Read Oshindonga-Ombiimbeli Ondjapuki 2008 Numbers 6 Bible Online

Numbers 6 - Oshindonga-Ombiimbeli Ondjapuki 2008 bible

Numbers 6

¹Omuwa okwa lombwele Moses nokwa ti:

²“Lombwela Aaisraeli u tye: Ngele ope na omulumentu nenge omukiintu ta gana egano lya sheywa, a ninge omunasiri noti iyapulile Omuwa,

³ni idhilike omaviinu nomalovu. Na kale itaa nu sha sha kolwa moomviinu nenge a lye omandjembele omatalala nenge goonganye.

⁴Ethimbo alihe manga e li muunasiri, ina lya sha sha za moomviinu, nando shi kale oonkenya nenge omayula gomandjembele.

⁵“Ethimbo alihe e li kohi yegano lyuunasiri, ina tetitha omafufu ge nenge e ga kulule. Okwa mangwa kegano ethimbo alihe ndyoka i iyapulila Omuwa; na ethe omafufu ge noombenzi dhe dhi koke.

⁶Omasiku agehe sho i iyapulila Omuwa, ke na okuhedha pomudhimba.

⁷Nando na kale ohe nenge yina a sa, nenge omumwayina omulumentu nenge omukiintu, ini ikwatitha oshidhila kuyo, oshoka endhindhiliko lyeiyapulo lye kuKalunga oli li komutse gwe.

⁸Ethimbo alihe manga e li muunasiri, okwa yapulilwa Omuwa.

⁹“Omafufu omayapuki gomunasiri ngele oga nyatekwa, molwashoka pe na omuntu a si ombaadhilila popepi naye, na tegelele omasiku gaheyali, opo a kulule omafufu ge noombenzi dhe; osho ngeyi ta ka kala a yogoka.

¹⁰Mesiku etihetatu ne ete oonguti mbali nenge uungutyona uyali komuyambi posheelo shetsalihangano.

¹¹Omuyambi na yambe yimwe yi ninge eyonondjambo, nonkwawo yi ninge efikilondjambo, opo a gwanithe eitheto lye pamusindilo molwekwatathano lye nomudhimba. Esiku tuu ndyoka omuntu na yapule omafufu ge,

¹²ye a tamekulule okwiiyapulila Omuwa ethimbo lye alihe lyuunasiri. Ethimbo lyonale itali yalulwa we, oshoka okwa kwatitha omafufu ge oshipwe. Na yambe ondjondjambo yonzigona yomumvo gumwe.

¹³“Uuna omunasiri ta tsakanitha euvaneko lye, na gwanithe omisindilo. Na ye kosheelo shetsalihangano

¹⁴e te etele Omuwa iimuna itatu yaa na oshipo: onzigona ondumentu yomumvo gumwe omolwefikilondjambo, onzigona onkiintu yomumvo gumwe omolwondjondjambo nonzi ondumentu omolwekwatathanondjambo.

¹⁵Ne ete wo ontungwa yi na iikwiila inaayi tulwa efulika: iikwiila ya mbumbwakana ya ningwa nuusila womunziya wa lungilwa momagadhi gooholivi, uukwiila wa pepuka wa gwayekwa omagadhi gooholivi nondjambo yiikulya niikunuwa pamwe niimuna mbyoka.

¹⁶“Ayihe mbika omuyambi ne yi ete koshipala shOmuwa, ye a yambe ondjondjambo nefikilondjambo.

¹⁷Na yambele Omuwa onzi ondumentu omolwekwatathanondjambo te yi yamba pamwe nontungwa yiikwiila yaa na efulika; na yambe wo ondjambo yiikulya niikunuwa.

¹⁸Omunasiri na kululithe omutse gwe posheelo shetsalihangano, nomafufu ge ne ga umbile momulilo ngoka tagu lungunitha po ekwatathanondjambo.

¹⁹“Shampa oshooko shonzi sha pi mombiga, omuyambi ne shi kuthe pamwe noshikwiila shimwe sha mbumbwakana, e te yi tula peke lyomunasiri.

²⁰Omuyambi ne yi dhungadhungithe koshipala shOmuwa. Oyo ondjambo ondjapuki tayi ningi yomuyambi, pamwe nondete noshilama shonzi, mbyoka tayi ningi yomuyambi pampango. Konima yaambika omunasiri ota pitikwa a nwe omaviinu.

²¹“Ndjika oyo ompango yaanasiri, ihe omunasiri ngele ota gandja euvaneko tali pitilile shoka egano lye tali pula, na tsakanithe shili euvaneko ndyoka.”

²²Omuwa okwa lombwele Moses a ti:

²³“Lombwela Aaron noyana kutya mokuyambeka Aaisraeli oye na okutya ngeyi:

²⁴Omuwa ne ku laleke nuuyamba ye ne ku gamene.

²⁵Omuwa ne ku yelithile oshipala she ye ne ku sile ohenda.

²⁶Omuwa ne ku taalelithile oshipala she ye ne ku pe ombili.”

²⁷Osho ngeyi naa tumbulile Aaisraeli edhina lyandje, ngame notandi ya yambeke.