Read Oshindonga-Ombiimbeli Ondjapuki 2008 Luke 13 Bible Online

Luke 13 - Oshindonga-Ombiimbeli Ondjapuki 2008 bible

Luke 13

¹Pethimbo tuu ndyoka opwa li pu na aantu mboka ya hokololele Jesus kombinga yAagalilea mboka, Pilatus e ya dhipaga, manga ya li taa yambele Kalunga omayambo.

²Jesus okwe ya yamukula a ti: “Ne otamu dhiladhila ndishi kutya okudhipagwa kwAagalilea mbeya otaku holola kutya oya li aalunde unene ye vule Aagalilea ayehe yalwe?

³Aawe, hasho! Otandi mu lombwele, ngele itamu itedhulula, otamu ka kana ngaashi yo.

⁴Nenge omu shi, aantu mbeya omulongo nayahetatu sho ya li ya gwilwa koshungongulu yomuSiloa e taa si, oya li aalunde unene ando ye vule aantu yalwe mboka ye li muJerusalem?

⁵Aawe, hasho! Otandi mu lombwele, ngele itamu itedhulula, otamu ka kana ngaashi yo.”

⁶Nena Jesus okwe ya lombwele eyele ndika: “Okwa li ku na omusamane gumwe a tsike omukwiyu meyana lye lyomiviinu. Oye okwa yi, a ka konge iiyimati mugwo, ihe ina mona mo sha.

⁷Oye okwa ti komulongi gweyana: ‘Tala, methimbo lyoomvula ndatu onda kala handi ya mpaka okukonga oonkwiyu komukwiyu nguka, ihe inandi mona mo sha. Gu ka po! Omolwashike gu na okumana owala evi oonkondo?’

⁸Ihe omulongi okwa yamukula: ‘Tatekulu, gu etha natango omvula yimwe, manga tandi fulu omukanka, gu gu kundukidhe, e tandi gu tutile ishewe uuhoho.

⁹Nena ngele otagu imi iiyimati momumvo tagu ya, onawa unene; ihe ngele itagu imi, nena nagu kewe po.’ ”

¹⁰Esiku lyEsabati Jesus okwa li ta longo aantu mosinagoga.

¹¹Omo omwa li mu na omukiintu e niwe kombepo ya nyata, oyo noye mu etele uuvu oomvula omulongo nahetatu. Oye okwa li a andalala ye ina vula okuukilila.

¹²Jesus sho e mu mono, okwe mu ithana a ti: “Nekulu, wa aluka kuuvu woye!”

¹³Jesus okwa tula iikaha ye kombanda yomukiintu, nguka nokwi iyukililitha nziya e ta hambelele Kalunga.

¹⁴Ihe omukuluntu gwosinagoga okwa tameke okugeela Jesus, sho a aludha mEsabati. Oye okwa yi mo moohapu nokwa lombwele aantu a ti: “Otu na omasiku gahamano ngoka tu na okulonga; ileni momasiku ngoka, mu aludhwe, ihe hamEsabati.”

¹⁵Omuwa okwe mu yamukula a ti: “Aafudhime ne! Ihamu piitha mo ongombe nenge okasino moshigunda mEsabati e tamu ke yi hugila?

¹⁶Ihe mpaka opu na omuna gwaAbraham, ngoka Satana a kala e mu tula moomango oomvula omulongo nahetatu. Ita mangululwa ando moomango ndhika mEsabati?”

¹⁷Ano Jesus sho a popi ngeyi, aatondi ye ayehe oya si ohoni, ihe aantu yalwe ayehe oya nyanyukilwa iilonga iikumithi mbyoka e yi longo.

¹⁸Jesus okwa ti: “Oshilongo shaKalunga osha fa shike? Otandi shi yeleke nashike?

¹⁹Osha fa omuma yosinapi, omulumentu e yi kutha nokwe yi kunu mepya lye. Oyo oya koko e tayi ningi omuti, noondhila odha tungile iihandhila yadho miitayi yagwo.”

²⁰Jesus okwa ti ishewe: “Oshilongo shaKalunga otandi shi yeleke nashike?

²¹Osha fa efulika, omukiintu e li kutha nokwe li pilulile muusila woontungwa ndatu, sigo auhe wa fulu.”

²²Jesus okwe ende miilando nomomikunda nokwa longo aantu, sho a li mondjila ye yokuuka kuJerusalem.

²³Omuntu gumwe okwe mu pula a ti: “Omuwa, aantu mboka taa ka hupithwa aashona yowala?” Jesus okwe ya yamukula a ti:

²⁴“Kondjeni, mu ye mo mosheelo shoka sha patekidha. Oshoka otandi mu lombwele: Aantu oyendji otaa kambadhala okuya mo, ihe itaa ka vula.

²⁵“Mwene gwegumbo ngele a penduka e te edhile omweelo, nena otamu thikama pondje e tamu konkola komweelo e tamu ti: ‘Omuwa, tu egulula!’ Oye note mu yamukula: ‘Kandi shi wo mpoka tamu zi!’

²⁶One otamu yamukula: ‘Otse otwa lileni notwa nwineni pamwe poshililo; osho wo owa longo aantu moshilando shetu.’

²⁷Oye ote ke mu lombwela ta ti: ‘Kandi shi wo mpoka tamu zi. Zii po pungame, one aakolokoshi!’

²⁸Otaku ka kala elilagano neikokoto lyomayego, sho tamu ka mona Abraham, Isak naJakob naahunganeki ye li mOshilongo shaKalunga, manga ne mwe edhililwa pondje.

²⁹Aantu otaa ka za kuuzilo nokuuninginino, kuumbangalantu nokuumbugantu e taa ka kuutumba poshililo mOshilongo shaKalunga.

³⁰Nena mboka aahugunini otaa ka ninga aatango, naamboka aatango otaa ka ninga aahugunini.”

³¹Pethimbo olyo tuu ndyoka aafarisayi yamwe oye ya kuJesus noya ti kuye: “Za po mpaka, u ye kulwe, oshoka Herodes okwa hala oku ku dhipaga.”

³²Jesus okwe ya yamukula a ti: “Indeni, mu ka lombwele ombandje ndjoka: ‘Ngame nena otandi tidha mo oompwidhuli notandi aludha aavu, ihe ngula nahela otandi ka hulitha iilonga yandje.’

³³Nonando ongawo, ondi na okutsikila ondjila yandje nena, ngula nahela, oshoka omuhunganeki ita dhipagelwa palwe, ihe omuJerusalem.”

³⁴“Jerusalem, Jerusalem! Ongoye ho dhipaga aahunganeki noho dhipaga nomamanya aatumwa yaKalunga. Olungapi nda li nda hala okugongela aamwoye, ngaashi ondjuhwa hayi gongele uuyuhwena wayo meni lyomawawa gayo, ihe inamu hala.

³⁵Ngashingeyi egumbo lyeni otali thigwa ombuga yowala. Ongame tandi mu lombwele: One itamu mono ndje we sigo ethimbo ndyoka, uuna tamu ka tya: ‘Na lalekwe nuuyamba oonguka te ya medhina lyOmuwa!’ ”