Read Oshindonga-Ombiimbeli Ondjapuki 2008 Luke 22 Bible Online

Luke 22 - Oshindonga-Ombiimbeli Ondjapuki 2008 bible

Luke 22

¹Ano ethimbo lyoshituthi shiikwiila inaayi fulikwa, nokutya Opaasa, olya thiki.

²Aayambi aakuluntu naalongimpango oya li taa kongo ompito, ya dhipage Jesus, oshoka oya li ya tila aantu.

³Nena Satana okwa yi muJudas i ithanwa Iskariot, gumwe gwaamboka omulongo nayaali.

⁴Opo Judas okwa yi nokwa kundathana naayambi aakuluntu nosho wo naakuluntu yaalangeli yotempeli, nkene e na okugandja Jesus miikaha yawo.

⁵Oyo oya nyanyukwa noyu uvaneke, ye mu pe iimaliwa.

⁶Judas okwe shi zimine nokwa kala ta kongo ethimbo lyo opala okugandja Jesus kuyo, manga aantu inaaye shi tseya.

⁷Esiku olya thiki pomasiku goshituthi shiikwiila inaayi fulikwa, uuna onzigona yOpaasa yi na okudhipagwa.

⁸Jesus okwa tumu Petrus naJohannes nokwe ya lombwele a ti: “Indeni, mu ke tu longekidhile uulalelo wOpaasa, tu u lye.”

⁹Oyo oye mu pula ya ti: “Openi wa hala, tu ke u longekidhe?”

¹⁰Oye okwa ti: “Pulakeneni! Ngele mwa yi moshilando, otamu ka tsakaneka omulumentu a humbata etenga lyomeya. Mu landuleni sigo omegumbo moka u uka,

¹¹e tamu lombwele mwene gwegumbo tamu ti: ‘Muhongi ote ku pula: Openi pu na oshinyanga shaayenda, ndi lile mo pamwe naalongwa yandje uulalelo wOpaasa?’

¹²Oye note mu ulukile ondjugo onene yopombanda yo opalekwa. Longekidheni ayihe.”

¹³Oyo oya yi noya adha ayihe yi li, ngaashi Jesus e ya lombwele, e taa longekidha uulalelo wOpaasa.

¹⁴Ethimbo sho lya thiki, Jesus okwa kuutumba poshililo pamwe naayapostoli.

¹⁵Oye nokwa ti kuyo: “Onda yuulukwa vale okulya Opaasa ndjika pamwe nane, manga inaandi hepekwa.

¹⁶Oshoka otandi mu lombwele: Itandi li we Opaasa, sigo uuna tandi ka lya ndjiyaka yomOshilongo shaKalunga.”

¹⁷Nena Jesus okwa kutha oshitenga, a hambelele nokwa ti: “Shi taambeni, mu paathane.

¹⁸Oshoka otandi mu lombwele: Okuza mpaka itandi nu we omaviinu, Oshilongo shaKalunga manga inaashi holoka.”

¹⁹Oye a kutha wo oshikwiila, a hambelele, okwe shi pambula nokwe shi ya pe e ta ti: “Shika osho olutu lwandje ndoka talu mu gandjelwa. Shi ningeni nokudhimbulukwa ndje.”

²⁰Osho tuu wo, sho ya mana okulya, okwe ya pe oshitenga e ta ti: “Oshitenga shika osho ehangano epe lyomombinzi yandje ndjoka tayi tilwahi molweni.”

²¹“Ano tala! Ngoka ta gwaaleke ndje, oku li mpaka poshililo pamwe nangame.

²²Oshoka Omuna gwOmuntu oku na okusa, ngaashi Kalunga e shi tokola nale; ihe yaye omuntu ngoka te mu gwaaleke!”

²³Oyo oya tameke okupulathana kutya olye ngoka gwomokati kawo te shi ningi.

²⁴Mokati kaalongwa omwa penduka edhiladhilo kutya olye ngoka e na okutalwa omukuluntu e vule ooyakwawo ayehe.

²⁵Jesus okwa ti kuyo: “Aakwaniilwa yomuuyuni mbuka ohaa pangele aantu yawo koonkondo, naapangeli yawo oya hala, yi ithanwe ookuume kaantu.

