Read Oshindonga-Ombiimbeli Ondjapuki 2008 Luke 19 Bible Online

Luke 19 - Oshindonga-Ombiimbeli Ondjapuki 2008 bible

Luke 19

²Okwa li ku na omukuluntu gwaafendelithi, omulumentu omuyamba, edhina lye Sakeus.

³Oye okwa kambadhala, a mone ye a tseye Jesus, ihe shoka okwa li omuhupi komuthika, okwa nyengwa oku mu mona omolwowindji waantu.

⁴Oye okwa matuka a tetekele komeho gongundu nokwa londo komukwiyu, a wape okumona Jesus, oshoka ondjila oya li ye enda pomukwiyu.

⁵Ano Jesus sho e ya mpoka, okwa ligamene pombanda nokwa ti kuSakeus: “Sakeus, londoloka mbala, oshoka ondi na oku ka talela po nena maandjeni.”

⁶Sakeus nokwa taamba Jesus nenyanyu.

⁷Aantu ayehe mboka ye shi mono, oya ngungutula ya ti: “Nguno okwa yi, a ka talele po omulumentu omulunde.”

⁸Nena Sakeus okwa thikama nokwa lombwele Omuwa a ti: “Omuwa, pulakena! Etata lyeliko lyandje otandi ke li pa oohepele, nongele ku na ngoka nde mu yugu nokulongitha iifundja, otandi ke mu shunithila iinima oyo tuu mbyoka lune.”

⁹Jesus okwa ti kuye: “Nena tuu ndjika ehupitho lye ya megumbo ndika, oshoka naye wo omuna gwaAbraham.

¹⁰Oshoka Omuna gwOmuntu okwe ya okukonga nokuhupitha shoka sha kana.”

¹¹Jesus okwa hokololele mboka ya li taye mu pulakene eyele ndika. Oye okwa li popepi naJerusalem naantu oya li ye shi, Oshilongo shaKalunga otashi holoka mbala.

¹²Jesus okwa ti ihe: “Okwa li ku na omulumentu omuvalekele e ta yi koshilongo shokokule, a ka ningwe omukwaniilwa, ye a galuke.

¹³Manga inaa ya, okwi ithana aamati ye omulongo nokwe ya pe kehe gumwe iimaliwa iisiliveli omulongo e ta ti kuyo: ‘Indeni, mu ke yi likolithe iikwawo, manga tandi galuka.’

¹⁴Ihe aakwashilongo she oye mu tondo noye mu tumine aatumwa ya ti: ‘Omulumentu nguka inatu mu hala, a ninge omukwaniilwa gwetu.’

¹⁵“Omulumentu okwa ningwa omukwaniilwa e ta galuka. Opo okwi ithana aamati ye, mboka e ya pele iimaliwa, ye ye kuye, opo a tseye kutya oya likola shi thike peni.

¹⁶“Gwotango okwe ya nokwa ti: ‘Omuwa, iimaliwa yoye omulongo onde yi likolitha iikwawo omulongo.’

¹⁷Oye okwa ti: ‘Yaloo, omumati ngoye omwaanawa! Ongoye sho wa li omwiinekelwa miinima iishona, otandi ke ku pa epangelo lyiilando omulongo.’

¹⁸Omutiyali okwe ya nokwa ti: ‘Omuwa, iimaliwa yoye omulongo onde yi likolitha iikwawo itano.’

¹⁹Nguka okwe mu lombwele a ti: ‘Ngoye oto ka pangela iilando itano.’

²⁰“Mukwawo okwe ya e ta ti: ‘Iimaliwa yoye oyo mbika; onda kala nde yi pungula moshikayiwa.

²¹Ngame onda li nde ku tila, oshoka ongoye omulumentu omudhigu. Oho kutha shono shaa shi shoye, noho teya shoka inoo shi kuna.’

²²Oye okwa ti kuye: ‘Ongoye omumati omukolokoshi! Otandi ku pangula omolwoohapu dhoye. Ou shi ndje omudhigu handi kutha shoka shaa shi shandje, nohandi teya shoka inaandi shi kuna.

²³Omolwashike inoo tula iimaliwa yandje mombaanga? Opo ando ngame sho nda galuka, nda galulilwa shoka shandje kwa gwedhelwa ontanitho.’

