Read Oshindonga-Ombiimbeli Ondjapuki 2008 Mark 4 Bible Online

Mark 4 - Oshindonga-Ombiimbeli Ondjapuki 2008 bible

Mark 4

¹Jesus okwa tameke ishewe okulonga aantu pomunkulo gwefuta. Ongundu onene yaantu oye mu gongalele, onkee okwa li e na okuya mowato e ta kuutumba muyo, momeya. Ongundu ayihe yaantu oya li yi li kevi pomunkulo gwefuta.

²Oye okwe ya longo iinima oyindji momayele. Mokulonga kwe okwa ti kuyo:

³“Pulakeneni! Omukuni okwa ka kuna.

⁴Ano mokukuna kwe oombuto dhimwe odha gwile mondjila, noondhila odhe ya e tadhi dhi shomona po.

⁵Dhimwe odha gwile poshipale pwaa na evi olindji. Onkee odha mene mbalambala, oshoka kapwa li evi ele.

⁶Etango sho lya piti, omimeno odha lembe, naasho dha li dhaa na omidhi dha ya muule, odha ganya.

⁷Dhimwe odha gwile moongwena. Oongwena sho dha koko, odhe dhi thininike, dhaa vale.

⁸Ihe dhimwe odha gwile mevi ewanawa, naasho dha mene, odha koko e tadhi vala: dhimwe olwomilongo ndatu, dhimwe olwomilongo hamano nadhimwe olwethele.”

⁹Opo Jesus okwa ti: “Ngoka e na omakutsi gokuuva, nu uve ko!”

¹⁰Ano Jesus manga a li i ikalela, aantu mboka ya li ye mu kundukidha pamwe naalongwa omulongo nayaali, oye mu pula kombinga yomayele ngaka. Oye okwe ya yamukula a ti:

¹¹“Ne omwa pewa okuuva ko iiholekwa yOshilongo shaKalunga, ihe yalwe yopondje, ashihe otaye shi pewa owala momayele.

¹²Onkee: Okumona ohaa mono, ihe kaa wete ko. Okuuva ohaa uvu, ihe kaa uvite ko, ando ya galukile kuKalunga, ye e ya dhimine po.”

¹³Jesus okwe ya pula a ti: “Ngele kamu uvite ko eyele ndika, otamu vulu ngiini okuuva ko omayele omakwawo?

¹⁴Omukuni okwa ka kuna oohapu dhaKalunga.

¹⁵Ndhoka dha gwile mondjila, odha fa aantu mboka taa uvu oohapu dhaKalunga, ihe manga taye dhi pulakene, mbalambala Satana ote ya e ta kutha mo oohapu ndhoka dha kunwa muyo.

¹⁶Ndhoka dha kunwa poshipale, odha fa aantu mboka taa uvu oohapu dhaKalunga e taye dhi taamba mbala nenyanyu,

¹⁷ihe itadhi ningine muyo. Otaa dhiginine okathimbo kowala. Uuna tapu ya uudhigu nenge etidhagano molwoohapu, nena otaa etha eitaalo mbala.

¹⁸Ndhoka dha kunwa moongwena, odha fa aantu mboka taa uvu oohapu dhaKalunga,

¹⁹ihe oshimpwiyu shuuyuni mbuka nefundjaleko lyuuyamba nakehe tuu okahalu otayi yi muyo e tayi thininike oohapu, yaa imike iiyimati.

²⁰Ndhoka dha kunwa mevi ewanawa, odha fa aantu mboka taa uvu oohapu dhaKalunga e taye dhi taamba notaa imike iiyimati: yamwe olwomilongo ndatu, yamwe olwomilongo hamano nayamwe olwethele.”

²¹Jesus okwe ya pula ishewe a ti: “Oku na tuu ngoka te eta mo olamba e te yi tula kohi yontungwa nenge kohi yontala? Ndi shi, oku na oku yi tula koshihukikwa?

²²Oshoka kaku na shoka sha holekwa itaashi ka hololwa, nokaku na shoka sha holama itaashi ka holoka.

²³Ngoka e na omakutsi gokuuva, nu uve ko!”

²⁴Jesus okwe ya lombwele ishewe a ti: “Ndhindhilikeni shoka tamu shi pulakene. Oshiyelekitho shoka tamu shi yelekitha, nane wo otamu ke shi yelekithwa, mwa gwedhelwa ko nokuli.

²⁵Oshoka ngoka e na, oye ta pewa, ihe ngoka kee na, oye ota kuthwa naashoka e shi na.”

²⁶Jesus okwa ti ishewe: “Oshilongo shaKalunga osha fa omuntu a kunu ombuto mepya.

²⁷Uusiku okwa ka lala nokwa penduka ongula. Ombuto oya mene e tayi koko, ye ina tseya, nkene sha ningwa,

²⁸oshoka evi olyo lyene tali kokitha iimeno e tali etithitha oomuma: tango omuno, tagu landulwa komutse, nosho wo oomuma tadhi kolo komutse.

²⁹Iilya ngele ya kukuta, nena omuteyi ota kutha mbala oshiteyitho, a teye, oshoka eteyo olya thikana.”

³⁰Jesus okwa pula a ti: “Oshilongo shaKalunga otatu shi faathanitha nashike, notatu shi yeleke neyele lini?

³¹Osha fa omuma yosinapi. Manga tayi kunwa mevi, oyo okamuma okashuushuka ke vulike koomuma adhihe dhokombanda yevi.

³²Ihe ngele ya kunwa, otayi mene e tayi koko yi vule iihwa ayihe notayi ningi iitayi iinene, noondhila dhokegulu otadhi tungile iihandhila miitayi yagwo.”

³³Jesus okwa lombwele aantu oohapu nomayele omakwawo ogendji ga fa ngaka opankondo dhokuuva kwawo.

³⁴Ine ya lombwela sha itaa popi momayele. Ihe sho a li naalongwa ye oyo ayeke, okwe ya fatululile ayihe.

³⁵Ano sho kwa ningi ongulohi yesiku ndyoka, Jesus okwa ti kaalongwa ye: “Tu taagulukileni handiyaka yetale.”

³⁶Aalongwa oya thigi po ongundu yaantu noya landulile Jesus mowato e taa yi pamwe naye. Oowato dhilwe wo odhe ende pamwe nayo.

³⁷Oshikungulu oshidhigu shombepo osha tukuluka, nomakuthikuthi ogi iyundulile mowato, sigo tayi hala okuudha omeya.

³⁸Ihe Jesus ye mwene okwa li kosindo yowato a kothela koshigwilo. Aalongwa oye mu pendutha ya ti: “Muhongi, ku na ko nasha nani natse, ngele tatu ningine mo?”

³⁹Jesus okwa penduka nokwa ganda ombepo e ta ti komakuthikuthi: “Mwena!” Ombepo oya kodha e taku ti thilu.

⁴⁰Jesus nokwa ti kuyo: “Omolwashike mwa tila? Kamu na natango eitaalo?”

⁴¹Oyo oya kwatwa kehaluko enene noya pulathana e taa ti: “Nguka olye ano, ombepo nomakuthikuthi sho tayi vulika kuye?”