Read Oshindonga-Ombiimbeli Ondjapuki 2008 Luke 14 Bible Online

Luke 14 - Oshindonga-Ombiimbeli Ondjapuki 2008 bible

Luke 14

¹Esiku limwe lyEsabati Jesus okwa yi megumbo lyagumwe gwomaafarisayi mboka aakuluntu, a ka lye; aantu oya li ya langela Jesus.

²Omulumentu a li a zinda olutu aluhe, okwe ya kuJesus.

³Nena Jesus okwa yi mo moohapu nokwa pula aanongompango naafarisayi a ti: “Ompango yetu otayi pitika tuu, omuntu a aludhe mEsabati nenge aawe?”

⁴Ihe inaa yamukula sha. Jesus okwa kutha omulumentu ngoka nokwe mu aludha e te mu lombwele, a ye.

⁵Nena okwe ya lombwele a ti: “Ngele gumwe gwomune oku na omwana omumati nenge ongombe e tayi gwile momuthima mEsabati, ite yi hili mo andola nonando Esabati?”

⁶Ihe kaya li taa vulu oku mu yamukula moshinima shika.

⁷Jesus okwa dhimbulula, aayenda yamwe yi ihogololele iipundi ya simana, onkee ayehe okwe ya lombwele eyele ndika a ti:

⁸“Ngele ku na ngoka e ku hiya koshituthi shohango, ino kuutumba kiipundi ya simana, oshoka otashi vulika, ku na gumwe a simana e ku vule, a hiywa wo.

⁹Nena omwiithani gweni amuhe yaali ote ya e te ku lombwele ta ti: ‘Pa mukweni nguka eha lyoye.’ Nena oto kala wa sa ohoni, sho u na okukuutumba mehala lyokonima.

¹⁰Ihe ngele wa hiywa, inda u ka kuutumbe mehala lyokonima, opo ngoka e ku hiya ngele te ya, ote ku lombwele ihe: ‘Kuume kandje, ila huka kehala ewanawa.’ Shika otashi ku simanekitha montaneho yaayenda yalwe ayehe.

¹¹Oshoka ngoka ti inenepeke, ota shonopekwa, naangoka ti ishonopeke, ota nenepekwa.”

¹²Nena Jesus okwa ti kungoka e mu hiya: “Ngele to paka po omwiha nenge uulalelo, ino hiya ookuume koye nenge aamwanyoko aalumentu nenge aanezimo yoye nenge aashiinda yoye aayamba, oshoka mboka otaye ke ku hiya komeho e to futilwa mushoka we shi ningi.

¹³Hiya oohepele, iitiningili, iilema naaposi.

¹⁴Nena oto kala wa yambekwa, oshoka mbaka kaye na sha shoku ku pa. Ihe oto ka futwa kuKalunga, uuna mboka ya longa uuwanawa taa ka yumudhwa kuusi.”

¹⁵Gumwe gwaayenda mboka ya li ya kuutumba poshililo, sho e shi uvu, okwa ti kuJesus: “Aanelago oomboka taa ka lya koshililo mOshilongo shaKalunga.”

¹⁶Jesus okwa ti kuye: “Omusamane gumwe okwa longekidha oshituthi oshinene nokwa hiya aantu oyendji.

¹⁷Ano ethimbo lyoshituthi sho lya thiki, okwa tumu omumati gwe, e ki ithane aahiywa ta ti: ‘Ileni, ayihe oya longekidhwa.’

¹⁸Ihe ayehe oya tameke okutinda komukalo gumwe. Gwotango okwa ti komutumwa: ‘Ngame onda landa epya, ondi na okuya ko, ndi ke li tale.’

¹⁹Mukwawo okwa ti: ‘Ngame onda landa oonani omulongo, otandi yi, ndi ke dhi tale, nkene tadhi longo. Otandi ku indile, u mangulule ndje.’

²⁰Gumwe ishewe okwa ti: ‘Ngame opo nda hokana, itandi vulu okuya.’

²¹“Omumati okwa galuka nokwa hokololele omuwa gwe ashihe. Nena omusamane mwene gwegumbo okwa geye nokwa ti komumati gwe: ‘Endelela, u ye koondjila nokomapandaanda goshilando.’

²²Omumati okwa ti: ‘Omuwa, onda longo, ngaashi wa lombwele ndje, ihe natango omu na eha.’

²³Nena omuwa okwa ti komumati: ‘Inda natango koondjila nomapola, u ya lombwele, ye ye mo, opo egumbo lyandje lyu udhe.

²⁴Oshoka otandi mu lombwele: Kaku na nando ogumwe gwaalumentu mbeyaka yi ithanenwe tango, ta makele iikulya yandje.’ ”

²⁵Oongundu oonene dhaantu odhe ende pamwe naJesus. Oye okwa taalele kuyo e ta ti:

²⁶“Kehe ngoka te ya kungame, ita vulu okuninga omulongwa gwandje, ngele ita dhimbwa he nayina, omukiintu gwe noyana, aamwayina aalumentu naakiintu, naye mwene nokuli.

²⁷Kehe ngoka itaa humbata omushigakano gwe e ta landula ndje, ita vulu okuninga omulongwa gwandje.

²⁸“Ngele ku na gumwe e na edhiladhilo okutunga oshungo, oku na okukuutumba tango, a yalule kutya otayi pula shi thike peni, ye a tale, ngele oku na iimaliwa ya gwana oku yi tunga sigo ya pu.

²⁹Opo shaa ninge, sho a mana okutunga ekankameno, ta ka nyengwa okuhulitha etungo alihe. Nena ayehe mboka taye shi mono, otaye ke mu sheka

³⁰taa ti: ‘Omulumentu nguka okwa tameke okutunga, ihe okwa nyengwa okuhulitha etungo.’ ”

³¹“Omukwaniilwa gwontumba ngele ta yi, a ka kondjithe omukwaniilwa mukwawo gulwe, ita kuutumba manga, a dhiladhile, ngele ota vulu naalumentu omayuvi omulongo gumwe aguke okutsakaneka ngoka te ya nomayuvi omilongo mbali?

³²Ngele a nyengwa, ota tumu ko aatumwa, manga ngwiyaka e li kokule, e mu indile ombili.

³³Osho tuu kaku na nando ogumwe gwomune ta vulu okukala omulongwa gwandje, ngele ite etha ayihe e yi na.”

³⁴“Omongwa ogwo oshinima oshiwanawa, ihe uuna tagu hahuka, otagu toyalekwa we nashike?

³⁵Itagu opalele we mepya nenge muuhoho, otagu ekelwahi owala. Ngoka e na omakutsi, nu uve ko!”