Read Oshindonga-Ombiimbeli Ondjapuki 2008 Luke 24 Bible Online

Luke 24 - Oshindonga-Ombiimbeli Ondjapuki 2008 bible

Luke 24

¹Ongula onene yesiku lyotango lyoshiwike aakiintu oya yi kombila ye na iizimba ya nika nawa, mbyoka ye yi longekidha.

²Sho ye ya posheelo, oya adha emanya lya kandulwa po nale.

³Oyo oya yi mo, ihe inaa mona mo omudhimba gwOmuwa Jesus.

⁴Ano manga ya li ya limbililwa, ombaadhilila aalumentu yaali ya zala oonguwo tadhi adhima, oya thikama puyo.

⁵Aakiintu oya haluka noyi ihata pevi. Aalumentu mboka oye ya popitha ya ti: “Omolwashike tamu kongo ngoka e na omwenyo mokati kaasi?

⁶Ke mo muka, okwa yumudhwa kuusi. Dhimbulukweni shoka e mu lombwelele, manga a li muGalilea.

⁷Okwa tile: ‘Omuna gwOmuntu oku na okugandjwa miikaha yaalunde, e ta ka alelwa komushigakano, ihe ngele pwa piti omasiku gatatu, ota ka yumudhwa kuusi.’ ”

⁸Nena aakiintu oya dhimbulukwa oohapu dhaJesus.

⁹Sho ya galuka kombila, oya hokolola ayihe mbika kaalongwa omulongo nagumwe nokuyalwe wo.

¹⁰Aakiintu mbaka oyo Maria Magdalena, Johanna naMaria, yina yaJakob; oyo pamwe naakiintu ooyakwawo yalwe oya hokololele aayapostoli iinima mbika ayihe.

¹¹Ihe aayapostoli oya tala kutya oohapu dhaakiintu kadhi na oshilonga, onkee inaye dhi itaala.

¹²Ihe Petrus okwa thikama e ta matukile kombila. Oye okwa ontamene mo nokwa mono mo owala omalapi ngoka ga li omudhimba. Nena okwa shuna kegumbo a kuminwa shoka sha ningwa po.

¹³Mesiku olyo tuu ndyoka yaali yomaalongwa oya li taa ende yu uka kokalando, edhina lyako Emmaus, ke li ookilometa omulongo nambali okuza kuJerusalem.

¹⁴Oyo oya li taa kundathana iinima ayihe mbyoka ya ningwa po.

¹⁵Ano manga taa popi notaa kundathana, Jesus mwene okwa hedha puyo e te ende pamwe nayo.

¹⁶Oyo oye mu mono ngaa, ihe inaye mu dhimbulula.

¹⁷Jesus okwa ti kuyo: “Otamu kundathana shike mokweenda kweni?” Oyo oya thikama ya lulika iipala yawo.

¹⁸Gumwe gwawo, edhina lye Kleopas, okwe mu pula a ti: “Ongoye awike wa kala muJerusalem, ino uva shoka sha ningwa mo pomasiku ngano?”

¹⁹Jesus okwe ya pula a ti: “Omwa ningwa shike?” Oyo oya yamukula ya ti: “Ooshoka sha ningwa kombinga yaJesus Omunasareti. Omulumentu nguka okwa li omuhunganeki e na oonkondo miilonga nomoohapu montaneho yaKalunga noyaantu ayehe.

²⁰Ihe aayambi aakuluntu naapangeli yetu oye mu gandja mompangu, a ka se, e taye mu alele komushigakano.

²¹Tse otwa li twi inekele kutya omulumentu nguka oye ngoka e na okuhupitha Aaisraeli. Nena nokuli esiku etitatu, mbika ayihe sho ya ningwa.

²²Aakiintu yamwe yomokati ketu oye tu kumitha, sho ye ya ongula onene kombila,

²³ihe inaa mona omudhimba gwaJesus. Oyo sho ya galuka, oya hokolola kutya oya mono emoniko lyaayengeli mboka ye ya lombwele kutya Jesus oku na omwenyo.

²⁴Okuza mpoka yamwe yomokati kawo oya yi ko kombila noya adha ko naanaa, ngaashi ya lombwelwa kaakiintu, ihe Jesus ye mwene inaye mu mona.”

