Read Oshindonga-Ombiimbeli Ondjapuki 2008 Nahum 1 Bible Online

Nahum 1 - Oshindonga-Ombiimbeli Ondjapuki 2008 bible

Nahum 1

¹Ndika olyo elaka tali popi Ninive, ehokololo lyemoniko lya monika kuNahum gwokuElkosh.

²Omuwa Kalunga iti idhidhimikile mboka taa iyeleke naye; ota geele mboka taye mu kondjitha. Mondjahi ote shi ya galulile.

³Omuwa iha geye mbala, ihe oye omunankondo noite etha aanandjo inaa geelwa. Mpoka Omuwa te ende, otapu tukuka iikungulu; iikogo oyo ontsi tayi tukulwa koompadhi dhe!

⁴Efuta ote li lombwele, e tali pwine! Omilonga ote dhi kukutike. Omapya gokuBaasha otaga ganya, ondundu Karmel otayi pembe, noongala dhokuLibanon otadhi lembe.

⁵Oondundu otadhi tengatenga montaneho yOmuwa; iikulundundu otayi hemuka koshipala she. Uuna Omuwa ta holoka, evi otali telagana; uuyuni naantu ayehe otaa kakama.

⁶Olye ta vulu okuthikama, uuna Omuwa a geya? Olye ta vulu okuhupa, uuna a pindjala? Ota lokitha ondjahi ye ngomulilo; oondundu otadhi nyanyauka koshipala she.

⁷Omuwa oye omwaanawa; ota gamene aantu ye methimbo lyuudhigu; ota sile oshimpwiyu ayehe mboka ye mu inekela.

⁸Aatondi ye ote ya hanagula po thiluthilu ngefundja tali tondoka; mboka taye mu kondjitha, ote ya unzile meso.

⁹Oshike tamu hangana, mu kondjithe Omuwa? Ote ke mu hanagula po. Kape na ngoka te shi yelekele ishewe.

¹⁰Otamu ka lunguna po ngethita lyomano nongiiyagaya ya kukuta.

¹¹Mungoye, Ninive, omwa zi omuntu u udhilila iineya iiwinayi, ngoka a hala okukondjitha Omuwa.

¹²Omuwa ota lombwele oshigwana she Israel: “Nando Aayassur ya kale aanankondo noya nyenga okuyalulwa, otaa ka yonagulwa po e taa kana po. Shigwana shandje, onde ku gandja mehepeko, ihe itandi ke shi ninga we.

¹³Otandi ka hulitha po oonkondo dhaAssur dhoku ku gwililila po e tandi tokola omalyenge ngoka ge ku manga.”

¹⁴Omuwa okwa tokola molwaAssur ta ti: “Itaa ka kala noluvalo lwokukalitha po edhina lyawo. Otandi hanagula po iimenka mbyoka yi li mootempeli dhiikalunga yawo. Otandi ya longekidhile ombila — inayi ilongela okukala ye na omwenyo.”

¹⁵Taleni, omutumwa ote ya ta zi koondundu nonkundana ombwanawa! Oku li mondjila okutseyitha esindano! Shigwana shaJuda, iituthi yeni yi dhaneni nokupa Omuwa shoka mwe shi mu uvanekela. Aakolokoshi itaa ka ponokela we evi lyeni. Oya hanagulwa po thiluthilu.