Read Oshindonga-Ombiimbeli Ondjapuki 2008 Numbers 32 Bible Online

Numbers 32 - Oshindonga-Ombiimbeli Ondjapuki 2008 bible

Numbers 32

¹Omazimo gaReuben naGad oga li ge na iigunda iinene yiimuna. Ano sho ya mono kutya oshilongo Jaser naGilead osho opalela iimuna,

²oya yi kuMoses, Eleasar nokaawiliki yalwe yegongalo e taa ti:

³“Atarot, Dibon, Jaser, Nimra, Heshbon, Elale, Sibma, Nebo naBehon,

⁴evi ndika Omuwa e li kwatele Aaisraeli ye li lale, otali opalele iimuna, notse aaniimuna.

⁵Tu kwatha u tu pe evi ndika, li ninge eliko lyetu, tse twaa taaguluke we omulonga Jordan.”

⁶Moses okwa yamukula a ti: “Ongiini, ooyakweni ye na okukondja, manga ne tamu kala mpano?

⁷Otamu kumike ngiini Aaisraeli ya tokole Jordan, ya ye kevi ndyoka Omuwa e li ya pe?

⁸Osho naanaa sha ningilwe kooho, sho nde ya tumine muKadesh Barnea, ya ka ndaadhe evi.

⁹Oya yile sigo okesilu Eshkol e taa tala evi, ihe sho ya galuka, oya tyololokitha oshigwana shi ye kevi ndyoka Omuwa e li ya pe.

¹⁰Omuwa okwa li a geya esiku ndyoka e tu uvaneke nokugana ta ti:

¹¹‘Oshoka inaa inekela ndje, kape na gumwe gwomaalumentu mboka yomimvo omilongo mbali nenge ye vule po ya tembuka muEgipiti ta yi mevi ndyoka ndu uvanekele Abraham, Isak naJakob.

¹²Kaleb kaJefunne Omukenasi naJosua yaNun oyo ayeke mboka taa yi mo, oshoka oyi inekele Omuwa.’

¹³Omuwa okwa geele oshigwana e te shi endagulitha nombuga omimvo omilongo ne, sigo epipi ndyoka alihe lya pu po okusa.

¹⁴Ihe ngashingeyi ne otamu yi ishewe pehala lyooho, ne omahe gaayoni, otamu tukula ondjahi yOmuwa a geele Israel ishewe!

¹⁵Ngele ne Aareuben nAagad tamu tindi oku mu landula ngashingeyi, nena ote ethele oshigwana ashihe mombuga, none tamu pulwa ekano lyasho.”

¹⁶Oya hedha kuMoses e taa ti: “Tu zimina owala, tu dhikile iimuna yetu iigunda mpaka nokutungila aakiintu naana yetu iilando.

¹⁷Opo ihe otatu homata e tatu kwatele Aaisraeli ooyakwetu komeho molugodhi, sigo twe ya thikitha komathikilo gawo. Ihe aakiintu naana yetu ya kale mpaka miilandohote ya gamenwa kaantu yaamuka.

¹⁸Itatu galukile komagumbo getu, manga Aaisraeli ooyakwetu ayehe inaa taamba omaliko gawo gevi ndyoka ye na oku ga pewa.

¹⁹Tse itatu ka taamba nando oshitopolwa mokati kawo handiyaka yaJordan, oshoka otwa taamba ombinga yetu mpaka kuuzilo waJordan.”

²⁰Moses okwa yamukula a ti: “Ngele otamu ningi, ngaashi tamu ti, ilongekidhileni olugodhi mpaka koshipala shOmuwa.

²¹Aakwiita yeni naa tokole Jordan, opo mewiliko lyOmuwa ya ponokele aatondi yetu, sigo Omuwa e ya sindi

²²e taa kwata po evi. Konima yaambika otamu vulu okugaluka, oshoka omwa gwanitha oshinakugwanithwa sheni kOmuwa nokAaisraeli ooyakweni. Nena Omuwa ota ka zimina kutya evi ndika lyokuuzilo waJordan olyeni.

²³Ihe ngele itamu dhiginine euvaneko lyeni, otamu yono kOmuwa notamu ke shi mona.

²⁴Onkee ano tungeni iilando yeni niigunda yiimuna yeni, ihe gwanitheni euvaneko lyeni!”

²⁵Aagad nAareuben oya ti: “Tatekulu, otatu ningi, ngaashika wa ti.

²⁶Aakiintu naana yetu otaa kala muka miilando yaGilead, osho wo oongombe noonzi dhetu.

²⁷Ihe tse atuhe otatu yi kolugodhi mewiliko lyOmuwa. Otatu tokola Jordan tu ka kondje, ngaashika wa ti.”

²⁸Moses okwa gandja elaka komuyambi Eleasar, Josua nokaawiliki yalwe yaIsrael tali ti:

²⁹“Aagad nAareuben ngele otaa tokola Jordan yi ilongekidhila olugodhi mewiliko lyOmuwa, nokekwatho lyawo ngele otamu vulu okulala evi, nena ya peni evi lyaGilead li ninge eliko lyawo.

³⁰Ihe ngele itaa tokola Jordan noitaa yi molugodhi pamwe nane, nena oye na okutaamba oshitopolwa shawo muKaanan ngaashika ne.”

³¹Aagad nAareuben oya yamukula ya ti: “Tatekulu, tse otatu ningi, ngaashika Omuwa a ti.

³²Mewiliko lye otatu tokola Jordan tu ye kuKaanan kolugodhi, opo tu pewe eliko lyetu mpaka kuuzilo waJordan.”

³³Moses okwa gandja komazimo gaGad naReuben netatazimo lyaManasse oshilongo ashihe shomukwaniilwa gwAayamori Sihon noshomukwaniilwa gwaBaasha Og, pamwe niilando yasho nomikunda dhe yi kunduka.

³⁴Ezimo lyaGad olya tungulula iilandohote Dibon, Atarot, Aroer,

³⁵Atarot Shofan, Jaser, Jogbeha,

³⁶Bet Nimra naBet Haran.

³⁷Ezimo lyaReuben olya tungulula Heshbon, Elale, Kirjatajim,

³⁸osho wo Nebo, Baal Meon (omadhina gayo oga lundululwa) naSibma. Oya luku iilando ye yi tungulula omadhina omape.

³⁹Oludhi lwaMakir gaManasse olwa matukile evi lyaGilead e talu li sindi. Olwa tidha mo Aayamori mboka ya li mo.

⁴⁰Moses okwa gandja Gilead koludhi lwaMakir, nolwa kala mo.

⁴¹Jair gwomezimo lyaManasse okwa ponokele omikunda dhimwe nokwe dhi sindi e te dhi luku “Omikunda dhaJair.”

⁴²Nobak okwa matukile e ta lala Kenat nomikunda dhasho e te shi lukulula Nobak, e shi ilukile mwene.