Read Oshindonga-Ombiimbeli Ondjapuki 2008 John 21 Bible Online

John 21 - Oshindonga-Ombiimbeli Ondjapuki 2008 bible

John 21

¹Konima yaambika Jesus okwi ihololele ishewe aalongwa ye pefuta lyaTiberias. Oye okwi iholola ngeyi.

²Simon Petrus, Tomas, ngoka i ithanwa Mukwanambwiyu, Natanael gwomuKana shomuGalilea, aana yaSebedeus naalongwa ooyakwawo yaJesus yaali opo ya li ayehe.

³Simon Petrus okwa ti kuyo: “Otandi yi, ndi ka yule oohi.” Oyo oye mu yamukula ya ti: “Natse wo otwa hala okuya nangoye.” Oyo oya thikama e taa yi mowato, ihe muusiku mbwiyaka auhe inaa kwata mo nando osha.

⁴Ano ongula sho kwa shi, Jesus okwa thikama komunkulo, ihe aalongwa oya li inaaye mu dhimbulula.

⁵Opo Jesus okwa ti kuyo: “Aamati yandje, inamu kwata mo nando osha?” Oyo oye mu yamukula ya ti: “Aawe!”

⁶Jesus okwe ya lombwele: “Umbileni oshiyulitho sheni lwokolulyo lwowato, notamu ka mona sha.” Oyo oyu umbile mo oshiyulitho noya nyengwa oku shi hila mo, oshoka oya li ya yula oohi odhindji.

⁷Omulongwa ngoka Jesus kwa li e hole, okwa lombwele Petrus a ti: “Omuwa oye ngo!” Simon Petrus sho u uvu kutya oye Omuwa, okwa zala ombaikitha ye, oshoka okwa li a zala oonguwo dhokohi adhike e ta nukile momeya.

⁸Aalongwa ooyakwawo oye ya nowato komunkulo noya hili mo oshiyulitho, shoka shu udha oohi. Oyo kaya li unene kokule nevi, oya li poshikako shi thike poometa ethele.

⁹Ano sho ya thiki komunkulo, oya mono eziko lyomulilo gwa teka ekala, nopeziko opwa li pu na oohi noshikwiila.

¹⁰Nena Jesus okwe ya lombwele a ti: “Eteni oohi dhimwe nkuka, ndhoka mwe dhi kwata ngashingeyi.”

¹¹Simon Petrus okwa yi ihe mowato, e ta hilile oshiyulitho komunkulo. Sho osha li shu udha oohi oonene, ethele limwe nomilongo ntano nandatu. Ihe nando oohi odha li mo odhindji ngeyi, oshiyulitho inashi tomoka nando.

¹²Jesus okwa ti kuyo: “Ileni, tu lyeni.” Kape na nando ogumwe gwomaalongwa ngoka a li e na omukumo oku mu pula kutya ongoye lye? Oshoka yo oya li ye shi shi kutya oye Omuwa.

¹³Jesus okwe ya e ta kutha oshikwiila nokwe shi ya pe; noohi wo osho a ningi.

¹⁴Nduka olutitatu, sho Jesus i ihololele aalongwa ye konima yeyumuko lye kuusi.

¹⁵Ano sho ya mana okulya, Jesus okwa ti kuSimon Petrus: “Simon yaJohannes, ou hole ndje tuu u vule mbaka?” Oye okwe mu yamukula: “Eeno, Omuwa, ou shi shi kutya ondi ku hole.” Jesus okwa ti kuye: “Litha uunzigona wandje.”

¹⁶Jesus okwa ti kuye olutiyali: “Simon yaJohannes, ou hole ndje?” Oye okwe mu yamukula: “Eeno, Omuwa, ou shi shi kutya ondi ku hole.” Jesus okwe mu lombwele: “Litha oonzi dhandje.”

¹⁷Jesus okwa ti kuye olutitatu: “Simon yaJohannes, ou hole ndje?” Petrus okwa nika oluhodhi, Jesus sho e mu pula olutitatu: “Ou hole ndje?” e ta ti kuye: “Omuwa, owa tseya iinima ayihe; ou shi shi kutya ondi ku hole.” Jesus okwa ti kuye: “Litha oonzi dhandje.

¹⁸Ngame otandi ku lombwele oshili: Sho wa li omunona, owa li ho imanga epaya mombunda, nowa yi shaa mpoka wa hala, ihe nge wa koko, nena oto yelutha omaako goye, gulwe note ku manga e te ku fala nkoka inoo hala okuya ko.”

¹⁹Shika okwe shi popi, opo a holole kutya oneso lya tya ngiini Petrus e na oku ka simanekitha Kalunga. Nena Jesus okwa ti kuye: “Landula ndje.”

²⁰Petrus okwa punguluka e ta tala lwanima, nokwa mono omulongwa mukwawo, ngoka Jesus kwa li e hole. Oye tuu ngoka a li a kuutumba ponto yaJesus puulalelo nokwa pulile Jesus ta ti: “Omuwa, olye ngoka te ke ku gwaaleka?”

²¹Petrus sho e mu mono, okwa ti kuJesus: “Omuwa, ongiini kombinga yomulumentu nguka.”

²²Jesus okwe mu yamukula: “Ngele onda hala, a kale e na omwenyo, sigo tandi ya, ou na shike nasho? Landula ndje ashike.”

²³Ehokololo olya taandele ihe mokati kaalongwa yaJesus kutya omulongwa ngoka ita si. Jesus ina tya kutya ita si, ihe okwa ti: “Ngame ngele onda hala, a kale e na omwenyo, sigo tandi ya, ou na shike nasho?”

²⁴Omulongwa ngoka oye tuu nguka ta hokolola iinima mbika, noye wo ngoka e yi nyola. Tse notu shi shi kutya shoka ta ti, osho oshili.

²⁵Ano oku na iinima iikwawo oyindji Jesus e yi ninga. Ando ayihe oya nyolelwe shimwe nashimwe, ondi inekela, ando omambo ngoka itaga gwana mo muuyuni.