Read Oshindonga-Ombiimbeli Ondjapuki 2008 John 15 Bible Online

John 15 - Oshindonga-Ombiimbeli Ondjapuki 2008 bible

John 15

¹“Ongame omuviinu gwashili. Tate oye omuneyana lyomiviinu.

²Oye ota keke po oshitayi kehe shomungame shoka itaashi imi iiyimati, ihe kehe oshitayi shoka tashi imi, ote shi opaleke, shi ime iiyimati oyindji.

³Ne omwa yelithwa nokuli koohapu ndhoka nde dhi mu lombwele.

⁴Kaleni muukumwe nangame, nangame otandi kala muukumwe nane. Ne itamu vulu okwiima iiyimati, ngele itamu kala mungame, ngashi naanaa oshitayi itaashi vulu okwiima iiyimati, ngele kashi li momuviinu.

⁵“Ongame omuviinu, ne iitayi. Oongoka ta kala mungame, ngame wo otandi kala muye. Oye noti imi iiyimati oyindji, oshoka mwaa na ndje kamu vulu okulonga nando osha.

⁶Kehe ngoka ita kala mungame, ote ekelwahi e ta kukuta ngashi oshitayi. Iitayi ya tya ngaaka otayi gongelwa ondumba e tayi umbilwa momulilo moka tayi pile mo.

⁷Ngele tamu kala mungame noohapu dhandje e tadhi kala mune, nena indileni shaa shoka mwa hala, ne notamu ke shi mona.

⁸Osho ngeyi Tate ota simanekithwa, ne ngele tamu imi iiyimati oyindji; nopamukalo nguka ne otamu ningi aalongwa yandje.

⁹Ngashi naanaa Tate e hole ndje, osho wo nangame ndi mu hole. Kaleni ano mohole yandje.

¹⁰Ngele otamu vulika komalombwelo gandje, otamu kala mohole yandje naanaa, ngashi ngame he vulika komalombwelo gaTate nonda kala mohole ye.”

¹¹“Shika onde shi mu lombwele, opo enyanyu lyandje li kale mune, nenyanyu lyeni li kale lya gwanenena.

¹²Oshipango shandje osho shika: Holathaneni, ngashi naanaa ngame ndi mu hole.

¹³Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe molwawo.

¹⁴One ookuume kandje, ngele tamu ningi shoka tandi mu lombwele.

¹⁵Itandi mu ithana we aayakuli, oshoka omuyakuli ita tseya shoka mwene gwe te shi longo. Onkee ano ngame otandi mu ithana ookuume kandje, oshoka iinima ayihe mbyoka nde yi uva kuTate, onde yi mu lombwela.

¹⁶Hane mwa hogolola ndje, ongame nde mu hogolola nonde mu tumu, mu ye ko, ne mu imike iiyimati oyindji, iiyimati mbyoka tayi kalelele. Nena shaa shoka tamu shi indile Tate medhina lyandje, ote shi mu pe.

¹⁷Shoka tandi mu lombwele, osho shika: Holathaneni.”

¹⁸“Uuyuni ngele tau mu tondo, dhimbulukweni kutya ongame wa tondo tango.

¹⁹Ando mwa li yomuuyuni, nena ando uuyuni ou hole aantu yawo. Ihe ngame onde mu yoolola mo muuyuni; omolwaasho uuyuni u na oku mu tonda.

²⁰Dhimbulukweni shoka nde mu lombwele: ‘Omuyakuli ke shi omunene e vule mwene gwe.’ Ngele aantu oya tidhagana ndje, nena otaa ke mu tidhagana wo. Ngele ya vulika koohapu dhandje, otaa ka vulika wo nokudheni.

²¹Iinima mbika ayihe oyo otaye ke yi mu ningila molwashoka one aalongwa yandje, oshoka inaa tseya ngoka a tuma ndje.

²²Ando nda li inaandi ya noinaandi ya lombwela, ando kaye na oondjo. Ihe ngashingeyi oyo kaye na nando osha shokupopila oondjo dhawo.

²³Oongoka e tonde ndje, oku tonde wo naTate.

²⁴Ando onda li inaandi longa mokati kawo iilonga mbyoka inaayi longwa nando okomuntu, nena ando yo kaye na oondjo. Ihe ngashingeyi sho ya mono shoka nda longa, oye tu tonde atuhe naTate.

²⁵Shika oshi na okukala ngeyi, opo shoka sha nyolwa mompango yawo shi gwanithwe: ‘Oyo oya tondo ndje owala pwaa na nando etompelo.’

²⁶“Ihe Omupopili, Ombepo yoshili, ngoka ta zi kuTate, ote ke ya. Ngame otandi ke mu tuma ta zi kuTate. Oye nota ka hokolola ndje.

²⁷Nane wo otamu ka hokolola ndje, oshoka omwa kala pamwe nangame okuza ketameko.