Read Oshindonga-Ombiimbeli Ondjapuki 2008 John 3 Bible Online

John 3 - Oshindonga-Ombiimbeli Ondjapuki 2008 bible

John 3

¹Gumwe gwomaafarisayi, edhina lye Nikodemus, oshilyo shomongundu yaapangeli Aajuda,

²okwe ya kuJesus uusiku nokwa ti kuye: “Muhongi, otu shi shi, ongoye omulongi ngoka a tumwa kuKalunga, oshoka kaku na nando ogumwe ta vulu okulonga iikumithalonga mbyoka to longo, okuninga Kalunga e li pamwe naye.”

³Jesus okwe mu yamukula nokwa ti: “Ngame otandi ku lombwele oshili: Omuntu ngele ita valululwa, ita vulu okumona Oshilongo shaKalunga.”

⁴Nikodemus okwa ti kuye: “Omuntu ngele omukuluntu, ota vulu ngiini okuvalwa ishewe? Ita vulu ndishi okushuna moshivalelo shayina, a valwe olutiyali?”

⁵Jesus okwe mu yamukula: “Ngame otandi ku lombwele oshili: Kape na omuntu ta vulu okuya mOshilongo shaKalunga, ngele ina valululwa momeya nomOmbepo.

⁶Shoka sha valwa panyama, osho onyama, naashoka sha valwa pambepo, osho Ombepo.

⁷Ino kumwa, sho nde ku lombwele kutya omu na okuvalululwa.

⁸Ano ombepo ohayi pepe shaa mpoka ya hala. Oto uvu oshihomo shayo, ihe ku shi mpoka tayi zi naankoka yu uka. Osho naanaa shi li kukehe ngoka a valwa pambepo.”

⁹Nikodemus okwe mu pula a ti: “Shika otashi vulika ngiini?”

¹⁰Jesus okwa yamukula a ti: “Ngoye omulongi gwAaisraeli, ihe nani shika ku shi shi?

¹¹Otandi ku lombwele oshili. Tse otatu popi shoka tu shi shi notatu hokolola shoka twa mona, ihe ne inamu hala okutaamba ehokololo lyetu.

¹²Ngele tandi mu lombwele iinima yokombanda yevi, ihe itamu itaale, otamu vulu ngiini okwiitaala, ngele tandi mu hokololele iinima yomegulu?

¹³Kape na nando ogumwe a yile megulu kakele kOmuna gwOmuntu, ngoka a zi megulu.”

¹⁴“Ngashika naanaa Moses a li a yelutha eyoka pombanda mombuga, osho wo Omuna gwOmuntu e na oku ka yeluthwa pombanda,

¹⁵opo kehe ngoka te mu itaale, a kale e na omwenyo gwaaluhe.

¹⁶Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.

¹⁷Oshoka Kalunga ina tuma Omwana muuyuni, a pangule uuyuni, aawe, okwe mu tumu, opo uuyuni u hupithwe kuye.”

¹⁸“Ngoka i itaala Omwana, ita pangulwa; ngoka ini itaala, okwa pangulwa nale, oshoka ini itaala Omuvalwa awike gwaKalunga.

¹⁹Ihe epangulo oli li mpoka kutya uuyelele owe ya muuyuni, ihe aantu oye hole omilema shi vulithe pokuhola uuyelele, oshoka iilonga yawo iiwinayi.

²⁰Kehe ngoka ha longo uuwinayi, oku tonde uuyelele noite ya puuyelele, oshoka ina hala, iilonga ye iiwinayi yi holoke.

²¹Ihe ngoka ta longo iilonga yu uka, ote ya puuyelele, opo uuyelele u holole kutya iilonga ye oya longwa omolwokuvulika kuKalunga.”

²²Konima yaambika Jesus naalongwa ye oya yi kuJudea. Ye okwa kala ko omasiku gamwe pamwe nayo ta shasha aantu.

²³Johannes okwa li ta shasha puAinon, popepi naSalim, oshoka kokuma nkoka okwa li ku na omeya ogendji. Aantu oyendji oye ya kuJohannes, oye nokwe ya shasha,

²⁴oshoka Johannes okwa li ine edhililwa natango mondholongo.

²⁵Yamwe yomaalongwa yaJohannes oya tameke okuludhika nOmujuda gumwe kombinga yeyogo lyopaShijuda.

²⁶Yo oye ya kuJohannes noya ti kuye: “Muhongi, tala ko, omulumentu ngoka a li pamwe nangoye handiyaka yomulonga gwaJordan naangoka we mu hokolola, ota shasha, naantu ayehe otaa yi kuye.”

²⁷Johannes okwa yamukula a ti: “Kape na omuntu ta vulu okwiikuthila nando osha, okuninga Kalunga te shi mu pe.

²⁸One yene oonzapo dhandje, sho nda tile, ngame kandi shi Kristus, ihe onda tumwa oku mu tetekela.

²⁹Ngoka e na omufuko, oye ombushiki. Ihe kuume kombushiki ota thikama e ta pulakene nota nyanyukilwa ewi lyombushiki. Osho wo nenyanyu ndika lyandje olya gwanenena.

³⁰Oye e na okunenepala, ihe ngame ondi na okushonopala.”

³¹“Oongoka a za pombanda, oye omunene e vule ayehe. Ngoka gwopavi, ogwopavi nota popi iinima yopavi. Ngoka a za megulu, oye omunene e vule ayehe.

³²Oye ta hokolola shoka a mono nokwa uvu, ihe kape na nando ogumwe ta taamba ehokololo lye.

³³Oongoka ta taamba ehokololo lye, ota koleke nokutya Kalunga oye Kalunga kashili.

³⁴Ngoka a tumwa kuKalunga, oye ta popi oohapu dhaKalunga; oshoka Kalunga ite mu pe Ombepo ta yeleke, ihe ote mu pe sha gwana.

³⁵He oku hole Omwana nokwe mu pa iinima ayihe miikaha ye.

³⁶Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona omwenyo, ihe ondjahi yaKalunga otayi kala kombanda ye.”