Read Oshindonga-Ombiimbeli Ondjapuki 2008 Luke 4 Bible Online

Luke 4 - Oshindonga-Ombiimbeli Ondjapuki 2008 bible

Luke 4

¹Jesus okwa zi kuJordan u udha Ombepo Ondjapuki. Ombepo noye mu fala kombuga,

²hoka a makelwa komuhindadhi omasiku omilongo ne. Omasiku ngoka okwa kala inaa lya sha, onkee sho ga hulu po, okwa li u uvite nayi nokwa sa ondjala.

³Omuhindadhi okwa ti kuye: “Ngele ngoye Omuna gwaKalunga, lombwela emanya ndika, li shituke oshikwiila.”

⁴Jesus okwe mu yamukula a ti: “Okwa nyolwa: ‘Omuntu ita kala e na omwenyo koshikwiila ashike.’ ”

⁵Omuhindadhi okwe mu kutha nokwe mu fala pokuma puule e te mu ulukile mepathimo lyeho omapangelo agehe gomuuyuni.

⁶Omuhindadhi okwa ti kuye: “Otandi ku ningi omupangeli gwaayihe notandi ku pe omauyamba agehe, oshoka ayihe mbika otandi vulu oku yi pa kehe ngoka nda hala.

⁷Ayihe mbika otayi ningi yoye, ngele to tsile ndje oongolo e to galikana ndje.”

⁸Jesus okwe mu yamukula nokwa ti: “Okwa nyolwa: ‘Omuwa Kalunga koye oye awike u na oku mu galikana noku mu longela.’ ”

⁹Omuhindadhi okwe mu fala kuJerusalem nokwe mu londeke koshihoko shotempeli e ta ti kuye: “Ngele ngoye Omuna gwaKalunga, iyundulila pevi,

¹⁰oshoka okwa nyolwa: ‘Kalunga ote ku tumine aayengeli ye, e taye ku gamene.

¹¹Oyo otaye ku papatele momaako gawo, opo waa pume oompadhi dhoye komamanya.’ ”

¹²Jesus okwe mu yamukula a ti: “Okwa nyolwa natango: ‘Ino makela Omuwa Kalunga koye.’ ”

¹³Ano omuhindadhi sho a hulitha okumakela Jesus moshinima kehe, okwe mu thigi po manga.

¹⁴Jesus okwa shuna kuGalilea nokwe endithwa koonkondo dhOmbepo Ondjapuki. Okupopiwa kwe okwa taandele nomikunda adhihe dhopuushiinda.

¹⁵Oye okwa longele aantu moosinagoga dhaahoka nokwa simanekwa kwaayehe.

¹⁶Jesus okwe ya muNasaret, moshilando moka a putukila. NomEsabati okwa yi mosinagoga, ngaashi i igilila. Oye okwa thikama, a leshe Omanyolo omayapuki,

¹⁷nokwa pewa embo lyomuhunganeki Jesaja. Sho a gonyununa ongonga yalyo, okwi itsu ehala mpoka pwa nyolwa ngeyi:

¹⁸“Ombepo yOmuwa oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye. Okwa tumu ndje, ndi igidhile oonkwatwa emanguluko, naaposi ya tonate, okumangulula oonakuhepekwa,

¹⁹okutseyitha omumvo, uuna Omuwa te ya, a hupithe aantu ye.”

²⁰Jesus sho a mana okulesha embo, okwe li pe omuyakuli e ta kuutumba. Aantu ayehe mboka ya li mosinagoga, oye mu tongolola.

²¹Oye okwa tameke oku ya lombwela e ta ti: “Nena ndjika oohapu ndhoka mu uvu dha leshwa, odha gwanithwa.”

²²Oyo ayehe oye mu popile muuwanawa. Noya kuminwa oohapu oombwanawa dha zi mokana ke ya ti: “Ke shi nani omuna gwaJosef?”

