Read Oshindonga-Ombiimbeli Ondjapuki 2008 Luke 2 Bible Online

Luke 2 - Oshindonga-Ombiimbeli Ondjapuki 2008 bible

Luke 2

¹Pomasiku ngeyaka omupangeli Omuroma Augustus okwa gandja oshipango kutya aantu ayehe ye li mepangelo lye, oye na okwiinyolitha, opo ya gandje oompale.

²Einyolitho ndika olyo lyotango nolya ningwa, Kirenius sho a li omuleli gwaSiria.

³Aantu ayehe oya yi, ye ki inyolithe, kehe gumwe omoshilando shaandjawo.

⁴Josef wo okwa thikama muNasaret shomuGalilea nokwa yi kuJudea koshilando shaDavid, shi ithanwa Betlehem, oshoka oye okwa li omunezimo lyaDavid.

⁵Oye okwa yi, e ki inyolithe pamwe nomuyalekwa gwe Maria, ngoka a li omusimba.

⁶Ano manga ya li muBetlehem, ethimbo lyaMaria lyokuvala olya thiki.

⁷Oye okwa yelipa osheeli she shokamati nokwe ka dhingile momalapi e te ka langeke metemba lyokulila iimuna, oshoka mongulu yaayenda kamwa li mu na eha.

⁸Komukunda ngoka okwa li ku na aasita ye li kelundu ya langela iimuna yawo uusiku.

⁹Omuyengeli gwOmuwa okwe ya holokele, neadhimo lyOmuwa olye ya adhimine. Aasita oya haluka noonkondo.

¹⁰Omuyengeli okwa ti kuyo: “Inamu tila! Oshoka ngame otandi mu uvithile elaka lyenyanyu enene tali ningi lyaantu ayehe.

¹¹Nena tuu ndjika mwa valelwa Omukulili moshilando shaDavid. Oye Kristus, Omuwa.

¹²Endhindhiliko lyoku mu dhimbulula olyo ndika: Otamu ka mona okahanona ka dhingilwa nomalapi noka langekwa metemba lyokulila iimuna.”

¹³Ombaadhilila pomuyengeli nguka opwa li pu na ongundu onene yaayengeli yomegulu, ya hambelele Kalunga ya ti:

¹⁴“Esimano olyaKalunga gwokombandambanda! Nombili kombanda yevi maantu e ya hokwa!”

¹⁵Aayengeli sho ya zi po puyo, ya shuna megulu, aasita oya lombwelathana ya ti: “Tu yeni ano kuBetlehem, tu ka tale shoka sha ningwa ko, Omuwa e shi tu hololele.”

¹⁶Oyo oya yi nokweendelela noya mono Maria naJosef nokahanona ka langekwa metemba lyokulila iimuna.

¹⁷Aasita sho ya mono okahanona, oya hokololele aantu shoka omuyengeli a tile okanona haka.

¹⁸Ayehe mboka ye shi uvu, oya kuminwa oohapu ndhoka ye dhi hokololelwa kaasita.

¹⁹Ihe Maria okwa kala ta dhiladhila oohapu ndhoka adhihe nokwe dhi pungula momwenyo gwe.

²⁰Aasita oya shuna nokusimaneka nokuhambelela Kalunga, oshoka ayihe oye yi uvu noye yi mono, ngaashi omuyengeli e ya lombwele.

²¹Sho pwa piti omasiku gahetatu, okanona oka fukalekwa noka lukwa Jesus, edhina tuu ndyoka ke li lukwa komuyengeli, manga ka li mela lyayina.

²²Omasiku geiyopaleko pampango yaMoses sho ga pu ko, oya fala okanona kuJerusalem e taye ke eta koshipala shOmuwa.

²³Shika osha nyolwa mompango yOmuwa kutya: Okanona okasheeli kehe taka valwa kuyina, oke na okuyoololelwa Omuwa,

²⁴nonaku gandjwe omayambo: omatendenguti gaali nenge uungutyona uyali.

²⁵Ano muJerusalem omwa li mu na omulumentu, edhina lye Simeon. Oye okwa li omuyuuki, ha tila Kalunga nokwa kala a tegelela ehupitho lyaIsrael. Ombepo Ondjapuki oya li muye.

