Read Oshindonga-Ombiimbeli Ondjapuki 2008 Luke 8 Bible Online

Luke 8 - Oshindonga-Ombiimbeli Ondjapuki 2008 bible

Luke 8

¹Methimbo lya landula Jesus okwe ende miilando nomomikunda noku uvitha elaka etoye lyOshilongo shaKalunga. Aalongwa ye omulongo nayaali oye ende pamwe naye

²nosho wo aakiintu mboka a li e ya aludha, sho ya li ye na oompwidhuli nomavu galwe: Maria Magdalena, mungoka mwa li mwa tidhwa oompwidhuli heyali,

³naJohanna, omukiintu gwaKusa, elenga lyaHerodes nosho wo Susanna naakiintu yalwe mboka ya li ya longitha omaliko gawo e taa yakula Jesus naalongwa ye.

⁴Aantu oya tameke okuya kuJesus, ya zi kiilando niilando, nongundu onene sho ye mu gongalele, okwe ya lombwele eyele ndika:

⁵“Omukuni okwa yi, a ka kune oombuto mepya. Ano mokukuna kwe oombuto dhimwe odha gwile mondjila, noondhila odhe ya e tadhi dhi shomona po.

⁶Dhimwe odha gwile poshipale pwaa na evi olindji nomokumena odha ganya, oshoka evi lyapo ihali lwedha okukukuta.

⁷Dhimwe odha gwile moongwena. Oongwena odha koko mumwe nadho nodhe dhi thininike.

⁸Dhimwe odha gwile mevi ewanawa nodha mene e tadhi vala lwethele.” Jesus sho a mana okupopya, okwa ti kuyo: “Pulakeneni, ngoka e na omakutsi gokuuva, nu uve ko!”

⁹Aalongwa yaJesus oye mu pula oondunge dheyele ndika kutya otali ti ngiini.

¹⁰Oye nokwa ti: “Ne omwa pewa okuuva ko iiholekwa yOshilongo shaKalunga, ihe yalwe otaa lombwelwa momayele. Onkee: Okumona ohaa mono, ihe kaa wete ko. Okuuva ohaa uvu, ihe kaa uvite ko.”

¹¹“Eyele otali ti: Oombuto odho oohapu dhaKalunga.

¹²Ndhoka dha gwile mondjila, odha fa aantu mboka haa pulakene oohapu, ihe omuhindadhi ote ya e ta kutha mo oohapu ndhoka dha kunwa moomwenyo dhawo, opo yaa vule okwiitaala, ya hupithwe.

¹³Ndhoka dha gwile poshipale, odha fa aantu mboka taa uvu oohapu e taye dhi taamba nenyanyu, ihe itadhi ningine muyo. Otaa itaale okathimbo kowala, ihe uuna taa adhika kemakelo, otaa etha eitaalo.

¹⁴Ndhoka dha kunwa moongwena, odha fa aantu mboka taa uvu oohapu, ihe konima yethimbo iimpwiyu, uuyamba nuuhalu wopauyuni otayi thininike oohapu, kaaya imike iiyimati.

¹⁵Ndhoka dha gwile mevi ewanawa, odha fa aantu mboka taa uvu oohapu notaye dhi taamba nomwenyo omwaanawa gu na evuliko e taa dhiginine, sigo taa imike iiyimati.”

¹⁶“Kaku na omuntu ta tema olamba e te yi tula kohi yontungwa nenge kohi yontala. Ihe oku na oku yi tula koshihukikwa, opo aantu ngele taa ya megumbo, ya mone uuyelele.”

¹⁷“Oshoka kaku na shoka sha holekwa itaashi ka hololwa, nokaku na shoka sha holama itaashi ka tseyika, shi ye puuyelele.”

¹⁸“Kotokeni, mu tale, nkene hamu pulakene. Oshoka mboka ye na, oyo otaa pewa, ihe mboka kaye na, oyo otaa kuthwa noshishona shoka taa dhiladhila kutya oshawo.”

