Read Oshindonga-Ombiimbeli Ondjapuki 2008 Numbers 9 Bible Online

Numbers 9 - Oshindonga-Ombiimbeli Ondjapuki 2008 bible

Numbers 9

¹Omuwa okwa lombwele Moses mombuga Sinai momwedhi gwotango gwomumvo omutiyali Aaisraeli sho ya tembudha mo muEgipiti. Okwa ti:

²“Mesiku etimulongo netine lyomwedhi nguka, peningino lyetango, Aaisraeli oye na okudhana Opaasa pamautho agehe gayo.”

⁴Moses okwa lombwele aantu ya dhane Opaasa,

⁵nongulohi yesiku etimulongo netine lyomwedhi gwotango oye shi ningi mombuga Sinai. Aantu oya gwanitha ayihe, ngaashi Omuwa a lombwele Moses.

⁶Okwa li aalumentu yi ikwatitha oshidhila shokukwata omudhimba, noinaa vula we okudhana Opaasa esiku ndyoka. Oya yi kuMoses naAaron

⁷e taa ti: “Otwa nika oshidhila, oshoka otwa guma omudhimba, ihe omolwashike itaatu pitikilwa tu gandje omayambo gOmuwa pamwe nAaisraeli yalwe?”

⁸Moses okwe ya yamukula a ti: “Tegeleleni, sigo nda mono eutho kOmuwa.”

⁹Omuwa okwa lombwele Moses

¹⁰a lombwele Aaisraeli ta ti: “Ngele ope na gumwe gwomune nenge gwomoluvalo lweni i inikitha oshidhila a guma omudhimba nenge a ya mondjenda yokokule, ndele okwa hala ngaa okudhana Opaasa,

¹¹ota pitikwa e yi dhane momwedhi tagu landula, ongulohi yesiku etimulongo netine lyomwedhi omutiyali. Naye yi dhane niikwiila inaayi tulwa efulika niigwanga iilulu.

¹²Inaa hupitha ko iikulya sigo esiku tali landula yo inaa teya nando esipa lyoshimuna. Naa dhane Opaasa pamautho agehe.

¹³Ihe omulumentu ngoka omuyelele ye ina za po a ye kokule ando note etha okudhana Opaasa, na dhimwe mo maantu yandje, oshoka ine eta omayambo gOmuwa pethimbo lyu uthwa. Omuntu a tya ngaaka oku na ondjo.

¹⁴“Ngele ope na omukwiilongo a kala mokati keni a hala a dhiginine Opaasa, ne yi dhane pamautho nopamisindilo. Ompango oyo tuu ndjoka yimwe tayi utha aavalelwamo naakwiilongo.”

¹⁵Esiku ndyoka etsalihangano lya thikamekwa, oshikogo oshe li siikile. Ongulohi osha kala sha yeta omulilo, sigo taku shi.

¹⁶Shika osha kala aluhe; oshikogo oshe li siikile, uusiku osha kala sha yeta omulilo.

¹⁷Ano shampa tuu oshikogo sha yeluka po, Aaisraeli oya tembudha po oontanda e taye dhi yungile pokuma mpoka oshikogo sha kankama.

¹⁸Aantu oya lundulula oontanda palombwelo lyOmuwa noye dhi yungu pashipango she. Oshikogo manga sha siikila etsalihangano, oya kala moontanda.

¹⁹Uuna oshikogo sha siikila etsalihangano ethimbo ele, oya vulika kOmuwa yo inaa huma ko komeho.

²⁰Pomathimbo gamwe oshikogo osha kala owala sha siikila etsalihangano omasiku gamwe ageke, ihe aluhe oya kala moontanda nenge ya tembuka palombwelo lyOmuwa.

²¹Momasiku gamwe oshikogo osha kala owala okuza ongulohi sigo ongula, noya tembuka, shaa tuu oshikogo sha yeluka po. Nando nashi kale uusiku nenge omutenya oshikogo sho sha yeluka po, otaa yi ashike.

²²Uuna oshikogo sha siikile etsalihangano omasiku gaali, omwedhi nenge omumvo nenge ethimbo ele, itaa tembuka. Ihe sho sha yeluka po, otaa tembuka.

²³Oya li haa tembudha po oontanda noku dhi yunga palombwelo lyOmuwa, ngaashi e ya lombwelithitha Moses.