Read Oshindonga-Ombiimbeli Ondjapuki 2008 Numbers 36 Bible Online

Numbers 36 - Oshindonga-Ombiimbeli Ondjapuki 2008 bible

Numbers 36

¹Aakuluntu yomagumbo moludhi lwaGilead yaMakir, omutekulu gwaManasse gaJosef, oya yi kuMoses nokaawiliki yalwe.

²Oya ti: “Omuwa okwe ku lombwele, u tendele Aaisraeli evi mokuumba iihogololitho. Okwe ku lombwele wo, u gandje eliko lyomukwetu Zelofhad koyana aakadhona.

³Ihe ngele taa hokanwa kaayeni, nena eliko otali yi komazimo omayeni, noshitendelwa shetu tashi ka shonopala.

⁴Momumvo gweligolo iinima sho tayi ka shuna kooyene yonale mboka ye yi landithile po, eliko lyaana aakadhona yaZelofhad otali ka kala kezimo hoka ya hokanwa, notatu li kanitha.”

⁵Moses okwa yamukula Aaisraeli nohapu yOmuwa a ti: “Shoka tashi pulwa kezimo lyaManasse, oshi li mondjila.

⁶Omuwa ota ti kutya aana aakadhona yaZelofhad oya mangulukila okuhokanwa kungoka ya hala, ihe ogwomezimo lyawo.

⁷Eliko lyOmuisraeli kehe nali kale mezimo lyahe lyaa ye kezimo ekwawo.

⁸Omukiintu kehe ngoka ta thigulula uuthiga mezimo lyontumba lyAaisraeli, oku na okuhokanwa komulumentu gwezimo ndyoka. Pahedhi ndjika Omuisraeli kehe oha thigulula oohekulu,

⁹nuuthiga itau zi we mezimo ndika nokuya kundiyaka. Ezimo kehe ohali dhiginine uuthiga walyo.”

¹⁰Aana aakadhona yaZelofhad oya ningi, ngaashi Omuwa a lombwele Moses.

¹¹Mahla, Tirza, Hogla, Milka naNoa, aana aakadhona yaZelofhad oya hokanwa po koohegona.

¹²Oya hokanwa komaludhi gezimo lyaManasse gaJosef, nuuthiga wawo owa kala mezimo lyoohe.

¹³Mbika oyo iipango nomautho ngoka Omuwa e ga pethitha Aaisraeli kuMoses molushandja lwaMoab puJordan ontega naJeriko.