Read Oshindonga-Ombiimbeli Ondjapuki 2008 Haggai 1 Bible Online

Haggai 1 - Oshindonga-Ombiimbeli Ondjapuki 2008 bible

Haggai 1

¹Momumvo omutiyali sho Darius a li omukwaniilwa gwaPersia, mesiku lyotango lyomwedhi omutihamano, Omuwa okwa popi momuhunganeki Haggai. Elaka olya li tali popi omuleli gwaJuda Serubbabel yaShealtiel nomuyambimukuluntu Josua yaJehosadak.

²Omuwa Omunankondoawike ota lombwele Haggai ta ti: “Aantu mbaka otaa ti, ethimbo ndika halyo lyo opalela okutungulula otempeli.”

³Omuwa okwa gandja elaka ndika lye endele momuhunganeki Haggai:

⁴“Aantu yandje, omolwashike tamu kala momagumbo ga tungikika, manga otempeli yandje omakulukuma?

⁵Kamu wete shoka tamu ningilwa?

⁶Omwa kunu ombuto oyindji, ihe omwa teya oshishona unene. Iikulya yokulya omu yi na, ihe inayi gwana oku mu kutitha. Omu na omaviinu gokunwa, ihe itage mu kumitha. Omu na oonguwo, ihe inadhi gwana oku mu pupyaleka. Nomuniilonga oha kala moluhepo.

⁷Kamu wete shoka tamu ningilwa?

⁸Ngashingeyi londeni kiikulundundu, mu ka komangele omiti nomu tungulule otempeli. Nena otii ka tundulukwa e tandi ka longelwa, ngaashi shi na okukala.

⁹“Omwa tegelela eteyo lyiilya ya vala nawa, ihe otayi ka shonopala. Nuuna tamu eta oondudhi kegumbo, otandi dhi pepula po. Omolwashike te ningi ngeyi? Omolwashoka otempeli yandje omakulukuma, manga shaa ngoka gwomune i ipyakidhila nokutunga egumbo lye mwene.

¹⁰Omolwashika omvula ihayi loko, nevi ihali gandja iilya.

¹¹Onde eta oluteni moshilongo — kiikulundundu yasho, komapya, kiitsambe yomiviinu nokooholivi — kiikwamepya ayihe hayi zi mevi, kaantu nokiinamwenyo nokwaashihe shoka hamu kambadhala okukokitha.”

¹²Nena Serubbabel naJosua naantu ayehe mboka ya galuka muupika muBabilon, oya ningi shoka Omuwa Kalunga kawo e shi ya lombwele. Oya li ya tila noya vulika komuhunganeki Haggai, omutumwa gwOmuwa.

¹³Nena Haggai okwa gandja elaka lyOmuwa koshigwana tali ti: “Otandi uvaneke okukala pamwe nane.”

¹⁴Omuwa okwa ladhipike ayehe okutunga otempeli. Omuleli gwaJuda Serubbabel, omuyambimukuluntu Josua naantu ayehe mboka ya galuka muupika, oya tameke okutunga otempeli yOmuwa Omunankondoawike, Kalunga kawo.

¹⁵Osha ningwa mesiku etimilongo mbali netine lyomwedhi omutihamano gwomumvo omutiyali, sho Darius a li omukwaniilwa.