²⁶Ihe ne inamu kala ngaaka! Omukuluntu gwomokati keni na ninge omuhugunini, naangoka gwokomeho na ninge omuyakuli.

²⁷Oshoka olye e na esimano, oye ngoka a kuutumba poshililo ta li nenge oye ngoka ta yakula? Ndishi oye ngoka a kuutumba owala. Ihe ngame ondi li mokati keni nda fa omuyakuli.”

²⁸“One mwa kala pamwe nangame momamakelo gandje agehe.

²⁹Ngaashi Tate a pe ndje epitikilo lyokupangela, osho nangame wo otandi mu pe oshilongo.

³⁰One tamu ka lya notamu ka nwa poshililo shandje omOshilongo shandje e tamu ka kuutumba kiipangelapundi, mu pangule omazimo omulongo nagaali gaIsrael.”

³¹“Simon, Simon! Pulakena! Satana okwa pula e ta pewa epitikilo, e mu makele ne amuhe, ongaashi omukiintu ta yele iilya polupale.

³²Ihe ngame onde ku galikanene, opo eitaalo lyoye lyaa kane. Nongele wa galukile kungame, tsa wo ooyakweni omukumo.”

³³Petrus okwa ti kuye: “Omuwa, ngame ondi ilongekidha okuya mondholongo pamwe nangoye nosho wo okusa pamwe nangoye.”

³⁴Jesus okwa ti kuye: “Petrus, otandi ku lombwele: Uusiku mbu wonena ekondombolo manga inaali iga, oto idhimbike ndje lutatu to ti ku shi ndje.”

³⁵Nena Jesus okwa ti kuyo: “Sho nde mu tumiine mwaa na okampunda kiimaliwa, ompunda yokweenda nayo noongaku, omwa li mwa pumbwa sha?” Oyo oya ti: “Aawe.”

³⁶Jesus okwa ti kuyo: “Ihe ngashingeyi ngoka e na okampunda kiimaliwa nenge ompunda yokweenda nayo, ne yi kuthe. Ngoka kee na egongamwele, na landithe po ombaikitha ye, e li ilandele.

³⁷Oshoka otandi mu lombwele: Enyolo ndyoka tali ti: ‘Oye a yalulilwa maakolokoshi,’ oli na okutsakanithwa. Oshoka ashihe shoka sha nyolwa tashi popi ndje, oshi na okuninga shoshili.”

³⁸Aalongwa oya ti kuye: “Omuwa, tala, otu na po omagongamwele gaali.” Oye okwa ti kuyo: “Sigo opo mpo sha gwana!”

³⁹Jesus okwa zi mo nokwa yi, ngaashi i igilila, kOndundu yooholivi. Aalongwa ye oya yi pamwe naye.

⁴⁰Sho a thiki kehala ndyoka, okwa ti kuyo: “Galikaneni, mwaa pwile memakelo.”

⁴¹Nena okwe ya thigi po okakako ke thike pedhaadhigo lyemanya nokwa tsu oongolo e ta galikana

⁴²a ti: “Tate, ngele oto shi pitika, oshitenga shika nashi pitilile ndje po. Ihe hamolwehalo lyandje, ihe olyoye li gwanithwe.”

⁴³[Omuyengeli gwomegulu okwe ya kuye nokwe mu tsu omukumo.

⁴⁴Oye okwa adhika kuuwehame uunene nokwa galikana a mana mo. Omazigudhe ngoka ga zi muye, oga li ga fa omata gombinzi noga ndondele pevi.]

⁴⁵Konima yokugalikana okwa thikama e ta shuna kaalongwa ye nokwe ya adha ya kotha, oshoka oya li ya sa oluhodhi.

⁴⁶Oye okwa ti kuyo: “Omolwashike tamu kotha? Pendukeni, mu galikane, mwaa pwile memakelo.”

⁴⁷Manga Jesus ta popi, ongundu yaantu oye ya po, ya kwatelwa komeho kuJudas, gumwe gwomaalongwa omulongo nayaali. Oye okwa hedha kuJesus nokwe mu thipi komilungu.