²⁴“Nena omukwaniilwa okwa lombwele mboka ya li ya thikama mpoka: ‘Mu kutheni iimaliwa mbyoka, mu yi pe ngoka a likolitha iimaliwa omulongo.’

²⁵Oyo oya ti kuye: ‘Ngoka oku na nale iimaliwa iikwawo omulongo.’

²⁶Oye okwe ya yamukula a ti: ‘Ngoka e na, oye ta pewa oshindji. Ihe ngoka kee na, oye ta kuthwa naashoka e shi na.

²⁷Ngashingeyi aatondi yandje mbaka inaa hala, ndi ninge omukwaniilwa gwawo, ye eteni nkuka, mu ya dhipagele koshipala shandje.’ ”

²⁸Jesus sho a popi ngaaka, okwa kwata komeho u uka kuJerusalem.

²⁹Sho a thiki popepi naBetfage naBetania pOndundu yooholivi, okwa tetekelitha aalongwa ye yaali

³⁰e ta ti kuyo: “Indeni komukunda ngwiyaka gu li komeho geni. Ngele mwa thiki ko, otamu ka mona ontana yokasino ya pandekwa, ndjoka inaayi kayilwa nando onale komuntu. Yi pandukululeni mo, ne mu yi ete nkuka.

³¹Ngele ku na ngoka te mu pula: ‘Otamu yi pandukululile shike?’ Mu lombweleni kutya Omuwa okwe yi pumbwa.”

³²Oyo oya yi noya adha ayihe yi li, ngaashi Jesus e yi ya lombwele.

³³Ano manga taa pandukulula mo ontana, ooyene oye ya pula ya ti: “Omolwashike tamu yi pandukulula mo?”

³⁴Oyo oya yamukula ya ti: “Omuwa okwe yi pumbwa.”

³⁵Oyo oye yi eta kuJesus noya yala oonguwo pombunda yayo e taa kayilike ko Jesus.

³⁶Manga te ende, aantu oya yala oonguwo dhawo mondjila.

³⁷Ano sho a thiki popepi naJerusalem, pehala mpoka ondjila tayi kuluka tayi zi kOndundu yooholivi, ongundu onene yaalongwa ye oya tameke okupandula nokuhambelela Kalunga mokulekule omolwiilongankondo ayihe mbyoka ye yi mono

³⁸ya ti: “Omukwaniilwa ngoka te ya medhina lyOmuwa, na lalekwe nuuyamba kuKalunga! Ombili omegulu nesimano olyaKalunga!”

³⁹Nena yamwe yomaafarisayi oya lombwele Jesus mokati kongundu ya ti: “Muhongi, lombwela aalongwa yoye, ya mwene.”

⁴⁰Jesus okwa ti kuyo: “Otandi mu lombwele: ngele taa mwena, nena omamanya otagi igidha.”

⁴¹Jesus sho a hedha popepi noshilando, okwe shi tala e te shi lili

⁴²a ti: “Ando ongoye wa dhimbulula nena kutya oshike we shi pumbwa omolwombili yoye. Ihe shika osha holekwa omeho goye.

⁴³Oshoka omasiku otage ke ya, uuna aatondi yoye taye ke ku kondeka e taye ku kundukidha koombinga adhihe.

⁴⁴Oyo otaye ku hanagula po thiluthilu naantu ayehe ye li mo; itaa ka thiga po mpaka emanya lya tentekwa kekwawo inaaye li kumuna po, oshoka ngoye ino dhimbulula ethimbo ndyoka Kalunga e ya, e ku hupithe.”

⁴⁵Jesus okwa yi motempeli nokwa tameke okutidha mo aahalithi

⁴⁶e ta ti kuyo: “Okwa nyolwa: ‘Ongulu yandje oyi na okwiithanwa ongulu yegalikano,’ ihe ne omwe yi ningi ombogo yaayugi.”

⁴⁷Esiku kehe Jesus okwa li ta longo aantu motempeli. Opo aayambi aakuluntu, aalongimpango naakuluntu yoshigwana oye mu kongo, ye mu dhipage,

⁴⁸ihe oya nyengwa oku shi ninga, oshoka aantu ayehe oya li ya hokwa oku mu pulakena.