongalo lyAaisraeli, mboka ya li moontanda momalundu gaMoab puJordan ontega naJeriko.

¹³Moses, Eleasar naawiliki ayehe yegongalo oya piti mo moontanda, ya ka tsakaneke iita.

¹⁴Moses okwa geele aawiliki yiita, aakuluntu yeyuvi naakuluntu yethele mboka ya galuka kiita.

¹⁵Okwe ya pula a ti: “Omolwashike mwe etha aakiintu ayehe ya kale nomwenyo?

¹⁶Dhimbulukweni kutya aakiintu mbaka oyo mboka ya landula ondunge yaBileam puPeor noya pukitha oshigwana shi iteke Omuwa. Oyo tuu mboka ye etithile elega moshigwana shOmuwa.

¹⁷Dhipagii po uumati auhe naakiintu ayehe ya lalwa nayo,

¹⁸ihe ihupithileni aakadhonalela ayehe.

¹⁹Ngashingeyi amuhe mboka mwa ningi oontoni nenge mwa guma omidhimba, otamu kala pondje yoontanda omasiku gaheyali. Mesiku etitatu nometiheyali otamu iyelitha ne yene noonkwatwa dheni.

²⁰Yelitheni wo onguwo kehe yoshipa, iinima ayihe yomafufu giikombo nenge yiiti.”

²¹Omuyambi Eleasar okwa lombwele aantu mboka ya galuka kiita a ti: “Omautho ngaka Omuwa okwe ga pe Moses:

²²oshingoli, oshisiliveli, oshikushu, osheela oshiluudhe, otina, oshumbu

²³noshinima kehe tashi vulu okupita momulilo, shi pititheni momulilo, notashi kala oshiyelele; ihe nonando ongeyi, nashi yogwe tuu momeya. Ihe ayihe mbyoka itaayi vulu okupita momulilo, nayi pite tuu momeya.

²⁴Mesiku etiheyali yogeni oonguwo dheni; nena otamu kala mwa yogoka notamu pitikilwa okuya moontanda.”

²⁵Omuwa okwa lombwele Moses ta ti:

²⁶“One naEleasar naawiliki yalwe yegongalo omu na okuyalula shaa shoka sha kwatwa miita, oonkwatwa niimuna.

²⁷Topola, shoka sha hakanwa miitopolwa iyali yi thike pamwe, oshitopolwa shimwe oshaakwiita noshikwawo oshegongalo.

²⁸Moshitopolelwa shaakwiita kutha mo oshitimathelegatano shimwe shoonkwatwa, shoongombe, shuusino, shoonzi noshiikombo shi ninge oompale kOmuwa.

²⁹Dhi pa omuyambi Eleasar, dhi ninge omagano gOmuwa.

³⁰Moshitopolelwa shegongalo kutha mo oshitimilongontano shimwe shoonkwatwa, shoongombe, shuusino, shoonzi noshiikombo. Yi pa Aalevi mboka ye li mesiloshimpwiyu lyetsalihangano.”

³¹Moses neEleasar oya ningi, ngaashi Omuwa a ti.

³²Oshihakanwa, iihupe yeliko mbyoka aakwiita ye yi kwata po, oyo oonzi niikombo 675 000,

³³oongombe 72 000,

³⁴uusino 61 000

³⁵naantu mboka yomaakiintu inaa lala naalumentu ayehe kumwe 32 000.

³⁶Etata lyasho, oshitopolelwa shaamboka ya yile kiita, osho oonzi niikombo 337 500,

³⁷moka mwa zi oompale dhOmuwa, iimuna 675;

³⁸oongombe 36 000 mwaandhoka 72 odho oompale;

³⁹uusino 30 500, moka mwa zi oompale 61;

⁴⁰naantu 16 000, moka mwa zi oompale kOmuwa 32.

⁴¹Moses okwa gandja oompale komuyambi Eleasar, omagano ngoka gu uthilwa Omuwa, ngaashi Omuwa a lombwele Moses.

⁴²Oshitopolelwa shegongalo lyaIsrael shoka Moses a yoolola moshitopolelwa shaakwiita,

⁴³etata lyoshihakanwa ashihe, osho oonzi niikombo 337 000,

⁴⁴oongombe 36 000,

⁴⁵uusino 30 500

⁴⁶naantu 16 000.

⁴⁷Metata ndika lyegongalo Moses okwa kutha mo oshitimilongontano shimwe shoonkwatwa noshiimuna, ngaashi Omuwa a popi, e te yi pe Aalevi mboka ye li mesiloshimpwiyu lyetsalihangano.

⁴⁸Aawiliki yiita oya yi kuMoses

⁴⁹e taa ti: “Tatekulu, otwa yalula aakwiita mewiliko lyetu noinatu kanitha nando ogumwe.

⁵⁰Omolwashoka otatu eta uulenga woshingoli, uugondo wokomaako nowopiikesho, uulinga, uutenda womomakutsi nuulyenge womothingo mbyoka twa yugu ko. Otatu yi yambele Omuwa, tu popile oomwenyo dhetu koshipala shOmuwa, opo e tu gamene.”

⁵¹Moses naEleasar oya taamba oshingoli nuulenga auhe.

⁵²Oshingoli ashihe shoka aawiliki yiita ye shi gandja omagano kOmuwa, osha li oosekeli 16 750.

⁵³Aakwiita yowala oyi ipungulile iihakanwa yawo, inaa gandja sha.

⁵⁴Moses naEleasar oya tula oshingoli metsalihangano, opo Omuwa a gamene Israel.