Read Oshindonga-Ombiimbeli Ondjapuki 2008 Numbers 4 Bible Online

Numbers 4 - Oshindonga-Ombiimbeli Ondjapuki 2008 bible

Numbers 4

¹Omuwa okwa lombwele Moses naAaron a ti:

²“Yalula omwaalu gwAalevi yoludhi lwaKohat pamazimo nopamagumbo gawo,

³aalumentu ayehe yomimvo omilongo ndatu sigo omilongo ntano mboka ya gwana miilonga yeyakulo lyetsalihangano.

⁴Eyakulo lyawo olya kwatelela mo iinima iiyapukilela.

⁵“Uuna ontanda tayi tembudhwa, Aaron noyana naya ye metsalihangano e taa kutha mo etopolitho ye li siikile oshikethahangano.

⁶Naye shi siikile noshipa shongombefuta e taa yala ko onguwo ombulau kombanda nokuhwekela omitenge moonkogo.

⁷“Naa siikile oshitaafula shiikwiila iiyapuki nelapi embulau e taa tenteke ko iiyaha, iitsinino, uuyo womayambo niitenga yiinuwandjambo. Koshitaafula naku kale aluhe iikwiila iiyapuki.

⁸Naa siikile ayihe mbika nelapi etiligane e taa tula ko oshipa shongombefuta nokuhwekela omitenge moonkogo.

⁹“Naa kuthe onguwo ombulau e taa siikile nayo oshihukikwanyeka noolamba dhasho, iikonde yokutetitha omalapi goolamba, iikangwa yokutula mo omutoko gwokomalapi niikwatelwa yomagadhi gooholivi.

¹⁰Naye shi dhingile niikwaniipangitho yasho ayihe moshipa shongombefuta e taye shi tula piihumbatelo.

¹¹“Naa siikile oshiyambelo shoshingoli nelapi embulau e taa tula ko oshipa shongombefuta notaa hwekele mo omitenge.

¹²Naa kuthe iilongitho ayihe hayi longithwa metsalihangano, notaye yi dhingile melapi embulau e taye yi siikile noshipa shongombefuta noku yi tula piihumbatelo.

¹³Naa kuthe omutoko koshiyambelo e taye shi siikile nelapi etiliganembwilili.

¹⁴Naa tenteke ko iikwaniipangitho ayihe hayi longithwa poshiyambelo: iikangwa yomakala, iizigitho, iihupulo nuuyo. Naye yi siikile ihe noshipa shongombefuta e taa hwekele mo omitenge.

¹⁵Ontanda nge tayi tembuka, oludhi lwaKohat nalu humbate iinima iiyapuki, Aaron noyana shaa ya mana oku yi siikila niipumbiwa yayo ayihe. Oludhi lwaKohat inalu guma iinima iiyapuki, otaa ningi ya se. “Shika oshimpwiyu sholudhi lwaKohat, uuna etsalihangano tali tembuka.

¹⁶“Eleasar, omuna gwomuyambi Aaron, na sile etsalihangano oshimpwiyu nomagadhi gomoolamba, iitsinino, oondjambo dhiikulya, omagadhi gokugwaya noshaa shoka metsalihangano sha yapulilwa Omuwa.”

¹⁷Omuwa okwa lombwele Moses naAaron e ta ti:

¹⁸“Inamu pitika, oludhi lwaKohat

¹⁹lu dhipagwe po kokuhedha popepi niinima iiyapukilela. Opo shaa ningwe, Aaron noyana naa ye mo e taa pe omuntu kehe oshilonga she e taye mu lombwele shoka e na okuhumbata.

²⁰Ihe Aakwakehat ngele taa yi metsalihangano, ya tale aayambi nkene taa longekidhile iinima iiyapuki etembu, otaa si.”

²¹Omuwa okwa lombwele Moses a ti:

²²“Yalula wo omwaalu gwAalevi yoludhi lwaGerson pamazimo nopamagumbo,

²³aalumentu ayehe yomimvo omilongo ndatu sigo omilongo ntano mboka ya gwana okuyakula metsalihangano.

²⁴Eyakulo lyawo olyo okuhumbata iinima tayi landula:

²⁵etsalihangano, esiikilo lyalyo lyomeni, esiikilo lyokombanda lyiipa yoongombefuta, eshigolapi lyoposheelo,

²⁶omalapi noongodhi dhehale lya kunduka etsalihangano noshiyambelo, eshigolapi lyoposheelo shehale, niipumbiwa ayihe yokuthikameka iinima mbika. Naa gwanithe iilonga ayihe tayi pumbiwa miinima mbika.

²⁷Moses naAaron naa tale, nkene oludhi lwaGerson talu gwanitha iilonga yalwo ayihe notalu humbata shaa shoka talu pewa kuAaron noyana.

²⁸Iimpwiyu yoludhi lwaGerson mokuyakula metsalihangano oyo mbika; naye yi gwanithe mewiliko lyaItamar yaAaron omuyambi.”

²⁹Omuwa okwa lombwele Moses a yalule Aalevi yoludhi lwaMerari pamazimo nopamagumbo gawo,

³⁰aalumentu ayehe yomimvo omilongo ndatu sigo oyomilongo ntano mboka ya gwana okuyakula metsalihangano.

³¹Eyakulo lyawo olyo okuhumbata iipilangi, omalukambo, oongundhi noompadhi dhetsalihangano,

³²nosho wo oongundhi, oompadhi, oomboha noongodhi dhehale lya kunduka etsalihangano niipumbiwa yadho ayihe. Omulumentu kehe ota kala e na oshilonga shokuhumbata iinima yontumba.

³³Iimpwiyu yoludhi lwaMerari meyakulo metsalihangano oyo mbika; naye yi gwanithe mewiliko lyaItamar yaAaron omuyambi.

³⁴Palombwelo lyOmuwa Moses, Aaron naawiliki yegongalo oya yalula omaludhi gatatu gaLevi: Kohat, Gerson naMerari. Oye shi ningi pamazimo nopamagumbo gawo e taa yalula aalumentu ayehe yomimvo omilongo ndatu sigo oyomimvo omilongo ntano mboka ya gwana okuyakula metsalihangano. Omiyalu odho ndhika: Oludhi Omwaalu Kohat 2 750 Gerson 2 630 Merari 3 200 Kumwe 8 580

³⁵Omulumentu kehe okwa yalulwa, ngaashi Omuwa a lombwele Moses; nopalombwelo lyOmuwa lya pewa Moses, omulumentu kehe okwa pewa oshimpwiyu shokuhumbata.