²⁵Nena Jesus okwa ti kuyo: “Kamu shi tuu aagoya, sho mwa nyengwa okwiitaala ayihe mbyoka ya popiwa kaahunganeki!

²⁶Ndishi Kristus okwa li e na okuhepekwa pamukalo nguno, opo a ye mesimano lye?”

²⁷Opo Jesus okwe ya fatululile shoka sha tiwa kombinga ye mOmanyolo agehe okutameka momambo gaMoses sigo omambo agehe gaahunganeki.

²⁸Oyo sho ye ya popepi nokalando moka ya li taa yi, Jesus okwa ningi a fa ta pitilile po.

²⁹Oyo oye mu galula ya ti: “Kala putse, oshoka otaku toko, nomilema odhe ya.” Nena okwa yi megumbo nokwa kala puyo.

³⁰Ano sho a kuutumba poshililo pamwe nayo, okwa kutha oshikwiila, e shi yambeke nokwe shi pambula e te shi ya pe.

³¹Omeho gawo oga tonata noye mu dhimbulula; ihe ohaluka okwe ya kana.

³²Oyo oya pulathana ya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo!”

³³Mbalambala oya thikama e taa shuna kuJerusalem noya adha ko aalongwa omulongo nagumwe ya gongala nooyakwawo yalwe.

³⁴Mbaka oya ti kuyo: “Kapu na omalimbililo, Omuwa okwa yumudhwa! Okwa monika kuSimon!”

³⁵Nena aalongwa mboka yaali oye ya fatululile shoka sha ningwa mondjila nankene ya dhimbulula Omuwa, sho a pambula oshikwiila.

³⁶Manga mbaka taa hokolola, Omuwa mwene okwa thikama mokati kawo e ta ti kuyo: “Ombili nayi kale nane.”

³⁷Oyo oya kwatwa kuumbanda nokehaluko, oshoka oya dhiladhila kutya oya mono oshiluli.

³⁸Ihe oye okwa ti kuyo: “Omolwashike mwa tila? Omolwashike oomwenyo dheni dha limbililwa?

³⁹Taleni iikaha yandje noompadhi dhandje, mu dhimbulule kutya ongame. Gumii ndje, mu tale, oshoka oshiluli kashi na oontumba nomasipa, ngaashi ngame ndi yi na.”

⁴⁰Sho a popi ngeyi, okwe ya ulukile iikaha ye noompadhi dhe.

⁴¹Natango tuu inaa hala okwiitaala, oshoka oyo oya li yu udha enyanyu nonkumwe. Oye okwe ya pula a ti: “Omu na po sha shokuliwa?”

⁴²Oyo oye mu pe okantumba kohi ya pya.

⁴³Oye okwe ka kutha nokwe ka li montaneho yawo.

⁴⁴Oye okwa ti kuyo: “Iinima mbika oyo tuu mbyoka nde mu lombwelele, sho nda li pune, nda ti: Ayihe mbyoka ya nyolwa mompango yaMoses tayi popi ndje nenge momanyolo gaahunganeki nenge momapisalomi, oyi na okugwanithwa.”

⁴⁵Opo okwa patulula omadhiladhilo gawo, yu uve ko Omanyolo.

⁴⁶Oye nokwa ti kuyo: “Okwa nyolwa kutya Kristus okwa li e na okuhepekwa, nongele pwa piti omasiku gatatu, ota ka yumudhwa kuusi.

⁴⁷Medhina lye aantu ayehe oye na okuuvithilwa kutya nayi itedhulule, Kalunga nota dhimi po oondjo dhawo. Tamekeni muJerusalem.

⁴⁸One aahokololi yiinima mbika ayihe.

⁴⁹Ngame otandi ke mu tumina shoka Tate e shi uvaneke. Ihe ne omu na okukala moshilando muka, sigo tamu pewa oonkondo dhopombanda.”

⁵⁰Jesus okwa kutha mo aalongwa ye moshilando nokwe ya fala kuBetania. Oko nkoka okwa yelutha iikaha ye nokwe ya yambeke.

⁵¹Moku ya yambeka okwa kana po puyo nokwa falwa megulu.

⁵²Aalongwa oya tsu oongolo e taye mu galikana noya shuna kuJerusalem yu udha enyanyu enene.

⁵³Oyo oya kala aluhe motempeli taa hambelele Kalunga.