Read Oshindonga-Ombiimbeli Ondjapuki 2008 Luke 16 Bible Online

Luke 16 - Oshindonga-Ombiimbeli Ondjapuki 2008 bible

Luke 16

¹Jesus okwa lombwele aalongwa ye a ti: “Okwa li ku na omulumentu omuyamba e na elenga lye, e li lombwelwa, tali hanagula po eliko lye.

²Oye okwe mu ithana nokwa ti kulyo: ‘Ondu uva shike kombinga yoye? Ulukila ndje, nkene wa kala to tonatele eliko lyandje.’

³Elenga olya tameke okwiipula: ‘Otandi ningi ngiini, omuwa gwandje sho ta kutha ndje uulenga? Iilonga iidhigu itandi yi vulu, ngame ishewe otandi si ohoni okuhehela.

⁴Ngashingeyi ondi shi shi shoka ndi na okuninga, opo uuna te kuthwa iilonga yandje, ndi kale ndi na ookuume mboka taa ka taamba ndje momagumbo gawo.’

⁵“Nena okwi ithana aantu ayehe mboka ya li ye na oongunga dhomuwa gwe. Oye okwa ti kungoka gwotango: ‘Oongunga ndhoka wa lila omuwa gwandje, odhi thike peni?’

⁶Oye okwa yamukula: ‘Omagadhi iiyuma ethele limwe.’ Elenga okwe mu lombwele a ti ‘Taamba eyalulo, kuutumba mbala, u nyole mo omilongo ntano.’

⁷Oye okwa ti ishewe komutiyali: ‘Ngoye oongunga dhoye odhi thike peni?’ ‘Ooshako ethele limwe dhiilya,’ osho a yamukula. Elenga okwe mu lombwele a ti: ‘Taamba eyalulo, u nyole mo omilongo hetatu.’ ”

⁸“Mwene gwelenga ndika efundja okwe li pandula, sho lya longo ngeyi noondunge. Oshoka aantu mboka haa ende pauyuni mbuka, oye na oondunge mokukalathana nooyakwawo ye vule aana yaKalunga.”

⁹Jesus okwa ti ihe: “Onkee ano otandi mu lombwele: ikongeleni ookuume neliko lyomuuyuni mbuka, opo uuna tali hulu po, mu ka taambwe megumbo lyaaluhe.

¹⁰Ngoka ti inekelwa miinima iishona, oti inekelwa wo miinima iinene; naangoka omufundja miinima iishona, oye wo omufundja miinima iinene.

¹¹Ne ano ngele kamu shi okwiinekelwa mokulongitha eliko lyomuuyuni mbuka, otamu vulu ngiini okwiinekelelwa eliko lyashili?

¹²Nongele ne kamu shi aainekelwa miinima mbyoka yaa shi yeni, olye te mu pe mbyoka yeni yene?

¹³“Kaku na omupika ta vulu okulongela aawa yaali; oshoka ota tondo gumwe, ye e ta kala e hole mukwawo, nenge ta simaneke nguka, ye e ta dhini ngwiyaka. Kamu vulu okulongela Kalunga pamwe nemona.”

¹⁴Aafarisayi sho yu uvu iinima mbika, oya yolo Jesus, oshoka oya li ye hole iimaliwa.

¹⁵Jesus okwa ti kuyo: “One ohamu iholola montaneho yaantu kutya one aayuuki, ihe Kalunga oku shi omitima dheni nkene dha tya. Oshoka shoka aantu taye shi tala shi na esimano, osho iihuna koshipala shaKalunga.”

¹⁶“Ompango yaMoses nomanyolo gaahunganeki oya hulile muJohannes Omushashi. Okuza mpoka elaka etoye tali popi Oshilongo shaKalunga, otali uvithwa, nakehe gumwe ota matuka, a ye mo.

¹⁷Ihe okuhulapo kwegulu nevi okuhwepo ku vule okukana po kwokankwanu kamwe komompango.”

¹⁸“Omulumentu kehe ngoka ta henge po omukiintu gwe e ta hokana gulwe, oye ota hondele. Naangoka ta hokana omuhengwa, naye ota hondele.”

¹⁹“Okwa li ku na omulumentu omuyamba ha zala oonguwo dhondilo noha li uutoye esiku kehe.

²⁰Ihe posheelo shegumbo lye opwa li pwa lala ohepele gumwe, edhina lye Lasarus, u udha omathina,

²¹nokwa hala okwiikutitha nuundjagumuke mboka tau gu koshitaafula shomuyamba. Olwindji oombwa odhe ya nodha latha omathina ge.

²²“Ano ohepele nguka okwa si nokwa papatelwa kaayengeli noye mu fala megulu puAbraham. Omuyamba okwa si wo nokwa fumvikwa.

²³Moshaasi okwa kala muuwehame. Sho a yelutha omeho, okwa mono kokule naye Abraham ye li naLasarus.

²⁴Oye nokwi igidha a ti: ‘Tate Abraham! Sila ndje ohenda, u tume Lasarus, a yaye omunwe gwe momeya, a talaleke elaka lyandje, oshoka ondi li muuwehame uunene momulilo!’

²⁵“Ihe Abraham okwa ti kuye: ‘Mumwandje, dhimbulukwa kutya, manga wa li kombanda yevi, owa pelwe iinima ayihe iiwanawa, ihe Lasarus okwa pelwe iinima ayihe mbyoka iiwinayi. Ngashingeyi Lasarus oku li mehala ndika ewanawa, manga ngoye to ehamekwa.

²⁶Ihe nando ongaaka, pokati ketu nangoye opu na olumbogo olunene, opo mboka ya hala okutaagulukila hoka kune, kaaye shi vule, nenge ya hala okutaagulukila huka kutse.’

²⁷Omuyamba okwa ti: ‘Ano otandi ku indile tatekulu, u tume Lasarus kegumbo lyatate.

²⁸Ondi na ko aamwameme aalumentu yatano, opo e ke ya londodhe, kaaye ye mehala ndika lyuuwehame.’

²⁹“Abraham okwa ti: ‘Aamwanyoko oye na oohapu dhaKalunga, naa vulike kudho.’

³⁰Omuyamba okwa yamukula: ‘Aawe, tate Abraham! Andola okwa li taku yumuka gumwe gwomaasi e ta yi kuyo, ando otaa etha uulunde.’

³¹Abraham okwa ti: ‘Ngele itaa vulika koohapu dhaKalunga, natango itaa itaale, nando naku yumuke gumwe gwomaasi.’ ”