⁴⁸Jesus okwa ti kuye: “Judas, Omuna gwOmuntu oto mu gwaaleke noku mu thipa komilungu?”

⁴⁹Ano aalongwa mboka ya li pamwe naJesus, sho ya mono shoka tashi ningwa, oya ti: “Omuwa, natu kondje nomagongamwele getu?”

⁵⁰Nena gumwe oku umpile omumati gwomuyambimukuluntu nokwe mu fegula okutsi kwokolulyo.

⁵¹Jesus okwa yamukula a ti: “Opuwo, inashi ningwa we!” Oye okwa gumu okutsi kwomumati nokwe mu aludha.

⁵²Nena Jesus okwa lombwele aayambi aakuluntu, aakuluntu yaalangeli yotempeli naakuluntu yoshigwana mboka ye ya oku mu kwata a ti: “Omwe ya, mu kwate ndje ongomukolokoshi mu na omagongamwele noondhimbo?

⁵³Esiku kehe onda kala pamwe nane motempeli, ihe inamu kwata ndje. Ihe ndika olyo ethimbo lyeni nolyoonkondo dhomupangeli gwomilema.”

⁵⁴Oyo oya kwata Jesus noye mu fala megumbo lyomuyambimukuluntu. Petrus okwa landula mo e li konima kokule.

⁵⁵Molugumbo lwomeni omwa li mu na yamwe ya kuutumba taa huhulukwa pomulilo, naPetrus okwe ya e ta kuutumba mongundu yawo.

⁵⁶Ano gumwe gwomaayakuli aakadhona sho a mono Petrus ta huhulukwa, okwe mu tongolola e ta ti: “Omulumentu nguka naye wo okwa li pamwe naJesus.”

⁵⁷Ihe Petrus okwi idhimbike a ti: “Nekulu, kandi mu shi nando.”

⁵⁸Konima yokathimbo omulumentu gumwe okwe mu dhimbulula e ta ti: “Nangoye wo ogumwe gwawo.” Petrus okwa yamukula a ti: “Mentu ngoye, hangame.”

⁵⁹Sho pwa piti otundi yimwe, omulumentu gumwe ishewe okwa koleke a ti: “Kapu na omalimbililo, omulumentu nguka okwa li pamwe naye, oshoka naye wo Omugalilea.”

⁶⁰Petrus okwa yamukula a ti: “Mentu ngoye, kandi uvite ko shoka to popi.” Ano manga ta popi, ekondombolo olyi igi.

⁶¹Opo Omuwa okwa punguluka nokwa tongolola Petrus. Petrus okwa dhimbulukwa oohapu dhOmuwa, sho a tile: “Nena tuu ndjika, ekondombolo manga inaali iga, ongoye to idhimbike ndje lutatu.”

⁶²Petrus okwa yi pondje e ta lili nokulililila.

⁶³Aalumentu mboka ya li ya langela Jesus, oye mu sheke e taye mu dhenge.

⁶⁴Oyo oye mu siikile koshipala noye mu pula ya ti: “Tengeneka, olye e ku dhenge?”

⁶⁵Oyo oye mu sheke omasheko omakwawo ogendji.

⁶⁶Ano sho kwa shi, aakuluntu yoshigwana, aayambi naalongimpango oya gongala, naJesus okwa etwa moshigongi shawo.

⁶⁷Oyo oye mu pula ya ti: “Tu lombwela, ngele ongoye Kristus.” Oye okwe ya yamukula a ti: “Ngele ando ondi mu lombwele, itamu itaale ndje.

⁶⁸Nongele ando ondi mu pule epulo limwe, itamu yamukula ndje.

⁶⁹Ihe okuza mpaka otamu ka mona Omuna gwOmuntu a kuutumba kolulyo lwaKalunga, ngoka e na oonkondo adhihe.”

⁷⁰Oyo ayehe oye mu pula ya ti: “Ngoye ano Omuna gwaKalunga?” Oye okwa ti kuyo: “One omwa ti kutya ongame.”

⁷¹Oyo oya ti: “Tse inatu pumbwa nando onzapo yimwe yi tu lombwele. Otse yene otu uvu oohapu adhihe ndhoka e dhi popi.”