Read Oshindonga-Ombiimbeli Ondjapuki 2008 John 12 Bible Online

John 12 - Oshindonga-Ombiimbeli Ondjapuki 2008 bible

John 12

¹Sho kwa li ku na omasiku gahamano, Opaasa yi thike, Jesus okwe ya kuBetania, nkoka kwa kala Lasarus, omulumentu ngoka Jesus a yumudha kuusi.

²Oyo oye mu pakele po omwiha. Marta okwa yakula, ihe Lasarus okwa li gumwe gwaantu mboka ya kuutumba koshililo pamwe naJesus.

³Nena Maria okwa kutha omugwayo gwonardilela gu na ondilo nokwe gu tile koompadhi dhaJesus e te dhi thetitha omafufu gokomutse gwe. Ezimba ewanawa lyomugwayo nolyu udhitha egumbo alihe.

⁴Ihe Judas Iskariot, gumwe gwomaalongwa ye, oongoka a li te ke mu gwaaleka, okwa ti:

⁵“Omolwashike omugwayo nguka inaagu landithwa po? Ando ogwa zi iimaliwa omathele gatatu e tayi pewa oohepele.”

⁶Shika ine shi popya molwaasho ando a li e na oshimpwiyu noohepele, ihe omolwashoka okwa li omufuthi. Onkee sho kwa li ha humbata okampunda kiimaliwa, okwa li hi ikwatha ye mwene niimaliwa mbyoka.

⁷Ihe Jesus okwa ti: “Mu etha, a pungulile shoka e na esiku lyefumviko lyandje.

⁸Oohepele omu dhi na aluhe, ihe ngame itandi kala aluhe pune.”

⁹Ongundu onene yAajuda oyu uvu kutya Jesus oku li muBetania noya yi ko. Inaa ya ko molwaJesus awike, ihe oya li wo ya hala okumona Lasarus, ngoka Jesus e mu yumudha kuusi.

¹⁰Aayambi aakuluntu oyu uvanene okudhipaga wo Lasarus.

¹¹Oshoka omolwehokololo lye Aajuda oyendji oya gamuka ko kaawiliki yawo noyi itaale Jesus.

¹²Esiku lya landula ongundu onene yaamboka ye ya koshituthi shOpaasa, oyu uvu kutya Jesus ote ya kuJerusalem.

¹³Nena oya kutha iitayi yomilunga e taa yi, ye ke mu tsakaneke. Oyo oyi igidha ya ti: “Hosianna; Kalunga ne mu laleke nuuyamba ngoka te ya medhina lyOmuwa. Kalunga na laleke nuuyamba omukwaniilwa gwaIsrael.”

¹⁴Jesus okwa mono ihe okasino nokwe ka kayile, ngashika naanaa enyolo tali ti:

¹⁵“Shilando shaSion, ino tila! Tala, omukwaniilwa gwoye te ya kungoye, a kayila ontana yokasino.”

¹⁶Aalongwa ye oya li kaa uvite ko oshinima shika tango, ihe Jesus sho a yeluthilwa pombanda mesimano, oya dhimbulula kutya enyolo otali popi oshinima shika, naantu oye mu ningile iinima mbika ayihe.

¹⁷Aantu mboka ya li pamwe naJesus, sho i ithana Lasarus, a ze mo mombila nokwe mu yumudha, oya hokolola shoka sha ningwa po.

¹⁸Onkee ano ongundu yaantu oye mu tsakaneke, oshoka oyu uvu kutya okwa longo oshikumithalonga shika.

¹⁹Aafarisayi oya lombwelathana: “Mu wete ko! Kamu na shoka tamu vulu we. Tala, uuyuni auhe otau mu landula.”

²⁰Aagreka yamwe yomumboka haa yi kuJerusalem okugalikana pethimbo lyoshituthi,

²¹oye ya kuFilippus ngoka a za kuBetsaida shomuGalilea, noye mu indile ya ti: “Tatekulu, tse otwa hala okumona Jesus.”

²²Filippus okwa yi e te shi lombwele Andreas. Andreas naFilippus oya yi e taye shi lombwele Jesus.

²³Jesus okwe ya yamukula a ti: “Ethimbo olye ya, Omuna gwOmuntu a pewe esimano enene.

²⁴Ngame otandi mu lombwele oshili: Omuma yoshilya ngele itayi gwile mevi e tayi sile mo, otayi kala yimwe ayike, ihe ngele tayi sile mo otayi vala oomuma odhindji.

²⁵Oongoka e hole omwenyo gwe, ote gu kanitha, ihe ngoka ta tondo omwenyo gwe muuyuni mbuka, ote gu hupithile momwenyo gwaaluhe.

