Read Oshindonga-Ombiimbeli Ondjapuki 2008 Haggai 2 Bible Online

Haggai 2 - Oshindonga-Ombiimbeli Ondjapuki 2008 bible

Haggai 2

¹Mesiku etimilongo mbali nolyotango lyomwedhi omutiheyali omumvo tuu ngoka, Omuwa okwa popi ishewe momuhunganeki Haggai.

²Okwa lombwele Haggai, a lombwele Serubbabel, omuleli gwaJuda, nomuyambimukuluntu Josua naantu yalwe ngeyi:

³“Ope na tuu gumwe mokati keni ta vulu okudhimbulukwa eopalo lyonale lyotempeli ndjika? Oyi li ano ngiini momeho geni ngashingeyi? Oya fa kaayi na omutalelo gwasha.

⁴Ihe inamu kala mwa tyololoka. Longeni, oshoka ondi li pamwe nane.

⁵Sho mwa tembuka muEgipiti, onde mu uvanekele, ndi kale aluhe nane. Ondi li nane nokuli, ano inamu tila.

⁶“Konima yokathimbo otandi ki inyengitha egulu nevi, uukukutu nefuta.

⁷Otandi ka tukulutha iigwana ayihe, nomaliko gayo otage ke etwa nkuka, notempeli otayi ku udhithwa omauyamba.

⁸Iisiliveli ayihe niingoli yomuuyuni auhe oyandje.

⁹Otempeli ompe otayi ka taima unene yi vule yonale. Peha ndika otandi ka pa aantu yandje elago nombili.” Omuwa Omunankondoawike okwe dhi popi.

¹⁰Mesiku etimilongo mbali netine lyomwedhi omutimugoyi gwomumvo omutiyali, Darius sho a li omukwaniilwa, Omuwa Omunankondoawike okwa lombwele ishewe omuhunganeki Haggai.

¹¹Okwa ti: “Pula aayambi owino kepulo ndi:

¹²‘Tu tye, omuntu ota kutha ontumba yonyama ondjapuki kondjambelo e yi humbatela ponguwo ye. Ngele te etha, onguwo yi gume oshikwiila, iikulya ya pya, omaviinu, omagadhi nenge sha shilwe hashi liwa, otayi yi ningi wo iiyapuki?’ ” Epulo sho lya pulwa, aayambi oya yamukula: “Aawe.”

¹³Nena Haggai okwa pula: “Tu tye, omuntu ina yogoka, oshoka okwa gumu omudhimba. Ngele ota gumu shimwe shomiikulya mbika, ote shi nyateke?” Aayambi oya yamukula: “Eeno.”

¹⁴Nena Haggai okwa ti: “Omuwa ota ti: ‘Osho naanaa tashi ningwa kaantu yoshigwana shika nokukehe shoka taye eta po. Shaa shoka taa yamba koshiyambelo, osha nyata.’ ”

¹⁵Omuwa ota ti: “Otamu wapa tuu okumona shoka mwa ningilwa? Manga inaamu tameka okutungulula otempeli,

¹⁶otamu yi kondumba yiilya yooshako hamano, ihe otamu zi ko owala nooshako ndatu. Mongoma ndjoka mwa li mu na okuza oolita ntano dhomaviinu, omwa zi owala mbali.

¹⁷Onda tumu ombepo ompyu noompawe, yi yonagule po shaa shoka mwa kambadhala okukokitha, ihe ne inamu itedhulula natango.

¹⁸Nena esiku etimilongo mbali netine lyomwedhi omutimugoyi, esiku lyetameko lyomukanka gwotempeli. Taleni shoka tashi ka ningwa po okuza ngashingeyi.

¹⁹Nando inapa hupa iilya, nomiviinu, omikwiyu, omigranati nomiolivi inadhi ima natango, okuza ngashingeyi otandi ke mu yambeka.”

²⁰Mesiku tuu ndyoka etimilongo mbali netine lyomwedhi Omuwa okwa pe Haggai elaka

²¹tali popi Serubbabel, omuleli gwaJuda tali ti: “Ngame otandi inyengitha egulu nevi

²²notandi tukulutha omatembakwiita naahingi yago; uukambe otau ka sa, naalondi yawo otaa ka dhipagathana.

²³Mesiku ndyoka otandi ke ku taamba, omuntu gwandje Serubbabel, notandi ke ku langeka, u lele medhina lyandje. Ongoye ngoka nde ku hogolola.” Omuwa Omunankondoawike okwe dhi popi.