Read Oshindonga-Ombiimbeli Ondjapuki 2008 John 10 Bible Online

John 10 - Oshindonga-Ombiimbeli Ondjapuki 2008 bible

John 10

¹“Ngame otandi mu lombwele oshili: Kehe ngoka ta yi moshigunda shoonzi itaa pitile posheelo, ihe ota gwayele mo palwe, oye omufuthi nomuyugi.

²Ihe ngoka ta yi mo ta pitile posheelo, oye omusita gwoonzi.

³Omulangeli gwoposheelo ote mu egulula, noonzi otadhi uvu ewi lye, sho te dhi ithana komadhina e te dhi piitha mo.

⁴Ngele a piitha mo oonzi dhe adhihe, ote dhi kwatele komeho, dho e tadhi mu landula, oshoka odhi shi ewi lye.

⁵Ihe omukwiilongo itadhi mu landula, otadhi mu yi ontuku, oshoka ewi lye kadhi li shi.”

⁶Eyele ndika Jesus okwe li ya lombwele, ihe yo oya li kaa uvite ko kutya okwa hala okutya shike.

⁷Jesus okwe ya lombwele ishewe a ti: “Ngame otandi mu lombwele oshili: Ongame osheelo shoonzi.

⁸Ayehe mboka ya tetekele ndje, oyo aafuthi naayugi, noonzi inadhi ya pulakena.

⁹Ongame osheelo. Kehe ngoka ta yi mo ta pitile mungame, ota ka hupithwa. Ye ota kala nokuya mo nokupita mo e ta mono ko oshinapelo.

¹⁰Omufuthi ohe endele owala okuyaka, okudhipaga nokuhanagula. Ngame onde ya, opo ya kale ye na omwenyo meudhililo alihe lya gwana.

¹¹“Ongame omusita ngo omwaanawa. Omusita omwaanawa ota gandjele oonzi omwenyo gwe.

¹²Nakufutwa ngoka kee shi omusita noonzi kadhi shi dhe mwene, ota thigi po oonzi e ta fadhuka po, ngele ta mono embungu tali ya. Osho ngeyi embungu otali dhi umpile e tali dhi halakanitha po.

¹³Nakufutwa a tya ngaaka ota yi ontuku, oshoka ye ota longele owala ondjambi, ye ke na ko nasha noonzi.

¹⁴Ngame omusita ngo omwaanawa.

¹⁵Ngaashi Tate e shi ndje, nangame ondi shi Tate, osho wo ngame oonzi dhandje ondi dhi shi nadho odhi shi ndje. Ngame ondi na ehalo okusa molwadho.

¹⁶Oku na oonzi dhandje dhilwe ndhoka kaadhi mo moshigunda shika. Nadho wo ondi na oku dhi eta mo, notadhi ka uva ewi lyandje e tadhi ka ninga oshigunda shimwe nodhi na omusita gumwe.

¹⁷“Tate oku hole ndje, oshoka ngame ondi na ehalo okugandja omwenyo gwandje, opo ndi ke gu taambulule ishewe.

¹⁸Kaku na nando ogumwe ta kutha ndje omwenyo gwandje. Ongame mwene tandi gu gandja kehalo lyandje mwene. Ngame ondi na oonkondo oku gu gandja nondi na wo oonkondo oku gu taambulula. Shika osho shoka Tate a lombwele ndje, ndi ninge.”

¹⁹Omaludhi oga tameke ishewe mokati kAajuda omolwoohapu ndhika.

²⁰Oyendji yomuyo oya ti: “Ye oku niwe kompwidhuli nota yi oonkwengu. Otamu mu pulakenene shike?”

²¹Ooyakwawo oya ti: “Omunampwidhuli ita vulu okupopya oohapu dha tya ngeyi! Ompwidhuli otayi vulu tuu okutonatitha omeho gaaposi?”

²²Ethimbo lyokudhana oshituthi sheyapulo lyotempeli muJerusalem olya thiki, nokwa li okufu.

²³Jesus okwa li te ende motempeli mOndunda yaSalomo.

²⁴Nena Aajuda oye mu gongalele noya ti: “Sigo uunake to tu kaleke nomalimbililo? Tu lombwela oshili yoyene, ngele ongoye Kristus.”

²⁵Jesus okwe ya yamukula: “Onde mu lombwela nale, ihe ne inamu hala okwiitaala ndje. Iilonga mbyoka tandi longo medhina lyaTate, oyo tayi hokolola ndje.

²⁶Ihe ne inamu hala okwiitaala, oshoka kamu shi oonzi dhandje.

²⁷Oonzi dhandje ohadhi uvu ewi lyandje; ngame ondi dhi shi, dho notadhi landula ndje.

²⁸Ngame otandi dhi pe omwenyo gwaaluhe; dho kadhi na mpoka tadhi ka yonuka po sigo aluhe nokape na ngoka te dhi yugu mo moshikaha shandje.

²⁹Tate, ngoka e dhi pa ndje, oye omunene e vule ayehe, onkee kape na ngoka ta vulu oku dhi yuga mo moshikaha she.

³⁰Tse naTate gumwe.”

³¹Aajuda oya toola ishewe omamanya, ye mu dhipage.

³²Jesus okwe ya yamukula: “Ngame onda longo iilonga oyindji iiwanawa mbyoka Tate a pa ndje, ndi yi longe mokati keni. Omolwoshilonga shini po shomumbino mwa hala okudhipaga ndje nomamanya?”

³³Aajuda oye mu yamukula: “Tse inatu hala oku ku dhipaga omolwoshilonga shontumba oshiwanawa ando, ihe omolwashoka to sheke Kalunga. Ngoye omuntu gwowala, ihe owa hala okwiininga Kalunga.”

³⁴Jesus okwe ya yamukula: “Mompango yeni omwa nyolwa kutya Kalunga ota ti: ‘One ookalunga.’

³⁵Tse otu shi shi kutya shoka tashi tiwa kenyolo ndika, oshoshili sigo aluhe: Aantu mboka Kalunga a pa oohapu dhe, okwe ya ithana ookalunga.

³⁶Otamu vulu ngiini ano okutya, otandi sheke Kalunga, sho tandi ti kutya ngame Omuna gwaKalunga, ngame ngoka Tate a hogolola nokwa tuma ndje muuyuni?

³⁷Ngame ngele itandi longo iilonga yaTate, inamu itaala ndje.

³⁸Ihe ngele otandi yi longo, peha lyokwiitaala ndje itaaleni iilonga yo yene, opo mu tseye ne mu uve ko lela kutya Tate oku li mungame nangame ondi li muTate.”

³⁹Oyo oya li ya hala ishewe oku mu kwata, ihe ye okwa zi mo miikaha yawo nokwa yi.

⁴⁰Jesus okwa shuna natango handiyaka yomulonga gwaJordan, kehala ndyoka Johannes a li ha shasha aantu, nokwa kala nkoka.

⁴¹Aantu oyendji oye ya kuye. Oyo noya ti: “Johannes ina longa nando oshikumithalonga, ihe iinima ayihe mbyoka Johannes a popya kombinga yomulumentu nguka, oyoshili.”

⁴²Aantu oyendji yaankoka oye mu itaale.