²⁶Ngele ku na ngoka a hala okuyakula ndje, na landule ndje, naankoka ngame ndi li, oko nkoka omuntu gwandje ta ka kala. Oongoka ta yakula ndje, Tate ote ke mu simaneka.”

²⁷“Ngashingeyi omwenyo gwandje ogwa tukuluka. Ondi tye shike we? Tate, hupitha ndje mokathimbo nkaka. Ihe osho tuu shika she eta ndje mokathimbo nkaka komahepeko.

²⁸Tate, simanekitha edhina lyoye.” Nena megulu omwa zi ewi lya ti: “Onde li simanekitha notandi li simanekitha natango.”

²⁹Ongundu yaantu mboka ya li ya thikama mpoka, oyu uvu ewi noya ti: “Omvula ya ndunduma.” Ooyakwawo oya ti: “Omuyengeli a popi naye.”

³⁰Jesus okwe ya yamukula a ti: “Ewi ndika inali popya molwandje, ihe omolweni.

³¹Uuyuni mbuka otau pangulwa ngashingeyi. Omupangeli guuyuni mbuka ota ka umbilwa pondje ngashingeyi.

³²Ihe uuna ngame tandi ka yeluthwa mo mevi, aantu ayehe otandi ke ya hilila kungame.”

³³Shika okwe shi popi, opo a holole kutya eso ndyoka e na okusa, olya tya ngiini.

³⁴Aantu oye mu yamukula: “Ompango yetu oye tu lombwela kutya Kristus ota kala e na omwenyo aluhe. Ngoye oto ti ngiini ano kutya Omuna gwOmuntu oku na okuyeluthwa? Omuna gwOmuntu ngoka olye?”

³⁵Jesus okwe ya lombwele a ti: “Oku na okathimbo okafupi natango uuyelele u li mokati keni. Kaleni tamu ende, manga mu na uuyelele, opo mwaa adhike komilema. Oshoka ngoka te ende momilema, ke shi ko nkoka ta yi.

³⁶Ano manga mu na uuyelele, itaaleni uuyelele, opo mu ninge aantu yuuyelele.” Jesus sho a popi oohapu ndhoka, okwa zi po e te ya holama.

³⁷Nonando ye okwa longo iikumithalonga mbyoka ayihe montaneho yawo, inaye mu itaala.

³⁸Opo shoka sha popiwa komuhunganeki Jesaja, shi tse, sho ta ti: “Omuwa, olye i itaale euvitho ndyoka twe li uvitha? Olye ngoka Omuwa e mu hololele oonkondo dhe?”

³⁹Onkee oya nyengwa okwiitaala, oshoka Jesaja okwa tile ishewe:

⁴⁰“Kalunga okwa tsikitha omeho gawo, okwa kukutike omitima dhawo, opo omeho gawo kaaga mone ko, oondunge dhawo dhaa uve ko, opo yaa itedhulule, ngaye ndaaye ya aludhe.”

⁴¹Jesaja okwa popi oohapu ndhika, oshoka okwa mono eadhimo lyaJesus nokwe mu hokolola.

⁴²Onkene tuu oyendji yomaawiliki yAajuda oya itaale Jesus; ihe omolwaafarisayi inaye shi hempulula montaneho yaantu, opo kaaya kondwe mo mosinagoga.

⁴³Oshoka yo oya li ye hole okupandika kaantu komeho gokupandika kuKalunga.

⁴⁴Nena Jesus okwi igidha a ti: “Oongoka i itaala ndje, hangame awike i itaala, ihe okwi itaala wo naangoka a tuma ndje.

⁴⁵Oongoka a mono ndje, okwa mono naangoka a tuma ndje.

⁴⁶Ngame onde ya, ndi kale uuyelele wuuyuni, opo kehe ngoka ti itaale ndje, kaa kale we momilema.

⁴⁷Kehe ngoka tu uvu oohapu dhandje ye ite dhi dhiginine, hangame tandi ke mu pangula. Oshoka ngame inandi ya okupangula uuyuni, ihe oku u hupitha.

⁴⁸Oongoka itaa taamba ndje ye itaa taamba oohapu dhandje, oku na omupanguli gwe ngoka te mu pangula. Oohapu ndhoka nda popya, odho tadhi ka kala omupanguli gwe esiku lyahugunina.

⁴⁹Oshoka ngame inandi popya mungame mwene, ihe Tate, ngoka a tuma ndje, oye a pe ndje oshipango shoka ndi na oku shi tya noku shi popya.

⁵⁰Ngame ondi shi shi kutya oshipango she otashi gandja omwenyo gwaaluhe. Onkee ano shoka nda ti, osho shoka Tate a lombwele ndje, ndi tye.”