Read Oshindonga-Ombiimbeli Ondjapuki 2008 Mark 10 Bible Online

Mark 10 - Oshindonga-Ombiimbeli Ondjapuki 2008 bible

Mark 10

¹Jesus okwa zi nkoka nokwa yi komikunda dhaJudea nahandiyaka yaJordan. Nena ongundu yaantu oye mu gongalele ishewe, nokwe ya longo, ngaashi he shi ningi shito.

²Okwa zi ihe aafarisayi noye ya kuye oku mu pula noku mu makela, ngele oshu uka tuu, omulumentu a henge po omukiintu gwe.

³Jesus okwe ya yamukula a ti: “Moses okwe mu lombwele, mu ninge ngiini?”

⁴Oyo oya ti: “Moses okwa pitika, omulumentu a nyole onzapo yehengo, a ethe po omukiintu gwe.”

⁵Jesus okwa ti kuyo: “Moses okwe mu nyolele eutho ndika omolwokwaavulika kweni.

⁶Ihe petameko, peshito: ‘Kalunga okwe ya shiti omulumentu nomukiintu.

⁷Onkee ano omulumentu e na okuthiga po he nayina e ti ihanganitha nomukiintu gwe,

⁸ayehe yaali notaa ningi omuntu gumwe.’ Kaye shi we yaali, aawe, oyo omuntu gumwe.

⁹Ano shono Kalunga e shi tula kumwe, inashi kuthwa kumwe komuntu.”

¹⁰Sho ya yi megumbo, aalongwa oya pula ishewe Jesus oshinima shika.

¹¹Oye nokwe ya lombwele a ti: “Oongoka ta henge po omukiintu gwe e ta hokana gulwe, ota hondele.

¹²Nosho tuu wo omukiintu ngele ta henge po omulumentu gwe e ta hokanwa kugulwe, ota hondele.”

¹³Aantu yamwe oye eta uunona kuJesus, e u gume. Aalongwa noya ganda mboka ye u eta.

¹⁴Ihe Jesus sho shi mono, okwa geye e ta ti kuyo: “Etheni uunona, u ye kungame. Inamu u keelela ko, oshoka Oshilongo shaKalunga oshaamboka ye u fa.

¹⁵Ngame otandi mu lombwele: Oongoka itaa taamba Oshilongo shaKalunga ongokanona, ita yi mo musho.”

¹⁶Oye okwe u papata momaako ge nokwe u tenteke iikaha ye e te u yambeke.

¹⁷Jesus sho a zi mo megumbo, okwa tsikile ondjila ye. Omulumentu gumwe okwa matuka, e mu tsakaneke, nokwa tsu oongolo koshipala she e te mu pula: “Muhongi omwaanawa, nandi longe shike, ndi mone omwenyo gwaaluhe?”

¹⁸Jesus okwe mu pula: “Omolwashike to ti ndje omwaanawa? Kaku na nando omuntu omwaanawa, oKalunga awike.

¹⁹Iipango ou yi shi: ‘Ino dhipaga, Ino hondela, Ino yaka, Ino lundila, Ino yuga omuntu, Simaneka ho nanyoko.’ ”

²⁰Ihe ye okwe mu yamukula: “Muhongi, ayihe mbika onde yi gwanitha okuza muugundjuka wandje.”

²¹Opo Jesus okwe mu tala nohole e ta ti kuye: “Owa pumbwa oshinima shimwe: Inda, u ka landithe po iinima yoye ayihe, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”

²²Ihe oohapu ndhoka odhe mu alula komwenyo, nokwa zi po a nika oluhodhi, oshoka okwa li e na eliko olindji.

²³Jesus okwa tala aalongwa ye e ta ti kuyo: “Aayamba oye na uudhigu ngiini okuya mOshilongo shaKalunga!”

²⁴Aalongwa oya kuminwa oohapu dhe. Ihe Jesus okwe ya lombwele ishewe e ta ti: “Aamwandje, ope na uudhigu ngiini okuya mOshilongo shaKalunga!

²⁵Okupitila kwongamelo mombululu yonane okuhwepo ku vule okuya kwomuyamba mOshilongo shaKalunga.”

²⁶Aalongwa oya haluka noonkondo noya pulathana e taa ti: “Olye ano ta vulu okuhupithwa?”

²⁷Jesus okwe ya tongolola e ta yamukula: “Eeno, aantu ohaa nyengwa, ihe Kalunga iha nyengwa kusha.”

²⁸Petrus okwa tameke okupopya nokwa ti kuye: “Tala, tse otwa thigi po ayihe e tatu ku landula.”

