Read Oshindonga-Ombiimbeli Ondjapuki 2008 Habakkuk 3 Bible Online

Habakkuk 3 - Oshindonga-Ombiimbeli Ondjapuki 2008 bible

Habakkuk 3

¹Ndika olyo egalikano lyomuhunganeki Habakuk:

²Omuwa, ondu uvu iilonga yoye nondu udha etilo nesimaneko. Ngashingeyi longa ishewe pethimbo lyetu iilonga iinene mbyoka ho longo shito. Kala omunahenda, nonando owa geya.

³Kalunga ote ya ishewe ta ziilile kuEdom; Kalunga omuyapuki te ya ta ziilile kondundu Paran. Eadhimo lye otali kuwike egulu, nombanda yevi oyu udha okuhambelelwa kwe.

⁴Ote ya mokushela kwolwaadhi; uuyelele tau gena tau zi miikaha ye, omo oonkondo dhe dha holekwa.

⁵Ota tetekelwa kelega e ta lombwele eso, li mu landule.

⁶Ngele ta thikama, evi otali kakama; ngele ta tayima, iigwana otayi dhekweta. Oondundu dhaaluhe otadhi tandauka, niikulundundu otayi ongotele, oondundu ndhoka e endele momathimbo gonale.

⁷Onda mono oshigwana shaKushan sha tila noshigwana shaMidian tashi kakama.

⁸Omuwa, omilonga odho wa geela? Efuta olyo lye ku hanyeke? Ongoye wa londo kiikogo; oshikogo shoshikungulu osha li etemba lyoye, sho we etele aantu yoye esindano.

⁹Owi ilongekidha wa lukila uutati, owa pameka okuumba iikuti. Oompadhi dhoye otadhi mwakula evi.

¹⁰Oondundu sho dhe ku mono, odha kakama; omeya oga pooka ga zi momawangandjo. Omeya gokohi yevi oga pupu, nomakuthikuthi gago oga lundalala.

¹¹Keadhimo lyiikuti yoye tayi tooka noketayimo lyegonga lyoye tali wema, etango nomwedhi oya kankama.

¹²Mondjahi owa taakana evi; nomuugeyi owa lyatagula iigwana.

¹³Owa holoka, u hupithe aantu yoye, u hupithe omukwaniilwa omuhogololwa gwoye. Ongoye wa lyatele pevi omuwiliki gwaakolokoshi, naalanduli ye owe ya yonagula po.

¹⁴Iikuti yoye oya yaha ondjayi yiita ye, sho ye ya ongoshikungulu, e tayi tu halakanitha, otaa yolo ya fa mboka taa hepeke oohepele meholamo.

¹⁵Ongoye wa lyatagula efuta nuukambe woye, nomeya omanene oga tutumika.

¹⁶Ondu uvu ayihe mbika nonda tila; omilungu dhandje odha kakama. Olutu lwandje olwa thithonoka, oompadhi dhandje otadhi telagana. Otandi mwena nda tegelela, ethimbo li ye, uuna Kalunga ta geele mboka taye tu ponokele.

¹⁷Nonando omikwiyu inadhi ima, nomiviinu dhaa na omandjembele, nando omiolivi inadhi ima sha, nepya inali vala iilya, nonando oonzi adhihe tadhi si, niigunda yiimuna oyi li owala,

¹⁸otandi nyanyukwa natango nonda panda, oshoka Omuwa Kalunga oye Omukulili gwandje.

¹⁹Omuwa ota pe ndje oonkondo. Ota koleke oompadhi dhandje, ndi tondoke ngompundja; ota gamene ndje, ngele tandi ende koondundu.