Read Oshindonga-Ombiimbeli Ondjapuki 2008 Numbers 5 Bible Online

Numbers 5 - Oshindonga-Ombiimbeli Ondjapuki 2008 bible

Numbers 5

¹Omuwa okwa lombwele Moses a ti:

²“Aaisraeli naa tidhe mo moontanda shaa ngoka e na uuvu woshilundu nenge ngoka i ikwatitha oshidhila, sho a gumu omudhimba.

³Aantu mbaka ya nika oshidhila naa tidhwe mo, opo yaa nyateke oontanda moka nda kala mokati kawo.”

⁴Aaisraeli oya vulika e taye ya tidha mo moontanda.

⁵Omuwa okwa lombwele Moses a ti:

⁶“Lombwela Aaisraeli kutya ngele ope na omulumentu nenge omukiintu ti iteka Omuwa e ta yono komuntu mukwawo, ota kala e na ondjo.

⁷Oku na okuhempulula eyono lye e ta futu ongunga ye a gwedhela ko oshititano.

⁸Ihe omuntu ngoka a yono, ngele okwa si ye kee na omunezimo lyomekota gwokufutwa, ofuto nayi pewe Omuwa, yi ninge yomuyambi. Omufuti na gandje wo onzi ondumentu yehanganitho, ndjoka tayi dhimi po ondjo ye.

⁹Oshigandjwa kehe oshiyapuki Omuisraeli te shi etele Omuwa, otashi ningi shomuyambi ngoka e shi etelwa.

¹⁰Omuyambi kehe ota dhiginine omayambo e ga pewa.”

¹¹Omuwa okwa lombwele Moses a ti:

¹²“Lombwela Aaisraeli omautho moshinima sha tya ngeyi. Otashi vulika omukiintu ta kotokele omulume e ta yi komulumentu gulwe.

¹³Omulumentu nguka ota lala naye, ihe omukiintu ote shi holeke omulume. Kaku na wo ngoka e mu kwata onkankeka, nando ye mwene okwa yona shili.

¹⁴Omulume ngele ota kwatwa kuukodhi molweyono ndika, nenge ota kwatwa kuukodhi, nando omukadhi ina yona,

¹⁵ne mu fale komuyambi. Na fale wo ondjambo yomukadhi, yi thike pomakopi gaali guusila wiishokelya, ihe ina tula ko omagadhi nenge iitsinino, oshoka oyo ondjambo yuukodhi, ondjambo tayi dhimbulukitha eyono.

¹⁶“Omuyambi ne ete po omukiintu e te mu thikameke komeho goshiyambelo.

¹⁷Na tile omeya gamwe moshiyuma sheloya e ta kutha evi polupanda lwetsalihangano e te li tula momeya.

¹⁸Opo ihe na thikameke omukiintu koshipala shOmuwa nokuhwatununa omafufu gomukiintu e ta tula ondjambo yedhimbulukitho, kokutya ondjambo yuukodhi, peke lyomukiintu. Meke lyomuyambi omu na omeya omalulu gethingano.

¹⁹Omuyambi na ganithe omukiintu e ta ti kuye: ‘Ngele ino hondela, omeya gethingano itage ku etele oshiponga.

²⁰Ihe ngele owa hondela,

²¹nena Omuwa na thinge edhina lyoye mokati kooyakweni. Na thinge oshivalelo shoye shi ganye, nela lyoye li zinde.

²²Omeya ngaka gethingano naga ye mela lyoye, opo ge li zindike, noshivalelo shoye shi ganye.’ “Omukiintu na yamukule ta ti: ‘Otandi zimine; Omuwa na longe.’

²³“Konima yaambika omuyambi na nyole etulomutima ndika nokuyoga enyolo momeya gethingano.

²⁴Manga inaa nwetha omukiintu omeya gethingano,

²⁵omuyambi na kuthe ondjambo yuukodhi miikaha yomukiintu, ye ne yi dhugadhuge koshipala shOmuwa e te yi tula koshiyambelo.

²⁶Na kuthe mondjambo eke lyu udha lyuusila noku u lungunithila koshiyambelo. Hugunina na nwethe omukiintu omeya.

²⁷Ngele omukiintu okwa hondela, omeya otage mu ehameke; ela lye otali zindi, noshivalelo she tashi ihunyu mumwe. Ota kala omuthingwa mokati koyaandjawo.

²⁸Ihe ngele ke na ondjo, ita ningwa sha nota vulu okuvala.

²⁹“Ndjika ompango yuukodhi, omukiintu nge ta kotokele omulume e ta hondele.

³⁰Ngele omulumentu ta kwatwa kuukodhi e ta kodhilile omukadhi, na tule omukadhi koshipala shOmuwa, nomuyambi ni ipyakidhile naye pautho lyompango ndjika.

³¹Omulumentu na kale a manguluka kondjo, ihe omukiintu ngele oku na ondjo, na tegelele egeelo.”