Read Oshindonga-Ombiimbeli Ondjapuki 2008 Nahum 3 Bible Online

Nahum 3 - Oshindonga-Ombiimbeli Ondjapuki 2008 bible

Nahum 3

¹Yayee oshilando oshidhipagi noshiifundja! Oshu udha uuyamba, opo shi yugwe nokuhakanwa po!

²Pulakeneni! Etopo lyongola, ekolokoto lyomatemba, elapato lyuukambe, engwandjauko lyomatembakwiita!

³Aakayili otaa tsitsimike, omagongamwele otaga tayima, omagonga otaga wema! Omidhimba odha ndumbala, omituntu dhaa shi kuyalulwa — aantu otaa pundukithwa kudho!

⁴Ninive oshihondeli otashi geelwa. Oshu udha omahongololo nuumpulile tau fala meso. Osha hekaheka iigwana noku yi pika.

⁵Omuwa Omunankondoawike ota ti: “Ninive, otandi ke ku geela! Otandi ke ku hula, u kale omudhu, e tandi ke ku ulika kiigwana; otayi ka tala ohoni yoye ayihe.

⁶Otandi ke ku tala nondhino e tandi ke ku siikila nondumba yiiyagaya. Aantu otaye ke ku kenyanana.

⁷Ayehe mboka taye ku mono, otaa kunkwa. Otaa ka tya: ‘Ninive osha ningi omakulukuma! Olye e shi uvitile ohenda? Olye a hala e shi hekeleke?’ ”

⁸Ninive, u shi ngoye omwaanawa u vule Thebes, oshilandopangelo shomuEgipiti? Osha li shi na omulonga gwoku shi gamena ngaashi ekuma Niili ogwa li epopilo lyasho.

⁹Osha li tashi lele Sudan naEgipiti. Libia osha li mehangano nasho.

¹⁰Onkene tuu aantu yomuThebes oya li ya falwa muupika. Momapandaanda gasho aanona yawo omo ya dhengelwa, ya se. Aawiliki yawo oya tulwa momalyenge noya topolelwa aakwatipo yawo.

¹¹Ninive, ngoye wo oto ka kumukila moomposi dhuunkolwi! Nangoye wo oto ka kambadhala okufadhuka po aatondi yoye.

¹²Oohote dhoye adhihe otadhi ka kala dha fa omikwiyu dha tiligana oondhiye: Shikashika omiti, niiyimati otayi gwile naanaa momakana geni!

¹³Aakwiita yoye oya fa aakulukadhi, noshilongo shoye kashi na epopilo lyasha kaatondi yoye. Omulilo otagu ka yonagula po iipatitho yiiyelo yoye.

¹⁴Popolela mo omeya gokunwa ngoye u koleke oohote dhoye. Lyata omunoko, u tholome oondhopi. Iitholomo nayi kale ya longekidhwa!

¹⁵Ihe nando ongawo, oto ka pya po nenge oto ka dhipagelwa molugodhi. Oto ka kombwa po, ngaashi iimeno tayi thekekwa po koombahu. Aantu yoye oyi indjipala ya fa oombahu!

¹⁶Aapindiki yoye oya ningi oyendjiyendji ye vule oonyothi mewangandjo! Ihe oyo ya yi ya fa oombahu tadhi papama e tadhi tuka tadhi yi.

¹⁷Aambala yoye oya fa oshipupu shoombahu dha lambela komakuma mesiku lyuutalala. Ihe etango nge lya holoka, otadhi tuka po, nokape na ngoka a tseya mpoka dha yi!

¹⁸Omukwaniilwa gwaAssur, aaleli yoye oya dhipagwa, naanenentu yoye oya kotha sigo aluhe! Aantu yoye oya halakanithilwa koondundu, nokape na ngoka te ya eta ishewe kegumbo.

¹⁹Kape na nando omuti gwokugwayekwa piilalo yoye, niilalo yoye itayi vulu okwaaludhwa. Ayehe mboka taa kundana eyonuko lyoye, otaa hakele kenyanyu. Ope na tuu ngoka inoo mu monitha iihuna?