Read Oshindonga-Ombiimbeli Ondjapuki 2008 Luke 6 Bible Online

Luke 6 - Oshindonga-Ombiimbeli Ondjapuki 2008 bible

Luke 6

¹MEsabati lyontumba Jesus okwa piti pokati komapya. Aalongwa ye oya polola omaha noye ga thengele pomake gawo e taa li.

²Nena yamwe yomaafarisayi oya ti: “Omolwashike tamu longo shoka shi indikwa kompango mEsabati?”

³Jesus okwe ya yamukula a ti: “Inamu lesha nani shoka David e shi ningi, sho a li a sa ondjala, oye mwene naantu ye?

⁴Oye okwa yi mongulu yaKalunga e ta kutha mo iikwiila mbyoka ya yambelwa Kalunga nokwe yi li po e ta pe wo mboka ya li puye. Iikwiila ya tya ngaaka aayambi ayeke ya li ya pitikilwa oku yi lya.”

⁵Opo Jesus okwa ti kuyo: “Omuna gwOmuntu oye Omuwa nogwEsabati.”

⁶MEsabati ekwawo Jesus okwa yi mosinagoga nokwa longo aantu. Omo omwa li mu na omulumentu e na oshikaha shokolulyo sha lemana.

⁷Nena aalongimpango naafarisayi oya kongo ompito yokutamaneka Jesus, onkee oye mu langele, ya tale, ngele ota aludha mEsabati.

⁸Ihe Jesus okwa dhimbulula omadhiladhilo gawo nokwa ti komulumentu gwoshikaha sha lemana: “Thikama, u ye huka montaneho yaayehe.” Oye okwa thikama e te ya.

⁹Jesus okwe ya pula e ta ti: “Oshike sha pitikwa okulongwa mEsabati: okulonga uuwanawa nenge okulonga uuwinayi, okuhupitha omwenyo nenge oku gu kanitha?”

¹⁰Jesus okwa tala iipala yaayehe mboka ya kuutumba mpoka nokwa lombwele omulumentu ngoka a ti: “Utha oshikaha shoye.” Oye okwe shi utha, osho nosha aluka.

¹¹Ihe aatamaneki oye mu geele noonkondo noya pulathana kutya Jesus oye na oku mu ninga ngiini.

¹²Pethimbo tuu ndyoka Jesus okwa londo kondundu, a ka galikane, nokwa kala ko uusiku auhe ta galikana Kalunga.

¹³Ano ongula sho kwa shi, okwi ithana aalongwa ye, ye ye kuye nokwa hogolola mo muyo omulongo nayaali mboka e ya luku aayapostoli:

¹⁴Simon, ngoka Jesus e mu luku wo Petrus, nomumwayina Andreas, Jakob naJohannes, Filippus naBartolomeus,

¹⁵Mateus naTomas, Jakob yaAlfeus naSimon, ngoka i ithanwa omulaadhi,

¹⁶Judas yaJakob naJudas Iskariot, ngoka a ningi omugwaaleki gwe.

¹⁷Jesus okwa kuluka kondundu pamwe nayo nokwa thikama pelundu puuyelele pamwe nongundu onene yaalongwa ye. Okwa li wo ku na aantu oyendji ya zi kuJudea nokuJerusalem, nosho wo komunkulo gwefuta, popepi naTiro naSidon.

¹⁸Oye ya oku mu pulakena nokupangwa omavu gawo. Naamboka ya li ya hepekwa koombepo dha nyata, oye ya kuye nokwe ya aludha.

¹⁹Ayehe mboka oya kambadhala oku mu guma, oshoka oonkondo ndhoka dha zi muJesus odhe ya aludha.

²⁰Jesus okwa tala kaalongwa ye e ta ti: “Aanelago one mboka mwa hepa, oshoka Oshilongo shaKalunga osheni.

²¹Aanelago one mboka mwa sa ondjala ngashingeyi, oshoka otamu ka kutithwa. Aanelago one mboka tamu lili ngashingeyi, oshoka otamu ka yola.

²²“One aanelago, aantu ngele taye mu tondo, taye mu tidha po, taye mu sheke, nenge taa ti kutya one aawinayi omolwOmuna gwOmuntu.

²³Uuna tashi ningwa, nyanyukweni e tamu tanta, oshoka ondjambi yeni onene yi li megulu. Oshoka noohe osho ya ningile wo aahunganeki.

²⁴Ihe yayee ne mbo aayamba ngashingeyi, sho mu iwete mwa gwana.

²⁵Yayee one mboka mwa kuta ngashingeyi, oshoka otamu ka sa ondjala. Yayee one mboka tamu yolo ngashingeyi, oshoka otamu ka sa oluhodhi notamu ka lila.

²⁶“Yayee, aantu ayehe ngele taye mu popile muuwanawa, oshoka noohe osho ya ningile aahunganeki aafundja.”

