Read Oshindonga-Ombiimbeli Ondjapuki 2008 Numbers 35 Bible Online

Numbers 35 - Oshindonga-Ombiimbeli Ondjapuki 2008 bible

Numbers 35

¹Molushandja lwaMoab pomulonga Jordan ontega naJeriko Omuwa okwa lombwele Moses a ti:

²“Lombwela Aaisraeli kutya momaliko ngoka taa pewa, naa pe mo Aalevi iilando yimwe yokukala mo nomaunapelo ge yi kunduka.

³Iilando mbyoka nayi ninge yAalevi, notaa kala mo. Omaunapelo otaga ningi giimuna yawo, oongombe noonzi niinamwenyo ayihe.

⁴Evi lyomaunapelo nali kale lya taandela okuza kedhingililokuma lyoshilando oondya 1 000 koombinga adhihe,

⁵opo pu kale ombine yoondja 2 000 lwoondja 2 000, noshilando shi li pondingandinga yayo.

⁶Mokati kiilando mbyoka tamu yi pe Aalevi, namu kale iilando ihamano yokwiigamena, moka omuntu ngoka a dhipaga mukwawo hanowina ta vulu okuya mo. Kakele kiilando mbika ya peni ishewe iilando yilwe omilongo ne niiyali

⁷yi na omaunapelo gayo, opo yi ninge omilongo ne niihetatu ayihe kumwe.

⁸Omwaalu gwiilando yAalevi mezimo kehe nagu uthwe komwaalu gwiilando moshitopolwa shalyo.”

⁹Omuwa okwa lombwele Moses e ta ti:

¹⁰“Lombwela Aaisraeli u tye: Shampa mwa tokola omulonga Jordan e tamu yi mevi lyaKaanan,

¹¹ihogololeleni iilando yokwiigamena, moka omuntu ta vulu okuholama, ngele a dhipaga mukwawo hanowina.

¹²Omo moka ta ka hupila, kaa dhipagwe kaakwawo yanakusa. Omuntu ngoka e na ondjo yedhipago, ina dhipagwa pwaa na ompangu tango.

¹³Hogololeni iilando ihamano,

¹⁴itatu okuuzilo waJordan niitatu omuKaanan.

¹⁵Mbika otayi kala iilando yegameno kOmuisraeli, omukwiilongo omukaleleli nge omuyeni kehe mokati keni, ngoka a dhipaga omuntu hanowina. Ota vulu okumatukila mo a holame.

¹⁶“Ngele oku na omuntu ta dhipaga mukwawo nomatati giiyela nenge nemanya nenge noshiti, oye omudhipagi gwowina; na dhipagwe.

¹⁹Omukwawo nakupula ombinzi yanakudhipagwa oku na uuthemba wokudhipaga omudhipagi. Ngele te mu mono, ne mu dhipage.

²⁰“Ngele oku na omuntu ta tondo mukwawo e te mu dhipaga noku mu ndwangulila pevi nenge e mu dhaadhiga nasha,

²¹nenge e mu thendula nongonyo, oku na ondjo yedhipago, nomuntu a tya ngaaka na dhipagwe. Omukwawo nakupula ombinzi oku na uuthemba woku mu dhipaga. Uuna te mu itsu, ne mu dhipage.

²²“Ihe ngele oku na omuntu ta dhipaga mukwawo hanowina ye ine mu tonda, sho e mu ndwangulile pevi nenge e mu dhaadhiga nasha,

²³nenge u umbu emanya ye ina lengalenga tango e ta dhipaga omuntu ngoka inaa dhiladhila nando e mu dhipage ye ke shi omutondi gwe,

²⁴egongalo nali pangule pokati kaangoka a dhipaga mukwawo nomukwawo nakupula ombinzi tali shi ningi pamautho ngaka.

²⁵Egongalo nali hupithe omudhipagi miikaha yomukwawo gwanakudhipagwa, nakupula ombinzi. Egongalo nali mu pitike, a shune koshilando shokwiigamena, nkoka a li a holama. Na kale hoka sigo okeso lyomuyambimukuluntu.

²⁶Omudhipagi ngele okwa zi moshilando shokwiigamena,

²⁷e ti itsuwa kunakupula ombinzi, ngoka te mu dhipaga, nena nakupula ombinzi ke na ondjo yasha.

²⁸Omudhipagi oku na okukala moshilando shokwiigamena sigo okeso lyomuyambimukuluntu, ihe konima yalyo ota vulu okushuna kaandjawo.

²⁹Omautho ngaka omu na oku ga dhiginina nomaluvalo geni miilongo yeni sigo aluhe.

³⁰“Omudhipagi ota vulu okumonika ondjo yeso, ngele ope na oonzapo mbali, onzapo yimwe inayi gwana okudhipagitha omudhipagi.

³¹Omudhipagi na dhipagwe. Ita vulu okuhenuka eyono lye a fute ondjo ye.

³²Ngele ope na omuntu ta yi ontuku koshilando shokwiigamena, ita ziminwa a fute ye a shune, manga omuyambimukuluntu inaa sa.

³³Ngele tamu shi ningi, otamu nyateke evi moka mu li mo. Ombinzi yedhipago otayi nyateke evi, nokape na eyelithoyapulo lyalyo lilwe, ombinzi ayike yaangoka a dhipaga.

³⁴Inamu nyateka evi moka mwa kala mo, oshoka ongame Omuwa nonda kala mokati kAaisraeli.”