²⁹Jesus okwa ti: “Ngame otandi mu lombwele: Kaku na ngoka a thiga po egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya molwandje nomolwokutaandelitha elaka etoye,

³⁰a kale ando itaa mono lwethele muuyuni mbuka omagumbo, aamwayina aalumentu naamwayina aakiintu, ooyina, oyana, omapya — nosho wo omatidhagano; nomuuyuni tau ya ota ka mona omwenyo gwaaluhe.

³¹Ihe aatango oyendji otaa ka ninga aahugunini, naahugunini oyendji otaa ka ninga aatango.”

³²Oyo oya li mondjila taa londo yu uka kuJerusalem. Jesus okwe ya kwatele komeho. Aalongwa oya adhika kehaluko nosho wo aantu mboka ya landula mo, oya li ya tila. Jesus okwi ikalekele ishewe aalongwa ye omulongo nayaali nokwa tameke oku ya lombwela shoka tashi ke mu adha

³³a ti: “Tala, otatu yeni kuJerusalem, hoka Omuna gwOmuntu ta ka gandjwa miikaha yaayambi aakuluntu noyaalongimpango, notaye mu pangulile eso. Yo otaye ke mu gandja ishewe kaapagani,

³⁴mboka taye mu sheke, taye mu hiyile omayeye, taye mu dhenge e taye mu dhipaga, ihe ngele pwa piti omasiku gatatu, ota yumudhwa.”

³⁵Nena aana yaSebedeus, Jakob naJohannes, oye ya kuJesus e taa ti: “Muhongi, otwa hala, u tu ningile shaa shoka tatu ku indile.”

³⁶Oye okwe ya pula a ti: “Omwa hala, ndi mu pe shike?”

³⁷Oyo ye mu yamukula: “Tu pitika, tu ka kuutumbe mOshilongo shoye gumwe okolulyo lwoye nomukwawo okolumoho lwoye.”

³⁸Jesus okwa ti kuyo: “Ne inamu tseya shoka mwa hala. Otamu vulu tuu okunwa oshitenga shoka tandi nu nokushashwa eshasho ndyoka tandi shashwa?”

³⁹Oyo ya ti kuye: “Otatu shi vulu.” Jesus okwa ti kuyo: “Oshitenga shoka tandi nu, otamu ke shi nwa, neshasho ndyoka tandi shashwa, otamu ke li shashwa.

⁴⁰Ihe omahala gokukuutumba kolulyo lwandje nenge kolumoho lwandje hangame tandi ga gandja, ihe ogaamboka ye ga longekidhilwa kuTate.”

⁴¹Aalongwa mbeyaka omulongo sho ye dhi uvu, oya tameke okugeela Jakob naJohannes.

⁴²Jesus okwe ya ithana e ta ti kuyo: “Ne omu shi shi, aapangeli ohaa pangele iigwana, naanenentu ohaye yi pangele pankondo dhawo.

⁴³Ihe inashi kala ngaaka mokati keni. Ngoka gwomune a hala, a ninge omunene, na ninge omuyakuli gweni.

⁴⁴Naangoka gwomune a hala, a ninge gwotango, na kale omupika gwaayehe.

⁴⁵Oshoka nOmuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.”

⁴⁶Oyo ye ya kuJeriko. Jesus sho a li ta zi muJeriko pamwe naalongwa ye nongundu onene yaantu, omulumentu omuposi, edhina lye Bartimeus, omuna gwaTimeus, okwa kuutumba mooha dhondjila ta hehela.

⁴⁷Sho u uvu kutya oJesus Omunasareti e li po, okwa tameke okwiigidha ta ti: “Jesus, omuna gwaDavid, sila ndje ohenda!”

⁴⁸Oyendji yomaantu oye mu ganda, a mwene, ihe ye okwa dhiginine okwiigidha mokulekule: “Omuna gwaDavid, sila ndje ohenda!”

⁴⁹Jesus okwa thikama e ta ti: “Mu ithaneni, e ye.” Oyo oyi ithana omuposi noya ti kuye: “Thikama, ikolelela, to ithanwa.”

⁵⁰Oye okwi ihula ombaikitha ye nokwa thikama mbala e te ya kuJesus.

⁵¹Jesus okwe mu pula a ti: “Owa hala, ndi ku ningile shike?” Omuposi okwe mu yamukula: “Muhongi, onda, hala, ndi mone ko ishewe.”

⁵²Jesus okwa ti kuye: “Inda, eitaalo lyoye lye ku aludha.” Mbalambala okwa tonata e ta landula Jesus.