²⁷“Ihe ne mboka tamu pulakene, otandi mu lombwele: Holeni aatondi yeni, mboka ye mu huge, ya ningileni uuwanawa.

²⁸Yambekeni mboka taye mu thingi, galikaneneni mboka taye mu sheke.

²⁹Oongoka te ku dhenge kolupanda lumwe, mu etha, a dhenge nolukwawo. Ngoka te ku kutha ohema yoye, mu pa nombaikitha yoye wo.

³⁰Kehe ngoka te ku indile sha, mu pa. Ngoka te ku yugu iinima yoye, ino yi mu pula we.

³¹Shoka mwa hala aantu ye mu ningile, osho ya ningileni wo.

³²“Ngele ne omu hole owala aantu mboka ye mu hole, otamu tegelele tuu epandulo lyasha? Oshoka naalunde wo oye hole aantu mboka ye ya hole.

³³Ngele ohamu ningile owala uuwanawa aantu mboka haye mu ningile uuwanawa, otamu tegelele tuu epandulo lyasha? Oshoka naalunde wo osho haa ningi.

³⁴Ngele ohamu pe owala mboka taye ke mu pa komeho, otamu tegelele tuu epandulo lyasha? Oshoka naalunde ohaa paathana, opo ya ka galulilwe shi thike pushoka ye shi gandja.

³⁵Holeni aatondi yeni e tamu ya ningile uuwanawa. Gandjeni, ne inamu tegelela, mu galulilwe. Oshoka ondjambi yeni onene, notamu ningi aana yaKalunga gwokombandambanda. Oshoka Kalunga oye omwaanawa kumboka ihaa pandula naamboka oonakwiihola.

³⁶Kaleni mu na ohenda ngashika Ho yeni e na ohenda.”

³⁷“Inamu pangula yakweni, opo Kalunga kee mu pangule; inamu tokola, opo Kalunga kee mu tokole. Dhiminathaneni po oondjo, Kalunga ote mu dhimine po wo.

³⁸Gandjeni, Kalunga ote mu pe oshiyelekitho shoka tashi holola iilonga yeni iiwanawa, shu udha, sha thindwa, sha huwa, tashi tika e tashi tulwa mekolo lyeni. Oshoka oshiyelekitho shoka tamu shi yelekitha yakweni, osho Kalunga te ke mu yelekitha.”

³⁹Jesus okwe ya lombwele eyele a ti: “Omuposi ota vulu tuu okukwata omuposi mukwawo keti? Ayehe yaali itaa gwile moshilambo?

⁴⁰Omulongwa ke vule ndishi omulongi gwe. Ihe omulongwa kehe ngoka a pwa okulongwa, oku thike pomulongi gwe.”

⁴¹“Omolwashike wa tala okahwandu okashona ke li meho lyamukweni, ihe endangalati li li meho lyoye ku li wete?

⁴²Nenge oto vulu ngiini okulombwela mukweni: ‘Kuume, andiya, ndi kuthe mo okahwandu ke li meho lyoye,’ ihe endangalati ndyoka li li meho lyoye mwene ku li wete? Mufudhime ngoye, kutha mo tango endangalati meho lyoye mwene, nena oto vulu okumona ko e to kutha mo okahwandu ke li meho lyamukweni.”

⁴³“Omuti omwaanawa kagu wapa okwiima iiyimati iiwinayi, nomuti omwiinayi kagu wapa okwiima iiyimati iiwanawa.

⁴⁴Oshoka kehe omuti ohagu dhimbululwa kiiyimati yagwo. Ndishi oonkwiyu ihadhi likolwa komano nenge oomviinu komankono?

⁴⁵Omuntu omwaanawa ota holola mompungulo ombwanawa yomutima gwe uuwanawa. Osho wo omuntu omwiinayi ota holola mo uuwinayi mompungulo ye ombwinayi. Oshoka shoka shu udhilila momutima, okana ohake shi piitha mo.”

⁴⁶“Omolwashike hamu ithana ndje: ‘Omuwa, Omuwa’, ihe ihamu longo shono tandi shi mu lombwele?

⁴⁷Kehe ngoka te ya kungame nota pulakene oohapu dhandje e ta vulika kudho, otandi mu ulukile nkene a tya.

⁴⁸Oye okwa fa omulumentu ta tungu ongulu. Oye okwa fulu nokwa tungile ekankameno kemanya. Opo eyelu olye ya, nefundja olya panuka ko e tali itsu mongulu ndjoka, ihe inayi teka po, oshoka oya li ya tungwa ya kola.

⁴⁹Ihe ngoka tu uvu oohapu ndhika dhandje, ye ita vulika kudho, okwa fa omulumentu a tungile ongulu pehekevi, ye ina fula omukanka. Ano efundja sho lya panuka ko e tali itsu mongulu ndjoka, oya kumuka po, nekumukopo lyayo olya li enene.”