¹⁹Yina yaJesus naamwayina aalumentu oye ya kuye, ihe oya nyengwa okuthika kuye omolwowindji waantu.

²⁰Nena gumwe gwomaantu mboka okwa ti kuJesus: “Tala, nyoko naamwanyoko oya thikama pondje, taye ku kongo, ya hala, ya popye nangoye.”

²¹Jesus okwe ya yamukula a ti: “Meme naamwameme oyo mboka taa uvu oohapu dhaKalunga e taa vulika kudho.”

²²Esiku limwe Jesus okwa yi mowato pamwe naalongwa ye nokwa ti kuyo: “Tu taagulukileni handiyaka yetale.” Oyo noya yi.

²³Ano mokudhuga kwawo oye okwa tameke okukotha. Oshikungulu shombepo osha tukuluka kombanda yetale. Omeya noga tameke okuya mowato noshiponga osha li popepi nayo.

²⁴Aalongwa oye ya kuJesus noye mu pendutha ya ti: “Omuwa, Omuwa, tatu sile mwee!” Opo Jesus okwa penduka nokwa ganda ombepo nomakuthikuthi, nokwa mwena kwa tya thilu.

²⁵Oye nokwa ti kaalongwa: “Eitaalo lyeni oli li peni?” Ihe oya kumwa noya tila e taa pulathana: “Nguka olye ano, sho ta ganda ombepo nomakuthikuthi, oyo notayi vulika kuye?”

²⁶Oyo oya dhugu yu uka koshilongo shAagerasa, shi li handiyaka yefuta lyaGalilea.

²⁷Jesus sho a thiki kuukukutu, okwa tsakaneke omulumentu ta zi koshilando e niwe kompwidhuli. Oye okwa kala ethimbo ele te ende omupwedhu ye ina kala megumbo, ihe okwa kala moombila dhomomakololo.

²⁸Sho a mono Jesus, okwi igidha, a tsu oongolo koshipala she nokwa popi mokule a ti: “Jesus, Omuna gwa Kalunga gwokombandambanda! Owa halela ndje shike? Otandi ku galikana waa hepeke ndje.”

²⁹Oye okwa popi ngeyi, oshoka Jesus okwa tidha mo ombepo ya nyata muye. Olwindji sho ye mu kwata, okwe edhililwa mondholongo a mangwa nomalyenge nomiya kiikaha nokomagulu, ihe ohi itokola mo, ompwidhuli e tayi mu fala kombuga.

³⁰Opo Jesus okwe mu pula a ti: “Edhina lyoye olini?” Oye a yamukula: “Edhina lyandje ongame Ngundu,” oshoka muye omwa li mu na oompwidhuli odhindji.

³¹Oompwidhuli odha hehela Jesus, kee dhi undulile molumbogo lwomuule.

³²Popepi nondundu opwa li oshigunda oshinene shiingulu tayi napa. Oompwidhuli odha hehela Jesus, e dhi pitike, dhi ye miingulu. Oye okwe dhi pitika.

³³Oompwidhuli odha zi momulumentu ngoka nodha yi miingulu. Nena oshigunda ashihe shiingulu osha nuka okuza komutuni omule noshi iyumbile mefuta e tashi sile mo.

³⁴Aasita yiingulu sho ya mono shoka sha ningwa po, oya fadhuka po noya ka hokolola oshiningwanima shika moshilando nomomikunda ndhoka.

³⁵Aantu noye ya okutala shoka sha ningwa po. Oyo oye ya kuJesus noya mono omulumentu ngoka a zi oompwidhuli, a kuutumba puJesus a zala nawa noku na oondunge; oyo noya tila.

³⁶Aantu mboka ye shi mono, oya hokololele yalwe, nkene omulumentu ngoka a li e na oompwidhuli, a aludhwa.

