Read Oshindonga-Ombiimbeli Ondjapuki 2008 Luke 18 Bible Online

Luke 18 - Oshindonga-Ombiimbeli Ondjapuki 2008 bible

Luke 18

¹Jesus okwe ya lombwele eyele ndika, opo e ya longe, nkene ye na okugalikana aluhe yo yaa vulwe, a ti:

²“Moshilando shimwe omwa li mu na omutokoli ihaa tila Kalunga ye ke na ko nasha naantu ooyakwawo.

³Moshilando osho tuu shoka omwa li wo omuselekadhi e ya olwindji kuye nokwa ti: ‘Uthila ndje pauyuuki kombinga yoohapu dhetu nomutamaneki gwandje.’

⁴Omutokoli okwa li ta tindi ethimbo ele, ihe konima okwi ipopile a ti: ‘Nando ihandi tila Kalunga nokandi na ko nasha naantu ooyakwetu,

⁵ihe molwaashoka omuselekadhi nguka ote etele ndje uupyakadhi, onda hala oku mu uthila, opo kaa kenyaneke ndje nokuya aluhe kungame.’ ”

⁶Omuwa okwa ti ihe: “Pulakeneni omutokoli nguka ke na uuyuuki sho a ti.

⁷Ano Kalunga itu uthile ando aahogololwa mboka haye mu ithana omutenya nuusiku? Ote ya tegelelitha tuu ethimbo ele inee ya kwatha?

⁸Otandi mu lombwele, ote ya uthile mbalambala. Ihe Omuna gwOmuntu uuna te ke ya, ota ka adha ko tuu eitaalo kombanda yevi?”

⁹Jesus okwa hokololele mboka yi idhiladhilile yo yene kutya oyo aayuuki e taa dhini aantu yalwe, ndika eyele:

¹⁰“Aalumentu yaali oya yi motempeli, ya ka galikane, gumwe omufarisayi nomukwawo omufendelithi.”

¹¹“Omufarisayi okwa thikama i ikalela nokwa galikana puye mwene e ta ti: ‘Kalunga, otandi ku hambelele, oshoka ngame inandi fa aantu yalwe: aayugi, aakolokoshi naahondeli; otandi ku hambelele wo, sho inaandi fa omufendelithi ngono.

¹²Iikulya ohandi idhilike omasiku gaali moshiwike kehe nohandi ku pe oshitimulongo shomwaayihe mbyoka nde yi likola.’

¹³“Ihe omufendelithi okwa thikama kokule ye ina vula okutala kegulu, oshoka okwa sa oluhodhi e ta ti: ‘Kalunga, sila ndje ohenda, ongame omulunde!’ ”

¹⁴Opo Jesus okwa ti: “Otandi mu lombwele: nguka okwa shuna kegumbo omuyuuki koshipala shaKalunga e vule mukwawo. Oshoka ngoka ti inenepeke, ota shonopekwa, naangoka ti ishonopeke, ota nenepekwa.”

¹⁵Aantu yamwe oye eta uuhanona wawo kuJesus, a tenteke iikaha ye kuwo. Ihe aalongwa sho ye shi mono, oya ganda mboka ye u eta.

¹⁶Ihe Jesus okwi ithana uunona, u ye kuye, a ti: “Etheni uunona, u ye kungame. Inamu u keelela ko, oshoka Oshilongo shaKalunga oshaamboka ye u fa.

¹⁷Ongame tandi mu lombwele: Oongoka itaa taamba Oshilongo shaKalunga ongokanona, oye ita yi mo musho.”

¹⁸Gumwe gwomaakuluntu Aajuda okwe mu pula a ti: “Muhongi omwaanawa, nandi longe shike, ndi mone omwenyo gwaaluhe?”

¹⁹Jesus okwe mu pula: “Omolwashike to ti ndje omwaanawa? Kaku na nando omuntu omwaanawa, oKalunga awike.

²⁰Iipango ou yi shi: ‘Ino hondela, Ino yaka, Ino lundila, Simaneka ho nanyoko.’ ”

²¹Nguka okwe mu yamukula a ti: “Ayihe mbika onde yi gwanitha okuza muugundjuka wandje.”

²²Jesus sho e shi uvu, okwa ti kuye: “Oku na oshinima shimwe natango u na oku shi ninga. Landitha po ayihe mbyoka u yi na, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”

²³Ano omulumentu nguka sho u uvu oohapu ndhoka, okwa tameke okusa oluhodhi noonkondo, oshoka okwa li e na eliko olindji.

²⁴Jesus sho a dhimbulula kutya okwa sa oluhodhi, okwa ti: “Aayamba oye na uudhigu ngiini okuya mOshilongo shaKalunga!

²⁵Okupitila kwongamelo mombululu yonane okuhwepo ku vule okuya kwomuyamba mOshilongo shaKalunga.”

²⁶Aantu mboka ye dhi uvu, oya pula ya ti: “Olye ano ta vulu okuhupithwa?”

²⁷Jesus okwe ya yamukula a ti: “Shoka tashi nyenge aantu, itashi nyenge Kalunga.”

²⁸Nena Petrus okwa ti: “Tala, otse otwa thigi po omagumbo getu e tatu ku landula.”

²⁹Jesus okwa ti kuyo: “Eeno, ihe ongame tandi mu lombwele, kehe ngoka ta thigi po egumbo nenge omukiintu nenge aamwayina aalumentu nenge aakuluntu ye nenge oyana omolwOshilongo shaKalunga,

³⁰ota ka mona ko oyindji muuyuni mbuka, nomwenyo gwaaluhe ote ke gu pewa muuyuni tau ya.”

³¹Jesus okwi ikalekele aalongwa omulongo nayaali nokwa ti kuyo: “Tala, otatu yeni kuJerusalem, hoka taku ka tsakanithwa ayihe mbyoka ya nyolwa kaahunganeki tayi popi Omuna gwOmuntu.

³²Oye ota ka gandjwa miikaha yaapagani, mboka taye mu yolo, taye mu sheke e taye mu hiyile omayeye.

³³Oyo otaye ke mu dhenga e taye mu dhipaga, ihe esiku etitatu ota ka yumudhwa.

³⁴“Aalongwa oya li yaa uvite nando osha; oohapu ndhoka odha li dhe ya holekwa, yo inaa uva ko kutya Jesus okwa hala okutya shike.”

³⁵Jesus sho e ya popepi naJeriko, omuposi gumwe okwa kuutumba pooha dhondjila ta hehela.

³⁶Sho u uvu, ongundu yaantu tayi ende po, okwa pula a ti: “Oshike shino?”

³⁷Aantu oye mu lombwele ya ti: “OJesus Omunasareti te ende po.”

³⁸Oye okwi igidha ihe a ti: “Jesus, omuna gwaDavid, sila ndje ohenda!”

³⁹Aantu yokomeho oye mu ganda, a mwene. Ihe omuposi okwa dhiginine okwiigidha mokule a ti: “Omuna gwaDavid, sila ndje ohenda!”

⁴⁰Jesus okwa thikama nokwe ya lombwele, ye ete omuposi kuye. Sho e ya lwopopepi, Jesus okwe mu pula:

⁴¹“Owa hala, ndi ku ningile shike?” Oye okwa ti: “Omuwa, onda hala, ndi mone ko ishewe.”

⁴²Nena Jesus okwa ti kuye: “Tonata! Eitaalo lyoye lye ku aludha.”

⁴³Mbalambala okwa mono ko e ta landula Jesus ye ta pandula Kalunga. Aantu sho ye shi mono, ayehe oya hambelele Kalunga.