Read Oshindonga-Ombiimbeli Ondjapuki 2008 Numbers 8 Bible Online

Numbers 8 - Oshindonga-Ombiimbeli Ondjapuki 2008 bible

Numbers 8

¹Omuwa okwa lombwele Moses a ti:

²“Lombwela Aaron kutya sho ta tula oolamba heyali koshihukikwanyeka, ne dhi tule tuu tadhi minikile lwokomeho goshihukikwanyeka.”

³Aaron okwe shi ningi: okwa tula oolamba okuminikila lwokomeho goshihukikwanyeka.

⁴Oshihukikwanyeka ashihe, okuza kompadhi yasho sigo okuulenga woongala osha li sha ningwa moshingoli sha hambulwa, pashiholelwa shoka Omuwa u ulukile Moses.

⁵Omuwa okwa lombwele Moses a ti:

⁶“Yoolola mo Aalevi mAaisraeli noku ya yelitha

⁷mohedhi tayi landula: ya shashamina nomeya geyelitho e to ya lombwele, yi ikululithe sheke omalutu gawo noya yoge oonguwo dhawo. Nena otaa kala ya yogoka.

⁸Naa kuthe ontana yomutanda ondumentu nondjambo yiikulya kokutya, uusila womunziya mwa tulwa omagadhi gooholivi, manga ngoye to kutha ongombe ondumentu yi ninge eyonondjambo.

⁹Gongaleka egongalo alihe lyaIsrael e to thikameke Aalevi komeho getsalihangano.

¹⁰Aaisraeli naa tenteke iikaha yawo komitse dhAalevi,

¹¹manga Aaron te ya yapulile ndje, ya ninge ondjambo yedhugadhugo ya zi kAaisraeli, opo ya yakule ndje.

¹²Aalevi naa tenteke iikaha yawo komitse dhoongombe mbali oondumentu; yimwe nayi yambwe eyonondjambo nonkwawo efikilondjambo, opo eyelithoyapulo lyAalevi li tsakanithwe.

¹³“Yapulila ndje Aalevi, ya ninge ondjambo yandje yedhugadhungo nou ya tule metonatelo lyaAaron noyana.

¹⁴Yoolola Aalevi mAaisraeli, opo ya ninge yandje.

¹⁵Sho wa yelitha nokuyapula Aalevi, otaa vulu okuyakula metsalihangano.

¹⁶Onde ya ithana peha lyaatango ayehe yAaisraeli, oyo noya ningi yandje mwene.

¹⁷Sho nda dhipaga aatango yAayegipiti, onda yapula osheeli kehe shomuntu noshoshimuna, shi ninge shandje.

¹⁸Ngashingeyi otandi kutha Aalevi peha lyaatango ayehe yAaisraeli,

¹⁹notandi gandja Aalevi kuAaron noyana, ya ninge omagano ga za kAaisraeli okuyakula metsalihangano peha lyAaisraeli, opo ndi gamene Aaisraeli koshiponga shoka tashi ya adha, ngele taa hedha pehala eyapuki.”

²⁰Moses, Aaron nAaisraeli ayehe oya yapula Aalevi, ngaashi Omuwa a lombwele Moses.

²¹Aalevi oyi iyelitha e taa yogo oonguwo dhawo, naAaron okwe ya yapula, ya ninge omagano gOmuwa. Okwe ya tsakanithile eyelithoyapulo.

²²Aantu oya longo ashihe, ngaashi Omuwa a lombwele Moses kombinga yAalevi. Aalevi noya tameke okulonga metsalihangano mewiliko lyaAaron noyana.

²³Omuwa okwa lombwele Moses e ta ti:

²⁴“Omulevi kehe e na omimvo omilongo mbali nantano nenge dhi vule po, oku na oku ka yakula metsalihangano,

²⁵nomepipi lyomimvo omilongo ntano ota zimbuka.

²⁶Ota vulu ngaa okukwatha Aalevi aakwawo okugwanitha iilonga yawo metsalihangano, ihe ke na okulonga we iilonga yo yene. Ano osho ngeyi u na okuuthila Aalevi iilonga yawo mbyoka ye yi pewa.”