³⁷Nena aantu ayehe yomomikunda ndhoka dhAagerasa oyi indile Jesus, a ze mo moshilongo shawo, oshoka oya li ya tila noonkondo. Opo Jesus okwa yi mowato e ta shuna.

³⁸Omulumentu ngoka a li e na oompwidhuli, okwi indile Jesus, a pitikwe okukala puye. Ihe Jesus okwe mu laleke a ti:

³⁹“Shuna kaandjeni, u ke ya hokololele shoka Kalunga e shi ku ningile.” Omulumentu okwa yi nokwa hokolola moshilongo ashihe shoka Jesus e shi mu ningile.

⁴⁰Jesus sho a galuka ko, aantu oyendji oye mu tsakaneke, oshoka oya adhika ye mu tegelela.

⁴¹Nena omulumentu gumwe, edhina lye Jairus, omukuluntu gwosinagoga, okwe ya kuye. Oye okwa tsu oongolo poompadhi dhaJesus nokwe mu hehela, a ye megumbo lye,

⁴²oshoka okwa li e na omwana omukadhona omuvalwa awike gwoomvula omulongo nambali e li pokusa. Jesus manga ta yi pamwe naJairus, aantu oye mu uminine.

⁴³Okwa li wo ku na omukiintu a ala uuvu wetiko lyombinzi oomvula omulongo nambali. Oye okwa manene eliko lye alihe moonganga, ihe odha nyengwa oku mu aludha.

⁴⁴Omukiintu ngoka okwe ya te endele konima yaJesus nokwa gumu koongenge dhonguwo ye; mbalambala etiko lye olya kodha.

⁴⁵Jesus okwa pula: “Olye a gumu ndje?” Nena kehe gumwe okwe shi idhimbike, ihe Petrus okwa ti: “Muhongi, aantu oyendji ye ku kundukidha noye ku uminina.”

⁴⁶Jesus okwa ti: “Onde shi dhimbulula kutya ope na gumwe a gumu ndje, omolwoonkondo ndhoka dha zi mungame.”

⁴⁷Ano omukiintu sho a dhimbulula kutya ita vulu we okuholama, okwe ya nokwa tsu oongolo koshipala shaJesus, a tila ta kakama. Nena okwa lombwele Jesus montaneho yaantu ayehe kutya omolwashike e mu gumu nankene a aludhwa mbalambala.

⁴⁸Jesus okwa ti kuye: “Mumwandje, eitaalo lyoye lye ku aludha. Inda nombili.”

⁴⁹Manga Jesus a li ta popi, opwe ya omulumentu a zi kaandjawo yomukuluntu gwosinagoga a ti: “Omumwoye omukadhona a mana oondjenda. Oto monithile we shike Muhongi iihuna?”

⁵⁰Jesus sho u uvu oohapu ndhoka, okwa ti kuJairus: “Ino tila, itaala owala, omumwoye ota aluka.”

⁵¹Jesus sho e ya megumbo, ina pitika nando omuntu gumwe a ye mo pamwe naye, kakele kaPetrus, Johannes naJakob nahe nayina yomunona ayeke.

⁵²Aantu ayehe mboka ya li mo, oya hekumuna noya lili oosa omolwe. Ihe Jesus okwa ti. “Inamu lila, omukadhona ina sa, ihe okwa kotha.”

⁵³Aantu oya yolo Jesus, oshoka oya li ye shi shi kutya omukadhona okwa sa.

⁵⁴Jesus okwe mu kwata koshikaha nokwa popi mokule a ti: “Mumwandje penduka po!”

⁵⁵Omwenyo gwe ogwe ya mo nokwa thikama nziya. Jesus okwe ya lombwele, ya pe omunona iikulya.

⁵⁶Aakuluntu yomunona oya kumwa, ihe Jesus okwe ya indile, yaa hokololele nando omuntu shoka sha ningwa po.