Read Oshindonga-Ombiimbeli Ondjapuki 2008 Luke 20 Bible Online

Luke 20 - Oshindonga-Ombiimbeli Ondjapuki 2008 bible

Luke 20

¹Esiku limwe, Jesus sho a li ta longo aantu motempeli e te ya uvithile elaka etoye, aayambi aakuluntu naalongimpango pamwe naakuluntu yoshigwana oye ya

²e taa ti kuye: “Tu lombwela, okoonkondo dhalye ho longo ngeyi? Olye e ku pa epitikilo lyokuninga iinima ya tya ngeyi?”

³Jesus okwe ya yamukula a ti: “Nangame wo otandi mu pula epulo limwe. Yamukulii ndje.

⁴Okushasha kwaJohannes okwa zi kuKalunga nenge omaantu?”

⁵Oyo oya kundathana ya ti: “Ngele tatu ti: ‘Okwa zi kuKalunga,’ nena ota ka pula: omolwashike inaamu itaala Johannes?

⁶Ihe ngele tatu ti: ‘Omaantu,’ nena aantu ayehe mbaka otaye ke tu dhipaga nomamanya, oshoka oye shi shi kutya Johannes oye omuhunganeki.”

⁷Oyo oya yamukula ya ti: “Katu shi wo mpoka kwa za.”

⁸Nena Jesus okwa ti kuyo: “Ano nangame wo itandi mu lombwele, okoonkondo dhalye tandi longo ngeyi.”

⁹Nena Jesus okwa lombwele aantu eyele ndika: “Omusamane gumwe okwa tsike omiti dhomiviinu meyana lye nokwa langeke mo aalongi yeyana e ta yi koshilongo shilwe, nkoka ta kala ko ethimbo ele.

¹⁰Ethimbo lyokukola oomviinu sho lya thiki, okwa tumu omupika gwe kaalongi yeyana, ye mu pe iiyimati mbyoka e na oku yi pewa. Ihe aalongi oya dhenge omupiya noye mu shunitha e li iikaha yowala.

¹¹Oye a tumu ko ishewe omupika gulwe, naanguka wo oye mu dhenge noye mu sitha ohoni e taye mu shunitha e li iikaha yowala.

¹²Oye okwa tumu ko omupika omutitatu. Naye wo aalongi oye mu dhenge e taye mu umbu mo meyana.

¹³Nena mwene gweyana okwa ti: ‘Otandi ningi ngiini? Otandi tumu ko omumwandje omuholike; nguka otaye mu tila.’

¹⁴Ihe aalongi yeyana sho ye mu mono, oya lombwelathana ya ti: ‘Nguno omuna gwamwene gweyana. Tu mu dhipageni, eliko li ninge lyetu!’

¹⁵Oyo oye mu umbu mo meyana e taye mu dhipaga.” “Mwene gweyana ota ka ninga ngiini aantu mbano?” Jesus okwa pula.

¹⁶“Oye ote ya e te ya dhipaga po, neyana ote li pe yalwe.” Aantu sho ye shi uvu, oya ti: “Itashi vulika!”

¹⁷Jesus okwe ya tala e te ya pula ta ti: “Enyolo ndika otali ti ngiini? ‘Emanya ndyoka aatungi ye li ekelehi, olyo lya ningi emanya li na oshilonga li vule agehe.’ ”

¹⁸“Kehe tuu ngoka ta pundukile kemanya ndyoka, oye ota teka; naangoka ta gwilwa kemanya ndyoka, oye ota nyanyagulwa.”

¹⁹Aalongimpango naayambi aakuluntu oya kambadhala okukwata Jesus pethimbo tuu ndyoka, oshoka oya dhimbulula kutya oyo taa popiwa meyele ndika, ihe oya tila aantu.

²⁰Oyo oya tegelele ompito yilwe noya futu meholamo aalumentu yamwe, ye shi okweenda miineya. Mbaka oye ya tumu kuJesus, ye mu kwate moohapu, opo ye mu gandje kepangelo nomeutho lyomuleli gwoshilongo.

