Read Oshindonga-Ombiimbeli Ondjapuki 2008 Mark 13 Bible Online

Mark 13 - Oshindonga-Ombiimbeli Ondjapuki 2008 bible

Mark 13

¹Jesus sho a zi mo motempeli, gumwe gwomaalongwa ye okwa ti kuye: “Muhongi, tala komamanya noongulu nkene dho opala!”

²Jesus okwa ti kuye: “Ou wete oongulu ndhika oonene? Itapu thigwa mpaka emanya lya tentekwa kekwawo inaali kumunwa po.”

³Jesus manga a li a kuutumba kOndundu yooholivi a taalela kotempeli, Petrus, Jakob, Johannes naAndreas oye mu pula, sho ya li ayeke naye:

⁴“Tu lombwela, uunake ano tashi ningwa, nendhindhiliko olini tali holola, uuna mbika ayihe tayi ka gwanithwa?”

⁵Jesus okwa tameke ihe oku ya lombwela e ta ti: “Kotokeni, mwaa pukithwe nando okomuntu.

⁶Aantu oyendji otaa ke ya taa ti: ‘Oyo Ngame!’ notaa pukitha aantu oyendji.

⁷Inamu tilithwa, ngele tamu uvu omalugodhi noonkundana dhomalugodhi. Oshoka mbika oyi na okuningwa, ihe ehulilo inali thikana natango.

⁸Iigwana otayi ka thikama okukondjithathana, niilongo otayi ka matukilathana. Otaku ke ya oondjala nomakakamo gevi koombinga noombinga. Ayihe mbika otayi ningi ongetameko lyoshitheta, okanona ngele taka valwa.

⁹“Ano ikotokeleni, oshoka aantu otaye ke mu gandja koompangu notaye ke mu dhenga noongola moosinagoga dhawo. Otamu ka falwa kiipala yomalenga noyaakwaniilwa omolwandje, mu ninge oonzapo dhokupopya oshili mokati kawo.

¹⁰Ihe tangotango elaka etoye oli na okuuvithilwa aantu ayehe.

¹¹Ano ngele taye mu gandja ngeyi kaatokoli, inamu kala mu na oshimpwiyu kutya otamu ka popya shike, oshoka otamu pewa pethimbo tuu ndyoka shoka mu na oku popya. Oshoka hane tamu popi, ihe Ombepo Ondjapuki ta popi.

¹²Aantu aamwayinathana otaa ka gandjathana mokusa, noohe otaa ka gandja oyana. Aanona otaa ka tsa ondumbo naakuluntu yawo e taye ya dhipaga.

¹³Otamu ka tondwa kwaayehe molwandje. Ihe ngoka ti idhidhimike sigo ehulilo, ota hupithwa.”

¹⁴Omuleshi na ndhindhilike mbika: “Ngele tamu mono iihuna yeshunduko yi li pokuma yaa na okukala po, nena ayehe mboka ye li muJudea, naa tembukile koondundu.

¹⁵Ngoka ta adhika kombanda yongulu, ina kuluka ko, a ye megumbo, a ka tale mo sha she, a ye nasho.

¹⁶Ngoka ta adhika mepya, ina shuna megumbo, a ka tale onguwo ye.

¹⁷Yayee aasimba naamwali yopomasiku ngoka!

¹⁸Galikaneni, shaa ningwe pokufu.

¹⁹Oshoka pomasiku ngoka otaku kala uudhigu inaau kala ko nale okuza ketameko, Kalunga sho a shiti uuyuni sigo ongashingeyi, nongaashi itau ya we.

²⁰Omuwa ando ina fupipika omasiku ngoka, ando kaku na nando omuntu ta hupithwa. Ihe okwa fupipike omasiku ngoka omolwaahogololwa ye.

²¹“Ano ngele ku na ngoka te mu lombwele: ‘Tala, Kristus oye nguka,’ nenge: ‘Tala, oye ngwiyaka,’ inamu mu itaala.

²²Oshoka otaku ka holoka ookristus aafundja naahunganeki aafundja. Oyo otaa ka holola po omandhindhiliko niikumithalonga, opo ya pukithe, ngele tashi vulika, naahogololwa yaKalunga.

²³Kotokeni, onda tetekele oku mu londodha mwaayihe.”

²⁴“Uudhigu womasiku ngoka otau ka landulwa keluudho lyetango, nomwedhi itagu ka yela we.

²⁵Oonyothi otadhi ka gwa megulu, noonkondo dhomewangandjo otadhi ka tukuluka.

²⁶Aantu otaa ka mona ihe Omuna gwOmuntu te ya te ende kiikogo yokegulu e na oonkondo odhindji neadhimo.

²⁷Oye ota ka tuma ko aayengeli ye, ya ka gongele aahogololwa ye koombinga ne dhevi, okuza koshigo yevi sigo okoshigo yegulu.”

²⁸“Ilongeni omayele komukwiyu. Iitayi yagwo ngele tayi hapuka nomafo taga mbunyuka, nena omu shi shi kutya othinge oyi li popepi.

²⁹Osho nane wo ngele tamu mono mbika tayi ningwa, kaleni mu shi shi, ethimbo olya thikana. Omuna gwOmuntu oku li popepi posheelo.

³⁰Dhimbulukweni kutya iinima mbika ayihe otayi ka ningwa omanga epipi ndyoka li na omwenyo ngashingeyi inaali hula po.

³¹Egulu nevi otali hulu po, ihe oohapu dhandje kadhi na mpoka tadhi hulu po.”

³²“Esiku notundi ndjoka kaku na ngoka e yi shi, nando aayengeli yomegulu nenge Omwana, oTate awike.

³³Kotokeni ano, ne mu tonate, oshoka inamu tseya kutya ethimbo otali thiki uunake.

³⁴Otaku ningi ngashika omulumentu te ke enda kiilongo e ta thigi po egumbo lye: Oye okwa thigile aamati ye, ya tonatele iinima ye ayihe. Kehe omumati okwe mu pe oshilonga she mu yeleka e ta lombwele omukeeleli gwoposheelo, a kale a tonata.

³⁵Onkee ano tonateni, oshoka inamu tseya, uuna mwene gwegumbo te ya, ngele ongulohi nenge opokati kuusiku opokwiiga kwekondombolo nenge okoongulasha.

³⁶Opo nge te ya ombaadhilila, kee mu adhe mwa kotha.

³⁷Shoka tandi mu lombwele, otandi shi lombwele wo aantu ayehe kutya: Tonateni!”