²³Oye okwa ti kuyo: “Ondi shi shi nawa kutya omwa hala okulombwela ndje eyele. ‘Mwaaludhi, iyaludha!’ Notamu ti ishewe: ‘Shoka tu uvu wa ningi muKapernaum, shi ninga wo muka.’ ”

²⁴Jesus okwa ti: “Ongame otandi mu lombwele: Kaku na omuhunganeki ha taambwa nawa kaantu yomoshilongo shaandjawo.

²⁵“Dhimbulukweni shoka sha li sha ningwa pethimbo lyomuhunganeki Elia. Kapu na omalimbililo, muIsrael omwa li mu na aaselekadhi oyendji, sho kwa li inaaku lokwa ethimbo lyoomvula ndatu netata, nokwa li ondjala ondhigu moshilongo ashihe.

²⁶Ihe Kalunga ina tuma Elia nando okugumwe gwomaaselekadhi mbaka, ihe okwe mu tumu owala komuselekadhi gwokuSarefat shomomikunda dhaSidon.

²⁷MuIsrael omwa li wo mu na aanashilundu oyendji pethimbo lyomuhunganeki Elisa, ihe Elisa ina aludha nando ogumwe gwomuyo, oNaeman awike Omusiria.”

²⁸Aantu mboka ya li mosinagoga sho yu uvu oohapu ndhoka, oya geye noonkondo.

²⁹Oyo noya thikama noya tidha mo Jesus moshilando, oye mu fala kolungenge lwondundu hoka oshilando shawo sha li sha tungilwa, opo ye mu undulile pevi.

³⁰Ihe Jesus okwa piti mokati kawo ayehe nokwa yi.

³¹Jesus okwa yi kuKapernaum, oshilando shomuGalilea, nokwa longo aantu mesiku lyEsabati.

³²Aantu mboka oya kuminwa elongo lye, oshoka oohapu dhe odha li dhi na oonkondo.

³³Mosinagoga moka omwa li mu na omulumentu e niwe kombepo ya nyata yoompwidhuli. Oye okwi igidha mokule a ti:

³⁴“Iihuna yowala! Jesus Omunasareti, owe tu halela shike? Owe ya u tu yone po? Ondi ku shi kutya ongoye Omuyapuki gwaKalunga.”

³⁵Jesus okwa ganda ombepo ya nyata a ti: “Mwena thilu, u ze mo muye!” Ombepo oye mu hata pevi mokati kaantu noya zi mo muye, inayi mu ningila nando uuwinayi washa.

³⁶Aantu ayehe oya kumwa noya pulathana ya ti: “Ota popi ngiini ngeyi? Oye e na epitikilo noonkondo okuganda oombepo dha nyata noku dhi tidha mo.”

³⁷Oshiningwanima shoka osha taandele akuhe momikunda ndhoka.

³⁸Ano Jesus sho a zi mo mosinagoga, okwa yi kaandjaSimon. Yinamweno yaSimon okwa li ta alukwa olwiidhi lwa geya noonkondo. Oyo noye mu popi kuJesus.

³⁹Jesus okwa hedha kuye nokwa ganda olwiidhi, olwo nolwe mu etha. Mbalambala yinamweno okwa thikama nokwa tameke oku ya yakula.

⁴⁰Etango sho lya yi mo, aantu ayehe mboka ya li ye na aavu yomavu gi ili nogi ili, oye ya eta kuJesus. Jesus okwa tenteke iihaka ye kukehe omuvu nokwe ya aludha ayehe.

⁴¹Oompwidhuli wo odha zi mo maantu oyendji tadhi igidha tadhi ti: “Ongoye Omuna gwaKalunga!” Ihe Jesus okwe dhi ganda ye ine dhi pitika, dhi popye, oshoka odha li dhi mu shi kutya oye Kristus.

⁴²Ongula sho kwa shi, Jesus okwa zi mo moshilando nokwa yi kokuma kwaa na omagumbo. Aantu oya tameke oku mu konga, naasho ye mu mono, oye mu kwatele po, kaa ze po puyo.

⁴³Ihe Jesus okwe ya lombwele a ti: “Elaka etoye lyOshilongo shaKalunga ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.”

⁴⁴Oye noku uvithile moosinagoga dhomuJudea.