²¹Aalumentu yiineya oya ti kuJesus: “Muhongi, otu shi shi kutya oho popi noho longo aantu oshili. Ongoye iho tala olupe lwomuntu, nondjila yaKalunga oto yi longo pashili.

²²Tu lombwela: Osho opala tuu, tu pe omupangeli Omuroma oompale, nenge inashi opala?”

²³Jesus okwa dhimbulula omakoto gawo e ta ti kuyo:

²⁴“Ulukilii ndje oshimaliwa shoshene. Efano ndika nenyolo ndika li li ko, olyalye?” Oyo oya yamukula: “Olyomupangeli Omuroma.”

²⁵Nena Jesus okwe ya lombwele a ti: “Ano shono shomupangeli, shi peni omupangeli, naashoka shaKalunga, shi peni Kalunga.”

²⁶Ano oyo oya nyengwa oku mu kwata nando omoshinima shimwe montaneho yaantu, onkee oya mwena owala ya kuminwa eyamukulo lye.

²⁷Aasadukayi yamwe oye ya kuJesus oomboka haa ti, kaku na eyumuko noye mu pula ya ti:

²⁸“Muhongi, Moses okwe tu nyolele ngeyi: ‘Ngele ku na omulumentu inaa mona oluvalo, ye ta si, nena omukiintu gwe na hokanwe komumwayina, opo nakusa a monenwe oluvalo.’

²⁹Okwa li ku na aalumentu aamwayinathana ye li yaheyali. Omutango okwa hokana nokwa si kee ne oluvalo.

³⁰Osho wo omutiyali okwa hokana po omuselekadhi ngoka,

³¹osho omutitatu wo. Shika osha ningwa kwaayehe yaheyali, ihe oya si kaaye na oluvalo.

³²Ohugunina omukiintu okwa si wo.

³³Ano mesiku uuna aasi taa ka yumudhwa, ota ka ninga gwalye mwaambaka, oshoka ayehe yaheyali oya li ye mu hokana?”

³⁴Jesus okwe ya yamukula a ti: “Aantu yomuuyuni mbuka ohaa hokana nohaa hokanwa,

³⁵ihe mboka ya talwa ya gwana okuyumudhwa kuusi noyo opalela okuya muuyuni mbwiyaka tau ya, ihaa hokana noihaa hokanwa.

³⁶Oyo oya fa aayengeli yaKalunga noitaa si. Oyo aana yaKalunga, oshoka oya yumudhwa kuusi.

³⁷NaMoses wo okwe shi holola sha yela kutya aasi otaa ka yumudhwa. Mehokololo ndyoka tali popi oshihwa sha hwama ota ti kutya Omuwa oye Kalunga kaAbraham, Kalunga kaIsak naKalunga kaJakob.

³⁸Kalunga ke shi Kalunga kaasi, aawe, okaanamwenyo; oshoka mekwatathano naye ayehe otaa kala ye na omwenyo.”

³⁹Nena yamwe yomaalongimpango oya yi mo ya ti: “Owa yamukula nawa, Muhongi.”

⁴⁰Okuza mpoka inaa vula we okupula Jesus sha.

⁴¹Jesus okwa ti kuyo: “Aantu otaa vulu ngiini okutya, Kristus oye omuna gwaDavid?

⁴²Oshoka David ye mwene membo lyOmapisalomi ota ti: ‘Omuwa okwa lombwele Omuwa gwandje: Kala omutumba kolulyo lwandje,

⁴³sigo tandi tula aatondi yoye kohi yoompadhi dhoye.’

⁴⁴“David ngele ote mu ithana Omuwa, ano Kristus oye omwana pamukalo guni?”

⁴⁵Aantu ayehe manga ya li taa pulakene, Jesus okwa ti kaalongwa ye:

⁴⁶“Angaleni aalongimpango mboka ye hole okweenda ya zala oonguwo oondeendeka nokukundilwa pokuma hapu gongala aantu. Oyo oye hole kiipundi yokomeho moosinagoga nopomahala ga simana miituthi.

⁴⁷Oyo ohaa li omagumbo gaaselekadhi nohaa galikana omagalikano omaleeleka gokumonika kwowala. Oyo otaa ka mona epangulo edhigu.”