²⁶Oye okwa li a tseyithilwa kOmbepo Ondjapuki kutya ita si, manga inaa mona Omugwayekwa gwOmuwa.

²⁷Ombepo Ondjapuki noya fala Simeon motempeli. Nena aakuluntu yaJesus oye mu eta kotempeli noye mu ningile, ngaashi ompango tayi shi ti.

²⁸Simeon oku ukata okanona momaako ge nokwa hambelele Kalunga a ti:

²⁹“Ngashingeyi Omuwa, sho wa gwanitha omauvaneko goye, laleka ndje ihe, omuntu gwoye, ndi ye nombili.

³⁰Oshoka onda mono nomeho gandje ehupitho ndyoka

³¹we li longekidha montaneho yaantu ayehe:

³²Uuyelele wokuminikila aapagani, nesimano lyaantu yoye Aaisraeli.”

³³He nayina oya kuminwa oohapu ndhoka Simeon e dhi popi.

³⁴Simeon okwe ya yambeke e ta ti kuMaria, yina yokanona: “Omunona nguka okwa tulwa po kuKalunga okupundukitha nokuyambukitha oyendji yomAaisraeli. Oye endhindhiliko lya zi kuKalunga, ihe oyendji itaye ke mu taamba.

³⁵Osho ngeyi omadhiladhilo gawo omawinayi ngoka ga holama otage ya puuyelele. Ihe uudhigu ongegongamwele lya tsa otau ka ulula omutima gwoye.”

³⁶Okwa li ku na omuhunganeki omukiintu, edhina lye Anna, omuna gwaFanuel, gwomezimo lyaAser. Oye okwa li a koka. Manga a li omukadhona, okwa hokanwa e ta kala nomulumentu gwe oomvula heyali;

³⁷Okwa adhika ihe omuselekadhi gwoomvula omilongo hetatu nane. Ethimbo alihe okwa kala motempeli koshipala shaKalunga uusiku nomutenya ti idhilike iikulya nokugalikana.

³⁸Ethimbo olyo tuu ndyoka okwe ya po nokwa hambelele Kalunga e ta hokolola okanona kwaayehe mboka ya li ya tegelela ethimbo lyekulilo lyaJerusalem.

³⁹Sho ya tsakanitha ayihe pampango yOmuwa, oya shuna kuGalilea koshilando shaandjawo kuNasaret.

⁴⁰Omunona okwa koko nokwa kolo u udha oondunge nokwa hokiwa kuKalunga.

⁴¹Aakuluntu yaJesus oya li haa yi omumvo kehe kuJerusalem koshituthi shOpaasa.

⁴²Jesus sho a gwanitha oomvula omulongo nambali, oya yi naye koshituthi, ngaashi hashi ningwa aluhe.

⁴³Omasiku goshituthi sho ga piti, oya shuna kegumbo, ihe Jesus okwa thigala muJerusalem. Aakuluntu oya li inaaye shi tseya kutya oku li peni.

⁴⁴Oya tengeneke owala kutya oku li mongundu yaayendi, sigo ye ende esiku alihe. Opo ihe oya tameke oku mu konga maanezimo nomaashiwikile.

⁴⁵Sho inaaye mu mona, oya shuna kuJerusalem, ye ke mu konge.

⁴⁶Konima yomasiku gatatu oye mu mono ihe motempeli, a kuutumba mokati kaalongi Aajuda, te ya pulakene ye te ya pula.

⁴⁷Ayehe mboka ye mu pulakene, oya kuminwa oondunge dhe nomayamukulo ge.

⁴⁸Aakuluntu ye sho ye mu mono, oya kumwa. Yina nokwa ti kuye: “Mumwandje, omolwashike we tu ningile ngeyi? Ngame naho otwe ku kongo nokunika uuthigwa.”

⁴⁹Jesus okwe ya yamukula a ti: “Omwa kongele ndje shike? Kamu shi shi nani kutya ngame ondi na okukala mumbika yaTate?”

⁵⁰Ihe kaya li yu uvite ko kutya okwa hala oku ya lombwela shike.

⁵¹Jesus okwa zi mo pamwe nayo e taa shuna kuNasaret nokwa kala ha vulika kuyo. Yina okwa pungula oohapu ndhoka adhihe momwenyo gwe.

⁵²Jesus okwa koko palutu nomoondunge, a hokiwa kuKalunga nokaantu.